Eb Juez 15 - A Txꞌan Biblia Yin Kꞌanjobal 1989

¹ Axa yet ayxataxc'al tu' yet lanan wal yoc jooj trigo, max toj Sansón yilon ix yetbi tu' yaloni, ibil oc jun no yaliẍ chiwo yuj. Axa yet max apni, max yalon axca ti': —Chi wochej chin octok wil ix wetbi bay yul cuarto, ẍi nak. Majxa chalay octok nak yuj is ni' tu'.

² Asan tol max yal bay nak axca ti': —A in naoni tol manxa ok ochej ix, xan max wak' ix bay jun nak amigo; palta ay wal junxa is nuej ix caw wal tx'ijan yintak ix etbi tu', chi je' a' ix che' etbiok, ẍi cham niej tu'.

³ Max tak'wi Sansón bay cham: —A tinani xin, c'am chi oc in mulok yuj tzet yetal ok wut eb et conob ti' yuj in pakon in ba, ẍi Sansón.

⁴ Max toj nak xin, cax max bet mitx'ontek 300 no wax, max c'alon oc junjun yuchan taj yin is ne catakc'on no wax tu'.

⁵ Max lajwi tu', max yaon oc nak is k'ak'al te', axa bekontok nak no' tu' xol ixim trigo eb filisteo tu'. Masanil ixim jobilxa aj bulanok, c'al ixim ayto oc yin yakan max tz'atok; max lajwi c'apax el an uva, c'al te olivo.

⁶ Max oc ijan eb filisteo k'anlen ec'ok, mactxel max uten axca tu', cax max al-lay bay eb, tol a Sansón max uteni, yujtol max chichon is c'ul yuj tzet max utlay yuj is ni' aj Timnat, tol max ilay ec' yistzil, cax max ak'lay bay jun is yamigo, xan max jayoc eb filisteo ul nilon tz'a ix ix tu' yetok is mam.

⁷ Max lajwi tu', max yalon nak Sansón axca ti': —Yujtol axca ti' max e yunej, xan manc'al ok in oc wanaj ex wetneni, masantac'al tol ok wican ec' in pak ayex, ẍi nak.

⁸ Max tit wal numnaj max yila', xan xiwil anima max mak'can camok, cax max toj cajay ec' bay ch'en nach'en bay Etam.

A Sansón yetok bakil yalan ti' no burro

⁹ Axa yet max yilontek eb israel xin, tol ayxa ec' eb filisteo yul yet Judá cax mayal watx'nej eb is campamento bay yac'alil Lehi,

¹⁰ cax max k'anlen eb israel ay bay Judá tu' bay eb: —¿Tzet yuj xan chex jay e yak' owal jetok on? ẍi eb. Max tak'wi eb filisteo: —Tol chi ul co mitx' nak Sansón, cax chi jaon oc yailal yin yujtol miman is mul max yaoc ayon tu', ẍi eb.

¹¹ A yet max yaben eb yinatil Judá jun tu', 3,000 eb max toj ilon nak Sansón bay ch'en nach'en ay bay Etam, cax max yalon eb bay: —¿Tom man ojtakok tol ayon oc yul k'ab eb filisteo ti'? ¿Tzet yuj xan chaoc yobal co xol yetok eb nak? ẍi eb. Max tak'wi Sansón: —C'am junokxa tzet max wunej, asan tol max wican ec' in pak yuj tzet max quin yut eb, ẍi nak.

¹² Max yalon eb bay nak axca ti': —Yuj tu' xan tol chach ul co c'altok cax chach toj jak'on bay eb nak tu', ẍi eb. Max tak'wi Sansón: —Ak'ek e ti' ayin xin tatol yel c'am chin e mak'cam ayex ti', ẍi bay eb.

¹³ Max tak'wi eb bay axca ti': —C'amak, c'amc'al chach co mak'camok, asan toc'al chach co c'altok, cax chach toj jak'on bay eb nak filisteo tu', ẍi eb. Max lajwi tu', axa c'alon eb yetok cab tx'an lasu caw wal ac' tu', max yion eltek eb bay yul nach'en tu'.

¹⁴ A yet max apni eb bay Lehi, max tit eb filisteo chawal, toxc'a chi awji eb yuj tzalojc'ulal. Ayman max oc pax Yespíritu Jehová yin Sansón yuj yak'on yipal, max nic'ontok tx'an lasu axca tz'ayil k'apej.

¹⁵ Yin aymanil max yiaj jun bakil yalan ti' burro yaxtakto yoqui. A yetok jun tu' max mak' cam 1,000 eb nak filisteo.

¹⁶ Max lajwi tu' max yaloni: Asan ch'an jun bakil yalan ti' burro max wak'balnej cax max aj cab oxeb bulan camnak wuj, Yujc'al ch'an jun bakil yalan ti' burro, jun mil eb winak max in mak' camok. ẍi.

¹⁷ Max lajwi tu', max bekon ay jun bakil ti' no burro tu'. Yuj tu xin, a jun lugar tu', Ramat-lehi max yikcanok, (chi yal elapnok tzalan bakil yalan ti' no no').

¹⁸ Caw wal max tak is ti' Sansón, yuj tu' xan max yawtej Jehová yetok, max yalon bay: ¿Tzet max yun ak'on wip yet max ayc'ay eb nak tu' wuj, chi lajwi tu', cax chin a chaon cam yuj takintial yul is k'ab juntzan tx'ok conobal ti'? ẍi Sansón.

¹⁹ Max lajwi tu xin, max jakon Jehová jun uc'bala' bay Lehi tu', max yuq'uen Sansón a' aej chi ajol tu', caw wal max oc yip max yabej. Yuj tu xin, a jun a' yaliẍ aej tu', masantac'al tinani' En-hacore yoc is bi. (Chi yal elapnok yuc'bala' mac chi aj yaw).

²⁰ Junc'al abil max oc Sansón yajawilalok eb israel, yak'ban ayoc eb yul k'ab eb filisteo.