Eb Juez 2 - A Txꞌan Biblia Yin Kꞌanjobal 1989

Max tx'ox ba Cham Yángel Jehová bay Boquim

¹ A bay Boquim max tx'oxaj ba Cham Yángel Jehová, petoj Cham bay Gilgal, max yalon bay eb conob Israel: Ayin max ex wieltek bay Egipto, cax max ex wiontek bay sat tx'otx' tx'otx' bay max wak' in ti' wak'on bay eb e yichmam, cax max waloni, tol c'am bak'in ok c'ayil jun in trato max wak' e yetok ti',

² asan tol c'amc'al junok trato che watx'nej yetok eb anima cajan bay sat tx'otx' tx'otx' bay cajan ex ec' ti', tol che c'ayil yaltar eb bay chi txajli, palta ayex ti', c'am che yikej. ¿Tzet yuj xan che yun jun ti'?

³ Yuj tu' xan chi walcan ayex, tol man ok wiel juntzan conob ti' e xol, asan ajc'ulal ok ayjok e xol yetok eb, c'al e yayc'ay yuj is diosal eb, ẍi Cham ángel tu'.

⁴ Max lajwi k'anjab Cham ángel tu', cax masanil eb conob max ok'aj eb yin ipejal,

⁵ yuj tu' xan Boquim *fn* max yikcan jun lugar tu'. Max yak'on eb xajanbal bay tu' bay Jehová.

Is camichal cham Josué

⁶ Ayxatax k'anjab can cham Josué bay conob Israel tu', cax atax yet tu' max tojcan junjun eb bay is satak chabilxa yuj.

⁷ Yikemc'al eb conob yoc yin ayilal bay Jehová yak'ban ayto ec' cham Josué tu', yetokc'al eb yicham winakil conob tzunanxa max camtok yintak cham, a ton eb cham max ilon tzetak yetal c'ayubtak max yun Jehová yuj is watx'ilok conob Israel tu'.

⁸ 110 abil is k'inal cham Josué is chekbej Jehová yet max cami.

⁹ A tu' max mukay bay is satak bay tx'otx' Timnat-sera bay sataktok is witzal Gaas, bay siquilal tx'otx' yul yet Efraín.

Max yiel ba eb israel yin Jehová

¹⁰ Max cam c'apaxtok eb anima max ec' yetok Josué. Axa eb max alji yinxac'al tzunanil tu', manxa yojtakok eb Jehová, cax majxa yil eb tzet yetal tol c'ayubtak max yun Cham yuj is watx'ilok eb.

¹¹ Yuj tu xin, axac'al masanil yobtakil max yun eb conob Israel satak Jehová. Max oc eb yin ayilal bay comon dios chi yik Baal.

¹² Max yixac'al el ba eb yin Jehová Diosal is yichmam eb, Cham max ion eltek eb bay Egipto. Max oc eb yin ayilal bay is diosal eb anima cajan bay yinlak eb tu'. Max tx'emontek eb yowal c'ul Jehová,

¹³ yujtol max beklaycan Cham yuj eb, axac'al bay comon dios Baal, c'al bay Astarté max oc eb ayilal.

¹⁴ Yuj wal tu xin, caw wal max tit yowal c'ul Jehová yin eb, max beklay eb yuj bay yul is k'ab eb ajc'ul, cax max elk'anelaytok is tzetak yetal eb, majxac'al je' colon ba eb bay eb ajc'ul tu'.

¹⁵ A yet chi toj eb israel tu' yak'on owal yin eb is yajc'ul, max alay oc eb yul k'ab eb ajc'ul tu' yuj Jehová, axca max yun yalon Cham. Yuj tu' caw wal ok'bal c'ul max yun eb.

¹⁶ Caw wal chi etax eb israel yuj is yajc'ul junjuntak el, xan max yiaj wan Jehová juntzan is colomal eb, yet chi col-lay el eb yul k'ab eb elk'om tu'.

¹⁷ Palta majc'al yikej eb bay eb max aj wan colwaj yin eb tu' yuj Jehová, c'am wal jabok max yikej eb bay Cham. A ti' yet eb, tol ayc'al oc eb yin ayilal bay comon dios. Max yionxac'al el ba eb yintak beybal eb is yichmam eb, tol max yikej eb tu' bay is chekbanil Jehová.

¹⁸ Junjuntak c'al el, chi el yaw eb yuj is yailal, yuj tzet chi utlay eb yuj is yajc'ul; axa Jehová chi ok' is c'ul yin eb, cax max yaontek jun is colwajwom eb. Yak'ban iquis ec' jun is colwajwom eb tu', ayoc Cham yetok, cax max col-lay el eb yuj bay eb ajc'ul tu'.

¹⁹ Axa max camtok is colwajwom tu xin, cax chi oc paxcan eb yin yobtakil tol yelxac'al yob yintak beybal yichmam eb, c'al yoc eb yin ayilal bay comon dios. C'am chi bekcan eb yob beybalej tu', tenomtak eb bay Jehová.

²⁰ Yuj wal tu' xan max tit yowal c'ul Cham yin eb, max naon Cham axca ti': A juntzan anima ti', caw wal c'am jabok chi yikej eb in trato max wak' yetok is yichmam eb.

²¹ A yuj tu xin, xan manxa ok wiel xol eb juntzanxa eb anima maxto cancan yuj Josué yet max cami.

²² Ok canc'al can eb, yuj wak'on porobal is nabal eb israel ti', ta chi tzakloj eb wintak, axca max yun eb yichmam eb, ma c'amak, ẍi Cham.

²³ A wal yuj tu xan, majxa yiel Jehová jantak eb anima ayic' bay xol eb conob Israel tu', a ton juntzan majto yaoc Cham yul is k'ab cham Josué, tol maxto cancan eb yuj Cham bay tu'.