Eb Juez 7 - A Txꞌan Biblia Yin Kꞌanjobal 1989

Yayc'aybal eb madianita

¹ Caw wal k'inibalil max aj wan Gedeón, a ton max ak'lay yik Jerobaal, c'al jantak eb anima ayxa oc yetok, max toj eb watx'nej aj is campamento bay a' nuk' aej chi yik Harod. Axa pax is campamento eb madianita xin, a bay satak ec'tok ayajok, bay ac'al yich witz More.

² Max yalon Jehová bay Gedeón: Caw wal xiwil anima ibil oc oj. Ta chi waoc eb madianita yul e k'ab nani', cax chi ayc'ay eb e yuj, chi mi laj e yala' tol a yetok e yipalil che yak' ayc'ay eb.

³ Yuj wal tu xin, al xol eb soldado masanil, ta ay eb chi xiw toj yin owal, tol chi pet aj wan eb yecal, chi el eb bay witzal Galaad ti', cax chi meltzoj eb bay yatut, ẍi Jehová. Axca tu' max yun yak'on porobal Gedeón eb anima, xan max paxcantok 22,000 eb bay yatut. Asanxanej 10,000 eb max cani.

⁴ Palta maxto yal pax Jehová: Xiwilto eb anima ti'. Itok eb nak yuc' aej bay ti a'. A tu' ok wil eb, mactakto txel eb ok can etok, cax ayin ok wala', ẍi Jehová.

⁵ Max lajwi tu', max yiontok Gedeón eb nak max can tu' yuq'uen aej bay ti a'. Max yalon Jehová: Masanil eb tol chi betxajtek aej yul is k'ab yuq'uej, a eb tu' tx'ok chi elcan xol eb tol chi aytok nojan yuq'uen ajtek a', ẍi Jehová.

⁶ A eb tol max betxajtek a' yul is k'ab, cax chi yuq'ueni, 300 eb tol axca tu' max yutej, axa juntzanxa eb xin, max ay nojan eb yuq'uen ajtek a' aej tu'.

⁷ Max lajwi tu', max yalon Jehová bay Gedeón: K'okbil eb 300 tu' ok ex colon el wuj, asan eb tu' ok in k'ana', cax ok ayc'ay eb madianita tu'. Axa pax eb tol max ay nojan yuq'uen ajtek a' aej tu', paxokab eb bay yatut, ẍi Jehová.

⁸ Yuj wal tu' xan max yal Gedeón, tol chi meltzojtok eb bay yatut. A yet c'amto chi toj eb bay yatut tu', max yioncan ec' Gedeón is lobej eb, c'al is cacho eb chi xu'. Asanxanej eb 300 max sic'lay can el tu' max can yetok Gedeón. Cax a tu' c'alta' ay is campamento eb bay jolom witz bay yiban bay ay is campamento eb madianita.

⁹ A yet jun ak'bal tu' max yal Jehová bay Gedeón: Ajan wanok, cax chach toj ak'on owal yetok eb madianita, yujtol ayin ok waoc eb yul a k'ab.

¹⁰ Ta chach xiw ochon aj eb nak, ayokabtok a chekbej Fura etok bay is campamento eb,

¹¹ cax ok ex abxalwok bay ti' mantiado tzet chi yun yalon eb, yuj tu' xan man ok ach xiw a chaon oc owal, ẍi Jehová. Caytu' max yut Gedeón. Max toj yetok is chekbej chi yik Fura yet ak'balil tilak is campamento eb madianita, yuj yaben tzet chi yal eb.

¹² A ton eb madianita, yetok eb amalecita, yetokc'al eb max tit bay yetc'ulal bay chi ajol c'u, max saklemcantok eb bay ac'al tu', axca no chapulín. Caw wal c'amxa chi bischaj jantak camello ibil oc yuj eb; lajanxa yilitok axca arena bay ti a' mar.

¹³ Cax max jitzontok ba Gedeón bay ti' jun is mantiado eb nak ajc'ul tu', max yaben yalon jun nak soldado is wayich bay junxa. —Max in wayichnej tol ay jun ixim pan cebada max tit bay sat witz, max ayol bay co campamento ti', max oc chac'naj ixim yin mantiado ti', cax max ec' weknajok, ẍi nak.

¹⁴ Max tak'wi nak yetbi nak tu' axca ti': —A chi yal elapnok jun tu', a Gedeón is c'ajol Joás aj israel yetok is soldado. A Dios ok on aon oc yul is k'ab yetokc'al co campamento ti', ẍi nak.

¹⁵ A yet max yaben Gedeón tzet max yut yalon eb jun wayichej tu', cax max ay jajan satak Jehová yalon yuj diosalil bay Cham. Max lajwi tu', max toj bay is campamento, max yaloni: Tonek, mayal yaoc Jehová eb madianita yul co k'ab, ẍi.

¹⁶ Lajwi tu', ox makan max yut pojontok eb 300 tu', cax max yak'on junjun is cacho eb yet chi xu eb, c'al junjun moc ayaytok tzektebalej yul.

¹⁷ Max yalon Gedeón tu' bay eb axca ti': —A yet ok in ec'apnok bay k'axepal ec'tok is campamento eb ajc'ul tu', ok e yil tzet wal ok wunej, caytu' ok e yun pax ayex ti'.

¹⁸ A yet ok e yaben in xuon no cacho ti' yetok eb tzunan oc wintak, cax ok e xuon pax e yet e masanil bay yinlak campamento tu', cax ok el e yaw. Ok e yalon axca ti': ¡Yuj Jehová c'al yuj Gedeón! quex chi, ẍi bay eb.

¹⁹ A yet max apni oc Gedeón yetok eb 100 soldado tzunan oc yintak bay k'axepaltok campamento, lanan wal q'uexlen ba eb guardia yin is turno yet chuman ak'bal. A wal yet tu' max xuon eb no cacho, max mak'on poj eb is moc ibil oc yuj.

²⁰ Junnejc'al max yun xuon eb is yox makanil is cacho, c'al mak'on poj eb is moc, axa yetok is q'uexan k'ab eb tzeknej aj is tzektebal tu'. ¡Jak'ek owal yuj Jehová c'al yuj Gedeón! ẍi eb.

²¹ Max canxac'al can lecan eb soldado israel bay yinlak campamento. Axa eb ajc'ul tu', yanejxac'al eb yeli, chi el yaw eb yuj xiwilal.

²² A yet max xuon eb 300 israel is cacho, axa Jehová max somontok is nabal eb ajc'ul tu', cax ac'al oc eb max yak'lej cam ba. Ay pax eb max eli, max toj eb bay Bet-sita, bay yetc'ulal Zerera, masantac'al max apni oc eb bay mojonal Abel-mehola bay is cawilal Tabat.

²³ Lajwi tu', max awtelay eb is tribual Neftalí, c'al Aser, yetokc'al is tribual Manasés, yuj colwaj eb toj yintak eb madianita.

²⁴ Cax max yalon Gedeón tol chi tit c'apax eb is tribual Efraín cajan bay siquilal tx'otx', chi toj eb yin aymanil makwal bay ay taxbal bay a' Jordán bay Betábara, a yet c'amto chi apni oc eb ajc'ul tu'. Cax max yiken eb is tribual Efraín tu' toji.

²⁵ Max michchaj cawan eb yajaw yuj eb, ay jun chi yik Oreb, axa junxa, chi yik Zeeb. A Oreb tu' max cam bay ch'en ch'en chi yik Oreb tinani'. Axa Zeeb max cam bay jun tec'bal uva, xan a tec'bal uva tu', Zeeb is bi tinani'. Lajwi tu' cax max tzakloj eb tribual Efraín yintak eb madianita tu', cax max yiontok eb is jolom Oreb yetok yet Zeeb bay Gedeón, bay k'axepal ec'tek a' Jordán.