Ec 7 - A Txꞌan Biblia Yin Kꞌanjobal 1989

Jak'ek jip yin tzet miman yelapnok

¹ Yelxac'al watx', tol watx' a binaji, yintak pax tol chi el jabil perfume manxa watx'ilok en. Yelxac'al watx' jun c'ual yet chon cami, yintak pax c'ual yet chon alji.

² Yelxac'al watx' tol chon toj iloj ak'bal bay ay junok camich, yintak pax tol chon tojcan bay junok k'in, yujtol a camich tu', a' ayoc co lajubalok co masanil; watx' tatol chi co na yin yak'ban iquis onto.

³ Yelxac'al watx' tatol chi cus co c'ul, yintak pax tol chon tzewi, caxc'al cusiltak yili co sat, palta chi watx'ji aj co nabal yuj.

⁴ A mactxel aj nabal chi na' yin camich; a pax mac c'am is nabal xin, asan tol chi yak' nabal.

⁵ Yelxac'al watx' ta chi co cha jab tenchebalej chi yal junok aj nabal ayon, yintak pax tol chon ilay aj can yuj junok c'am is nabal.

⁶ A yet chi toj nuk' junok c'am is nabal tzewi, lajan wal axca pak'labi te q'uix yet chi tz'a'i, c'am wal jabok yelapnok.

⁷ Ta a junok aj nabal chi etnen junok mactxel, axcaxac'al junok c'am nabal chi yut ba, ac'ala' jun mac chi chaon montebal tumin, ac'al oc chi yetnej el is beybal.

⁸ Yelxac'al watx' yet chi lajwi ay junok tzet yetal, yintak yet chi chalay el yich. Yelxac'al watx' yet mactxel tol chi tec'bajc'al ba, yintak pax mac jelan chi yut ba.

⁹ Manchak a bek a ba yin tol c'un tit a chichonc'ulal, yujtol a chichonc'ulal tu' yet eb anima c'am nabal yayji ocok.

¹⁰ C'am cha k'anlej ¿tzet yuj xan watx'c'al max yun beyc'altek yet payxa? man cachiok. A juntzan k'anlebal axca tu', a juntzan c'am nabal chi k'anleni.

¹¹ Watx' yet mactxel tol ay tzet chi sataknej, ac'ala' ay c'apax is jelanil.

¹² Yujtol a jelanil tu', chi colwaj bay mactxel tu', axca chi yun colwaj pax ch'en tumin, palta yelxac'al watx' jelanilal tu', yujtol chon ayji yin junc'ulalil yuj.

¹³ Chi cam wal eloni, tzet yetal chi watx'nej Dios: ¿Mactxel chi je' tojolnen oc tzet yetal tol coxan yayjican yuj Cham?

¹⁴ Ta watx' ayach, ak' tzalojbok a c'ul; palta ta man watx'ok ayach chab xin, chi cam a naoni tol a Dios chi uten ca makanil tu', yuj tu' xan man jojtakok tzet yetal chi jayoc co satak.

¹⁵ A yin janic' in k'inal c'am yelapnok ti', max wil masanil tzet yetal. Ay anima tol caw wal watx' is nabal chi cami, ay pax anima caw wal yob is beybal, palta xiwil abil chi yil eb.

¹⁶ Yuj tu' xan manchak ach ec' yiban oten a ba watx'il, tamwal chach ec' yiban oten a ba jelanilal, talaj ayachc'al oc chetnej a ba.

¹⁷ Manchak ec'xac'al yiban tol yob chot a ba, tamwal tol chot c'apax a ba yin c'am nabalil, talaj chi jayoc camich en yet c'amto chi ajapnok c'ual a cami.

¹⁸ Watx' chi jut co mitx'on waay co ba yin jun ti', c'am chi co bekil junxa tu'. A mactxel tol ay yelapnok Dios yul sat, watx'c'al chi yun yelapnok yin masanil tzet yetal.

¹⁹ Chi ak'lay tec'anil junok jelan yuj is jelanilal tu', yintak pax lajonwanok eb yajaw ayoc bay junok conob.

²⁰ Palta xin, c'am wal junok mactxel bay yulyibank'inal ti' tojol, tol c'am bay chi oc is mul.

²¹ Manchak a cha ab masanil tzet yetal chi ali, axca tu' man yobok ok abej, tatol yob tzet ok yal eb a chekbej en,

²² yujtol ach ti', ojtak wali tol xiwil mi el yob c'apax chal yin junokxa mactxel.

Max beyc'ulnej masanil

²³ Yetok in jelanilal max in beyc'ulnej el masanil juntzan ti', yujtol ay wal oc yin in nabal tol jelan chin elocok. Palta c'am chi nachaj el wuj chi wabej.

²⁴ Tokwal chi nachaj el wuj masanil jelanilal yelxac'al miman yayji ocok, c'am mac chi je' nachaj el yuj.

²⁵ Max quin oc wal ijan wojtaknen elok, c'al in cuyoni, c'al in sayon ec' yin jelanilal, tzetbil yayji oc masanil. A wal max yun nachaj el wuj, tol yob satak Dios, tatol chi co pitnej co ba yin co c'am nabalil.

²⁶ Ay wal jun tzet yetal yelxac'al yob max ilchaj wuj yintak camich. A ton wal junok ix tol jelan yin yak'on ayc'ay winak, c'amxa chi beklay el yuj. A nak chi tzaloj Dios yetok, c'am chi ayc'ay yuj ix, palta a pax junok tol yobc'alta' is nabal xin, chi ayxac'al c'ay yuj ix.

^27-28 A yin wak'on wip nachaj el masanil juntzan tzet yetal ti' wuj, xiwilc'al tzet yetal tol c'amtoc'al chi wiltek, palta a yin jun ti' xin, junnej winak tol ay yelapnok max ilchaj wuj xol jun mil winak. A pax xol eb ix ix xin, c'amto junok ay yelapnok max ilchaj wuj.

²⁹ Asan juntzan ti' max chaloj wuj: Tol a Dios, caw wal watx' max yun watx'jican anima yuj, palta xiwil tzet max saytek eb yiban.