Ec 12 - A Txꞌan Biblia Yin Kꞌanjobal 1989

¹ Naektek Cham mac max ex watx'neni,*fn* yak'ban unin anima exto, yet c'amto che chalej e ba yetok yabilal tol yinxac'al yatakilal ok yun yec' e yuj. A wal yet ok jayoc juntzan abil yet ok e yalon axca ti': C'amxa watx'il yet iquis on ec' ti', quex chixac'al mi.

² Naektek Cham tinani', yak'ban tol watx'to e yilon yakan c'u, yakan xajaw c'al waycan, yet c'amto chi aj can jay txololok yailal.

³ Axa ok yunej, a e k'ab chex colon tinani', toxac'al ok bilok, a e yakan tol tec'an waayi ok pax yip. C'amxa c'apax e ye yin e cach'on e lobej, manxa ok low c'apax e sat yin watx'.

⁴ A yet ok apnok oc juntzan c'ual tu', manxa ok e yab tzet ok uj yul calle, tamwal ok e yab bil ch'en ca'. Iquis exxa yet chi ok'aj no tz'iquin, nabaxac'al ok oc son e satak.

⁵ Ayxac'al e xiwc'ulal bay junok can ay ajok, ayxac'al is may e yec' yulak be. Axa c'oli sakbi xil e jolom, c'ojanc'ulalxac'al e yec' matxlabok, c'amxa c'apax tzet ok e na yin e yetbi, yujtol lananxa e toj bay e cajlobal yin junelnej; axa bay yulak calle, lananxa yok' eb chi ok' yuj is camnak.

⁶ Naektek Cham e watx'nemal, yak'ban wal c'amto chi nic'chaj e cadena tol plata, tamwal tol chixa poj c'apax tok jun xij tol oro. Yetok c'apaxok, c'amto chi pojtok tx'otx' moc bay ti a' aej, c'amto c'apax chi nic'chaj tok'banil ajtek a' aej yul olan.

⁷ Lajwi tu' axa e mimanil ok occan pokokal, ok tokcan bay sat tx'otx', axcac'alta' yayji yet yalantok, axa e yanimail xin, ok tojcan bay Dios Cham max ak'oni.

⁸ Ayin chin k'anjab ti', chin ca alnej: ¡Nabac'al ton masanil, cax c'am yelapnok!

A juntzan lajub k'anejal

⁹ A wal yet max aj can in jelanil, xiwilxa tzet max wak' yojtaknej el eb wet animail. Yetok c'apaxok, manxa wal k'anejok max waoc yin in c'ul in cuyon yin txolilal.

¹⁰ Caw wal max in say wal k'anej tol watx'xac'al chaon ba, yet chin tz'ibej juntzan k'anej tol yel axca wal is mojalil.

¹¹ A tzet yetal chi yal eb jelan, lajan wal axca junok ch'ebalej, a yet mayal cha ba juntzan k'anej tu' yin txolilal lajan wal axca estaca tol caw chi yun mak'lay ayok, tol ak'bil ayon yuj junok jilomal.

¹² Ach wuninal, chi cam eloni, man comonok cha cha ab juntzanokxa k'anej, yujtol a watx'nej eltek libro c'am is lajubal; yetok c'apaxok, ta xiwil chon cuywi yin, chon ispay aj yin.

¹³ Caytu' chi yun lajwi jun k'anej ti'. Mayal al-lay masanil. Ayokab yelapnok Dios yul co sat, jikejokab is chekbanil, yujtol a jun ti' yowalil chi junej.

¹⁴ Yujtol a Dios ok k'anlej yab ayon masanil tzetak yetal chi junej, tac'al watx' ma yob, caxc'al mi yin ewantakil max junej.