Eb Juez 5 - A Txꞌan Biblia Yin Kꞌanjobal 1989

Is bit xal Débora yetok cham Barac

¹ A wal yet tu', max bitnej xal Débora jun is bit yetok cham Barac, is c'ajol Abinoam:

² Bitnejek is mayk'ak'al Jehová, yujtol wal yel ay eb yajawil conob israel bekan c'ul toj yin owal, ay c'apax eb soldado bay co conobal ti' max tak'wi toj yin owal.

³ ¡Abek tzet ok wal ayex rey ex ti'! ¡Abek ayex yajaw ex ti', tol chin bitni bay Jehová! ¡Tol chin bitnej co Diosal ayon conob Israel on ti'!

⁴ A yet max cach el bay Seir Mamin Jehová, yet max cach el bay tx'otx' Edom, caw wal max bil tx'otx' tx'otx', max a bekon c'apax aytek nab.

⁵ A a satak Mamin Jehová co Diosal, caw wal max bilaj witz, max bilaj witzal Sinaí.

⁶ A yul is tiempoal Samgar, is c'ajol Anat, c'al yul is tiempoal ix Jael, masanil eb ec'jabwom majxa ec' eb bay yul-lak mimek be, axac'al bay q'uexbelak max ec' eb.

⁷ Masanil lanchual mulnajbal bay eb israel max can tz'inanok. Axa yet jun tiempoal tu' max in aj can, ayin Débora in ti', max in oc yin txutxejal xol conob Israel ti'.

⁸ A yet tu' max sayic' eb jet conob tx'ok diosal, xan max apni oc owal bay puertail-lak co conob. C'am makbal julbalej, tamwal lanza max jil xol 40,000 soldado jet israelal.

⁹ A wanimail, axq'uijan tol ajun yetok eb yajawil in conob, c'al yetok eb conob bekan c'ul toj yin owal tu'. Jiek aj can is mayk'ak'al Jehová.

¹⁰ Alek tzet max yun Jehová ex mimek winak, ex chex ajtok yiban no sakyin burro, manxa watx'ilok tz'am ayajok. Alek c'apax ayex tol chex bey ti'.

¹¹ Caw wal najat chi bey nuk' son e yuj, c'al platillo baytak ay a' uc'bala'. Che yion aj can Jehová, yujtol mayal ak'lay lajwok eb jajc'ul yuj Cham, c'al yuj eb mulnajwom cajan bay aldealak yul co nación ti'. Catatu' max je' co meltzoj aytek ayon conob on Jehová ti' bay cajan on junjun on.

¹² Ach Débora, ikbajwom yin bit xol anima, cax chi oc tzakan eb entak. A pax ach Barac, c'ajol Abinoam, asi', cax cheontok eb preso yayji oj.

¹³ Max lajwi tu', cax max ayol eb yajawil eb co conob yak'on owal. Max ayol is soldado Jehová yak'on owal yetok eb soldado tec'an.

¹⁴ Max ay c'apax ul eb yet is tribual Efraín bay ac'al. Babel max ay c'apax ul eb yet is tribual Benjamín. Max ay c'apax ul eb capitanil eb is soldado Maquir, c'al eb ikbajwom xol conob yet Zabulón.

¹⁵ Max oc pax eb yajawil conob yet is tribual Isacar colwajwomal bay xal Débora. Eb is tribual Isacar tu', max oc pax eb yipomalok cham Barac, max toj lemnaj eb yetok yin owal bay jobe. A eb xol is tribual Rubén ayoc eb yin cabc'ulal.

¹⁶ ¿Tzet yuj xan max ex cancan bay chi makay no calnel, cax che yaben yul is nuk' eb nak ilom calnel yet chi yawten eb nak no'? Wal yel, a xol is tribual Rubén ay cabc'ulal.

¹⁷ Axa pax eb aj Galaad xin, max cancan eb bay k'axepal ec'tok a' Jordán. Axa pax yinatil Dan, max cancan bay c'atan bay ay te barco, axa pax bay is ti a' mar, max cancan is yinatil Aser, cax majxac'al jitz el ba eb bay cawilal puerto.

¹⁸ Axa bay chi oc owal max toj yinatil Zabulón, c'al yinatil Neftalí, max bekxac'al eb is k'inal yul k'ab camich.

¹⁹ Max lajwi tu', max jayoc eb reyal eb cananeo bay Taanac, bay is cawilal a' Meguido, cax max jayoc eb reyal cananeo yak'on owal yaloni, palta c'amc'al ch'en plata, tamwal beyomal max yi eb.

²⁰ A tac'al bay satcan, c'al is bealak bay satcan tu' max yak' waycan owal yetok cham Sísara.

²¹ A a' aej Cisón, a' payxail aej, max ikon bey eb masanil. Max co tec'on ay eb caw wal ay yip.

²² Caw wal max bil yayc'ay yakan no chej, yet max toj lemnaj no' yin owal.

²³ Max k'anjab cham yángel Jehová: Titokab yowal c'ul Jehová yiban conob Meroz; titokab yiban masanil eb winak bay tu', yujtol maj colwaj eb yetok Jehová yin owal, axca eb soldado a' ijan, ẍi Cham.

²⁴ Watx' yet Jael, ix yistzil cham Heber quenita, yintak masanil eb ix ix. Watx' yet ix yintak masanil eb ix cajan yulak mantiado.

²⁵ A yet max k'anon cham Sísara yuc' aej, leche max yak' ix Jael tu' yuq'uej, cax max yak'on crema is lobejok bay yul jun sec' tol manxa watx'ilok.

²⁶ Max yion aj ix jun te estaca yetok is q'uexan k'ab, cax max yion aj ix te mak'bal ay estaca tu' yetok is watx' k'ab. Max lajwi tu' max mak'on aytok ix te' bay yul is jolom cham, max k'axpoj aytok te' bay yul tx'otx'.

²⁷ Toxac'al max ec' balbon cham bay yakantak ix Jael yuj is yail. Caytu' max yun yel jaban camilok.

²⁸ Caw wal tacnakxac'al is c'ul xal is txutx cham Sísara yet max eltek t'anan bay wentenail is yatut. Max yaloni: ¿Tzet yuj xan caw wal chi ec' is tiempo bey yul carruaje? ¿Tzet yuj xan chi mayji jayoc is carruaje tu' yin owal? ẍi xal.

²⁹ Max tak'wi junok eb ix aj nabal ayic' bay is c'atan xal txutxej tu'. Ac'ala', axca tu' max yun naon c'apax xal txutxej tu', max yalon eb axca ti':

³⁰ Tol mi lanan pojon ec' eb jantak tzetak yetal max yi' eb yin owal tu'. Lanan mi sic'len eb nak jun junok eb ix ix chi yi', ma xin catakwanok eb ix yet junjun eb nak, ma xin, a mi wal an pichilej caw wal tol watx' chi sic'lej Sísara tu'. A mi wal an caw wal watx' yoc is yelbub bay junjun paq'uil chi sic'lej, yet watx' ok yaoc eb yin is nuk', tutun tol max ayc'ay yuj xin, ẍi mi eb.

³¹ Axcaokab tu' chi yun c'ayil eb ajc'ul oc en Mamin Jehová. Lajanokab eb mactaktxel chach ocheni, axca wal jopopial yakan c'u yet chi ajolok, ẍi xal Débora, c'al cham Barac yin is bit. A yet max lajwi jun owal tu', c'amxa owal yin cawinak abil.