Ec 8 - A Txꞌan Biblia Yin Kꞌanjobal 1989

¹ Asan junok jelan is nabal chi nachaj el yuj, tzet yelapnok masanil tzet yetal. A wal jelanilal tu' chi ak'on tzalojbok ajok, c'al yak'on tzetzon aj sat tol ow yili.

Ikemal bay cham rey

² Ikej masanil chekbanilej chi yak' cham rey, yujtol axca tu' max yun ak'on a ti' bay Dios.

³ Manchak ach eltok satak cham rey tu' yin aymanil, tamwal cha tec'baj a ba yin junok k'anej yob yul sat cham, yujtol chi je' yunen cham tzet yetal tol chi cha' c'ul.

⁴ Yujtol asan cham rey chi je' yalon junok lajub k'anej, tok ay mactxel ok je' k'anlen yab tzet yetal chi yun cham.

⁵ A mactxel chi yikej junok chekbanilej, c'am tzet yetal chi tit yiban. A mactxel aj nabal, chi nachaj el yuj bak'in ok yunej, c'al tzet chi yun yikeni.

⁶ Ay wal is mojalil tzet chi yun jikeni, c'al is c'ual, palta a tzet chon on xin

⁷ tol man jojtakok tzet yetal ok ujok, tamwal ay mactxel chi je' yak'on jojtaknej elok.

C'am mactxel ay yikbej yiban camich

⁸ C'am mac ay yikbej yiban yiquisal, yet chi mitx'on waayok. C'am mac chi je' tenon oc wanaj c'ual is camichal, yujtol a camich tu', axca wal junok owal c'am chi je' co colon co ba bay, tamwal junok yobtakwom c'am chi je' col-lay el yul k'ab yuj is yobtakilal tu'.

Ay tzet yetal tol c'am jabok yelapnok

⁹ Masanil juntzan ti' max wila', yet max in oc ijan wojtaknen el tzet yetal chi uj bay yulyibank'inal ti', a bay ay anima tol ay yikbej ayocok, chi yak'balnej yikbej tu' yin yetnen yet animail.

¹⁰ Max wilon c'apaxok, tol ay eb anima yob is nabal, a yet chi muklay eb, chi ilay can eb yuj eb anima. Axa pax eb anima ayilwom bay Dios, tok ayto mac chi naontek eb bay yul is conobal bay max yun eb xiwil tzet yetal watx'. A yuj juntzan ti', xan toc'al chi somchaj el co c'ul yuj.

¹¹ Yujtol c'am chi alay oc yailal yiban eb yobtakwom yin aymanil, xan asanxanej yobtakilal tu' chi na eb anima yuneni.

¹² Caxc'al mi ay anima tol chi occ'al is mul, caw wal miman pax yabilal chi yila'; palta wojtak wali tol a mactxel ay yelapnok Dios yul sat, watx'c'al chi elocok.

¹³ Axapax eb yobtakwom xin, yobc'al ok eloc eb, a yiquisal eb axcac'al junok enelej chi yun yeq'uelok, yujtol c'am yelapnok Dios yul sat eb.

¹⁴ Palta xin, a bay yulyibank'inal ti', ay bay tol q'uexan chi yunej. Ay eb anima watx' beybal, chi yab eb yail, axcaxac'al tol yobtakwom eb, axa pax eb anima caw wal yobtakwom xin, caw wal chi yak' tzalojbok eb c'ul, axcaxac'al tol watx' eb. Ayin ti' chi wala' tol toc'al chi somchaj el co c'ul yuj juntzan ti'.

¹⁵ Yuj tu' xan chi wala' tol moj wal tol chon tzaloji. A wal tzet yetal watx' chi jun bay yulyibank'inal ti', asan tol chon lowi, juq'uena', c'al jak'on tzalojbok co c'ul. Asan juntzan ti' chi je' jion yin co mulnajil chi yak' Dios ayon, yak'ban iquis on bay yulyibank'inal ti'.

¹⁶ Max wak' wip in cuyoni c'al wojtaknen el tzet yailal chi uj bay yulyibank'inal ti', toltax ay mac c'am chi way jabok yet c'ualil, tamwal yet ak'balil.

¹⁷ A max yun nachaj el wuj xin, tol masanil tzet chi yun Dios, c'al tzet yetal chi ec'tok bay yulyibank'inal ti' c'am chi je' nachaj el juj. Caxc'al tol chi jak' jip jojtaknen elok, palta c'am chi nachaj el juj. Caxc'al tol a junok aj nabal chi aloni tol yojtak, palta wal yel, c'am tzet chi je' yojtaknen elok.