Eb Juez 3 - A Txꞌan Biblia Yin Kꞌanjobal 1989

Juntzanxa conob max cancan bay tx'otx' Canaán

¹ A ton juntzan conoblak tu' maxto cancan yuj Jehová bay tx'otx' Canaán, yet watx' chi ak'lay porobal eb israel, a ton eb c'amto chi alji yet max oc owal, yet max ayc'ay tx'otx' Canaán tu'.

² Max cancan juntzan conob tu' yuj Jehová, yet watx' chi cuyba eb c'amtoc'al bay max oc yin owal junelok.

³ Oyeb conobal eb filisteo max cani, yetok masanil eb cananeo, eb sidonio, c'al yetok eb heveo, a ton eb max ec'lej cajan bay siquilal tx'otx' Líbano, chi tojtac'al bay jolom witz Baal-hermón, masantac'al bay chon octok bay Hamat.

⁴ A yuj juntzan eb tu', xan max ak'lay porobal eb israel yuj Jehová, yet watx' chi yil Cham, ta chi yikej eb masanil chekbanilej max cheklay yal Moisés yuj Cham bay yichmam eb.

⁵ Caytu' max yun yayji ec' eb israel xol eb cananeo, eb heteo, eb amorreo, eb ferezeo, eb heveo, c'al xol eb jebuseo.

⁶ Axa is c'ajol eb, c'al is cutz'in eb israel tu', max yilej aj ba yetok is c'ajol, c'al is cutz'in eb conoblak tu', axa yoc eb ayilal bay is diosal eb tu'.

A Otoniel max colon eb israel bay Cusan-risataim

⁷ Caw wal yob tzet max yun eb israel satak Jehová is Diosal eb, yujtol max tojcan Cham c'ayc'ulal yuj eb, axac'al bay yechel Baal, c'al bay yechel Astarté max oc eb ayilal.

⁸ Yuj wal tu', max tit yowal c'ul Jehová yin eb, xan max alay oc eb yuj yul k'ab Cusan-risataim, rey bay Mesopotamia. Waxakeb abil max ak'lay serbil jun rey tu' yuj eb israel tu',

⁹ masantac'al max yal tewi eb bay Jehová, axa Cham max oc yetok Otoniel, xan a' max oc yin yajawilal yin colon el eb. A Otoniel tu', is c'ajol Cenaz. A Cenaz tu', is tzunan yuẍtak Caleb.

¹⁰ A Yespíritu Jehová max oc yin Otoniel, xan a' max oc is yajawilok eb israel. Max toj yin owal, axa Jehová max colwaj yetok, xan max ayc'ay Cusan-risataim yuj.

¹¹ A yet max lajwi ec' juntzan tu', max beytok eb israel yin junc'ulal yin cawinak abil masantac'al yet max cam Otoniel c'ajol Cenaz.

A Aod max colon Israel bay eb aj Moab

¹² Lajwi tu', max oc pax eb israel yunen yobtakilal satak Jehová junelxa, yuj tu' max ak'lay yipalil Eglón, reyal Moab yuj Jehová yintak eb israel.

¹³ Max junanej Eglón is nabal yetok eb amonita, c'al yetok eb amalecita, max oc eb yak'on owal yin Israel, max yion eb conobal an palma.

¹⁴ 18 abil max ak'lay serbil Eglón yuj eb israel,

¹⁵ masantac'al max yal tewi eb bay Jehová. Catatu' max yaon oc Cham junxa colwajwom, a ton Aod is c'ajol Gera, titnak yin is tribual Benjamín, tol a is q'uexan k'ab chi mulnaji. Ay jun c'ual max cheklaytok Aod tu' ak'ojcan tojlabal yuj eb israel bay Eglón, reyal Moab.

¹⁶ Axa Aod tu' max watx'nej jun is yespada tol ay ye ca paq'uil, nan metro is tel, max yaon oc yin is cincho bay yetc'ulal is watx' k'ab bay yul is pichil.

¹⁷ Max yiontok ch'en tojlabal tu' yin aymanil bay Eglón. Caw wal bak'ech jun cham rey tu'.

¹⁸ A yet mayal lajwi yak'oncan ch'en tojlabal tu' bay cham Eglón tu', max eltek yetok eb ajun yetok.

¹⁹ Palta a yet max apni oc bay juntzan yechelej bay cawilal Gilgal, max meltzoj Aod tu' bay Eglón junelxa, max yalon bay axca ti': —Ay wal jun k'anej ok wal ayach mamin rey, palta yin ewantakil ok wal ayach, ẍi bay. Max yalon cham rey bay masanil eb ayoc yin opiso bay tu', tol chi eltok eb bay yina.

²⁰ Yuj tu xin, asanxanej eb cawanil max cani, chotan ay cham rey bay yul jun cuarto siclabinak yul bay can, max jayoc Aod is cawilal, max yalon bay: —A jun k'anej ibil oc wuj ok wal ayach ti', yet Dios, ẍi. A yet max yaben Eglón axca tu', max aj wan bay is ẍila,

²¹ palta axa Aod xin, tutun q'uexan k'ab chi mulnaji, xan max yaonnajtok is q'uexan k'ab tu' bay yetc'ulal is watx' k'ab, max yion ajtek yespada, max jekontok yul is c'ul cham Eglón tu'.

²² Yetok masanil yip max jekon oc yin c'ul tu', mannejnak ch'en espada tu' max toj jeknajok, palta max tojxac'al c'apax yakan ch'en, max k'axpoj elapnok txam ch'en bay yintak, axa bak'echal tu' max makchen bay max ec'oc ch'en, xan majxa yieltek Aod tu' ch'en.

²³ Lajwi tu', max eltek Aod, max makchencan eltek puerta, max yaoncan oc llaveal.

²⁴ Axa yet mayal toj xin, catatu' max jayoc eb chi taynen cham rey tu', max yilon eb tol makan puerta. A naon eb tol max makchej cham puerta, yet chi toj cham txuljok yalon eb.

²⁵ Palta max yechbanejc'al eb xin, axa c'oli somchaj aj c'ul eb tu', yujtol c'amc'al chi eltek cham rey tu'. Axa yiontek eb llaveal puerta tu', max jakon eb, max yilon eb tol camnakxa, cax toxac'al jaban ay cham sat tx'otx'.

²⁶ Yak'ban chi ec'c'al tiempo eb axca tu', axa Aod mayal toj elajok. A yet mayal ec'tok bay ay juntzan yechelej bay Gilgal, max toj elaj bay yul yet Seirat.

²⁷ Axa yet max apni oc bay siquilal tx'otx' yet Efraín, max xuon cacho yuj wajban oc eb yet israelal. Junnejxac'al max yun yaytek eb bay jolom witz tu', babel Aod tu' yuj eb.

²⁸ Max yalon Aod tu' bay eb: Ocanek tzakan wintak, yujtol mayal yaoc Jehová eb moabita ajc'ul oc jin yul co k'ab, ẍi. Xan max toj eb yetok xin, max apni oc eb makon bay taxbal bay a' Jordán, c'amxa junok mactxel max cha' k'axpoj eb.

²⁹ A yet jun tiempoal tu' max mak'cam eb lajoneb mil eb moabita, a ton juntzan soldado caw wal tec'an waayi, c'amxa junok max elcan yin yiquisal.

³⁰ Cay wal tu' max yun yayc'ay eb yuj eb israel. Max lajwi tu' xin, c'amxac'al owal yul is makbej Israel yin 80 abil.

A Samgar max colon eb israel bay eb filisteo

³¹ A yintak Aod max colwaj c'apax Samgar, is c'ajol Anat. Max mak'cam 600 eb filisteo yetok jun chucbal wacax, xan max col-lay Israel yuj Samgar tu'.