Eb Juez 6 - A Txꞌan Biblia Yin Kꞌanjobal 1989

Max awtelay Gedeón yuj Dios

¹ Caw wal yob tzet max yun pax eb conob Israel satak Jehová. Yuj wal tu' xan max alay oc eb ukeb abil yul k'ab eb madianita.

² Max occ'al eb israel yin yatakilal yuj eb madianita tu'. Yuj wal eb xan max watx'nej eb olan yinlak witz bay chi c'ubaj el ba eb, cax chi c'uban c'apax el ba eb bay yulak nach'en, c'al bay yatak yapni oc anima, a tu' max octok cajan eb.

³ Axa eb madianita tu', yetokc'al eb amalecita, yetokc'al juntzanxa eb cajan bay yetc'ulal bay chi ajol c'u, a yet chi yilon eb tol ayxa janic'ok tzet awbil yuj eb israel, cax chi bet etnelay eb yuj eb.

⁴ Max bet watx'nej aj eb is campamento bay sat is tx'otx' eb israel, max yetnentok eb masanil tzet yetal awbil yuj eb, masantac'al chi apni oc eb bay Gaza. C'amxa janic'ok tzet chi cancan yuj eb yet chi lo eb israel, cax chi yelk'anentok eb no calnel, no wacax c'al yetok no burro.

⁵ Max watx'nej aj eb is campamento, cax chi yiontok eb masanil no' is jobbejal no' bay sat tx'otx' is tx'otx' eb israel. Masanil tzet yetal ay bay sat tx'otx' max lajwi el masanil. Chi apni oc bulolok no camello yuj eb, axca wal chi yuncantok sat tx'otx' yuj no chapulín, caywal tu' chi yuncantok tx'otx' yuj no'.

⁶ Caywal tu' max yuncan eb israel yin mebail yuj tzet max utlay eb yuj eb madianita tu'. Yuj wal tu' xan max cusaj c'ul eb israel, max aj yaw eb k'anon is colwal Jehová.

⁷ Max occ'al ijan eb israel k'anon is colwal Jehová yet watx' chi col-lay eb yul is k'ab eb madianita.

⁸ Yuj tu xin, max yatek Jehová jun is chekbej yet chi yala': Axca ti' yalon Jehová co Diosal: Ayin max ex wieltek bay Egipto, bay ayex oc yin mosejal.

⁹ Mannejc'alnak tol max ex eltek bay tu', palta masanilc'al eb max ex etneni, max el eb e satak, cax max ex in colon el bay eb, yin bulquiltakil max yun wion el eb yulak e be, max wak'on is tx'otx' eb ayex.

¹⁰ Max wal ayex tzetbil tol ayin Jehová e Diosal in. Max walon ayex, tol c'am chex xiw bay is diosal eb amorreo bay tx'otx' tx'otx' bay ayex ec' ti', palta caw wal maj e yikej bay tzet max wala', ẍi Jehová, ẍi jun is chekbej tu'.

¹¹ Max lajwi tu', max toj ay chotan Cham yángel Jehová bay yich jun te ji' bay sat tx'otx' jun cham chi yik Joás, is yinatil Abiezer. Axa Joás tu' ay jun is c'ajol chi yik Gedeón. A yet jun tiempoal tu', lanan mak'wi trigo Gedeón yin ewantakil. Yet c'am chi yil eb madianita, a bay chi tec'lay el yal an uva, a tu' chi mak'wi trigo.

¹² A tu' max tx'ox ba Cham yángel Jehová bay Gedeón, cax max yaloni: —Manchak ach xiwi, ach soldado watx', tol tec'an a waayi. A Jehová ayoc etok, ẍi bay.

¹³ Max tak'wi Gedeón: —Ak' mimanc'ulal win Mamin, ay tzet ok wal ayach. Ta ayoc Jehová jetok, ¿tzet yuj xan axca ti' chi jay jiban on? ¿Baytal ay milagro tinani' axca max yun yalon eb jichmam ayon yet max ilay eltek eb bay Egipto? Bekbil onxa can yuj Jehová, mayal on yacan oc Cham yul k'ab eb madianita, ẍi Gedeón.

¹⁴ Max oc t'anan Jehová yin, cax max yaloni: —Ayin chach watok, manchak ach oc il, ak'balnej epalil chi wak'a', yin a colon et conob Israel bay eb madianita, ẍi Jehová.

¹⁵ Cax max tak'wi Gedeón axca ti': —Ak' mimanc'ulal yin tzet ok wal ayach Mamin. ¿Tzet wal ok yun in colon eb wet conob Israel ti'? Meba' anima on yin is tribual Manasés, cax ayinxac'al tzunan unin in xol eb wuẍtak, ẍi Gedeón.

¹⁶ Max yalon pax Jehová: —Ayin oc etok, xan ok je' oj. Ok ayc'ay eb madianita oj, axcac'al chi yun yayc'ay junok winak tx'oklil.

¹⁷ Yuj wal tu' xan max yal Gedeón: —Mamin, ta watx' in yul a sat, ak' junok yechelej ayin, yet watx' ok nachaj el wuj, tol chekbej ach Dios.

¹⁸ A tinani', elok wal yin a c'ul, tol c'am chach el cayti', tol ok witek junok in xajanbal ayach, ẍi Gedeón. Max tak'wi Jehová: —Ti ok ach wechbanej, masantac'al ok ach jayok, ẍi Cham.

¹⁹ Max toj Gedeón watx'nej el jun no yune' chiwo, max watx'nen ixim pan tol c'am yich, yetok jun echbal harina. Lajwi watx'ji el is ca makanil yuj, max yaon aytok no chibej tu' bay yul jun motx, axa is yal no' max yaaytok yul jun xij, max yiontok bay yich te ji' tu'.

²⁰ Cax max yalon Cham yángel Jehová tu' bay axca ti': Aay no chibej tu', yetok ixim pan c'am yich tu' yiban jun ch'en ch'en ti', cax cha tz'anon ay is yal no' tu' yiban, ẍi Cham. Cax max yiken Gedeón masanil tzet max al-lay tu'.

²¹ Axa Cham yángel Jehová max tenoc txam is k'okoch yin no chibej tu', c'al yin ixim pan, cax max ajol k'ak'ej yul ch'en miman ch'en tu', cax max tz'aay no' chibej tu' yetok ixim pan, cax yin aymanil max c'ayaj Cham yángel Jehová tu' is satak.

²² Caytu' max yun nachaj el yuj Gedeón, tol yel a Cham yángel Jehová max k'anjab yetok, cax max yalon yin xiwc'ulalil axca ti': —Mamin Jehová, caw wal yin ac-'omba satil max in k'anjab yetok Cham ángel, ẍi Gedeón.

²³ Max yalon Jehová bay Gedeón: —Manchak ach xiwi, c'am chach oc il, man ok ach camok, ẍi Cham.

²⁴ Max watx'nen aj Gedeón jun altar bay tu' yuj yion can is bi Jehová, cax max yaon oc is bi Cham axca ti': A Jehová Cham Ak'om Junc'ulal. A jun altar tu' ayto ec' bay Ofra tinani', yul is makbej yinatil Abiezer.

²⁵ A yet jun ak'bal tu' max yal Jehová bay Gedeón: —Cheiltek junok no toro bay xol is wacax a mam, no' yet is cab yune no' is wacax tu', ukeb abil is k'inal, cax chochon ay yaltaril Baal watx'nebil aj yuj a mam, cax cha k'akon aj te te' tol ya' yili ayaj bay c'atan altar tu'.

²⁶ A bay yiban jolom ch'en miman ch'en tu' cha watx'nejcan aj altar ayin, Jehová a Diosal in. Yet wal jun bek tu', cax chak'on cam no toro tu', cax chak'on tz'aok. A te te' tol ya' yili tu', a te' chaoc yin sial, cax chak'on tz'a xajanbal tu' yiban, ẍi Cham.

²⁷ Xan max toj Gedeón yiontek lajonwan chekbej max mulnaj oc yin, cax max yiken axca max yun yalon Jehová. Palta max xiw watx'nen yet c'ualil, yuj eb yican is mam, c'al yuj eb anima bay conob tu', xan a yet ak'balil max watx'nej.

²⁸ A yet max k'inibi aj yet junxa c'ual, max yilontek eb anima aj conob tu', tol mayal uchlay ay altar yet is diosal eb chi yik Baal, c'al yetok te te' tol ya' yili ayaj bay altar tu', mayal k'aklay ajok. Max yaben c'apax eb, tzetbil tol ay jun no toro max ak'lay tz'a yin xajanbalil yiban jun ac' altar.

²⁹ Cax max k'anlen ec' eb: ¿Mac max uten jun ti'? ẍi eb. Max lajwic'al yec' eb k'anlen yabej, cax max abchajtek, tol a' Gedeón, is c'ajol Joás max uten axca tu'. Yuj tu' xan max yal eb bay Joás axca ti':

³⁰ —I eltek a c'ajol tu', cax chi co mak'on camok. ¿Tzet yuj xan max yuchay nak altar yet Baal, c'al k'akon aj nak te te' tol ya' yili bay is c'atan tu'? ẍi eb anima tu'.

³¹ Cax max tak'wi Joás bay masanil eb anima oyan oc yin tu' axca ti': —¿Tom che col jun Baal tu', cax che yak'on yowalil? Ta axca tu', camokab jun mac chi colon Baal tu', yak'ban c'amto chi sakbi elok. Ta yel tol Dios jun Baal tu', colokab ba yul yet, yujtol a' ay yet jun altar max uchlay ay tu', ẍi Joás.

³² A wal yet tu' max yak' eb anima yik Gedeón tu' Jerobaal,*fn* cax max yalon eb: Colokab ba jun Baal tu' bay, ẍi eb. Yujtol a Gedeón max ak'on ayc'ay yaltaril Baal.

³³ Max lajwi tu xin, max wajban oc ba eb madianita, yetokc'al eb amalecita, yetokc'al eb cajan bay yetc'ulal bay chi ajol c'u, max k'axpoj eb bay yul a' Jordán, cax max watx'nen aj eb is campamento bay ac'al Jezreel.

³⁴ Yin wal aymanil max oc Yespíritu Jehová yin Gedeón; a yet max xuon jun no cacho, max wajban ba eb yinatil Abiezer yetok.

³⁵ Max yaon c'apaxtok is chekbej bay eb is tribual Manasés, ta chi yaoc ba eb nak tu' yetok eb, yetok c'apax eb is tribual Aser, c'al yetok yet Zabulón c'al yetok yet Neftalí.

³⁶ Max yalon Gedeón bay Dios: Ta wal yel ayin chin a k'anbalnej yet cha colon el conob Israel, axca wal alon ti', tx'ox junok yechelej ayin.

³⁷ A tinani', ok wacan ay jun no tz'umal calnel tol pim is xil, bay yul tec'bal trigo. Axa yet k'inib yecal xin, ta caw wal ch'acan no tz'um tu', axa pax bay sat tx'otx' bay yinlak no', caw wal takin, axca tu' ok yun wojtaknen elok, tol yel ayin ok in a k'anbalnej yet ok a colon el a conob Israel, axca max yun aloni, ẍi Gedeón.

³⁸ Axca wal max yun yalon tu', caytu' max yunej. A yet max aj wan yet max sakbi, max yatz'on el Gedeón tu' yal no tz'um, jun wal sec' aej max el yin no'.

³⁹ Max yalon Gedeón junelxa bay Dios: C'amokab chi tit yowal a c'ul win Mamin, yujtol chin awji oc en. Ayto wal junxa yechelej chi wochej chi wojtaknej waloni. A yet junelxa ti', axa sat tx'otx' chi ch'acay el yuj yal ak'bal, axa pax no tz'um xin, junelnej tol takinokab no', ẍi cham.

⁴⁰ Axca wal yalon tu', caytu' max yut Dios yet junxa ak'bal tu'. A yet max sakbi elok, caw wal takin no tz'um tu', axa pax sat tx'otx', caw wal tol ch'acan yuj yal ak'bal.