Eb Juez 11 - A Txꞌan Biblia Yin Kꞌanjobal 1989

Cham Jefté

¹ A yet tu', ay jun winak chi yik Jefté. Caw wal watx' yin ak'oj owal yul yet Galaad, yune' jun ajmul ix yetok jun winak chi yik Galaad.

² A pax xal, a caw yistzil cham Galaad tu xin, ay c'apax yune' max yila'. A yet max ch'ibaj eb nak tu', max uktelay el Jefté yuj eb nak bay na tu'. Max yalon eb, tol c'am yalon yet yin satakej, yujtol tx'ok yel is txutx.

³ Caytu' max yun yelaj Jefté bay eb yuẍtak tu', max tojcan bay yul yet Tob. A bay tu' max waj jun bulan isaj winak. A eb tu' max oc yetok yin yunen mitz'winakil.

⁴ Max ec'c'altok jun tiempoal xin, max oc eb amonita yak'on owal yin eb israel.

⁵ Yuj tu', a eb yajaw bay Galaad max chek eb toj tit Jefté bay yul yet Tob.

⁶ Max yalon eb axca ti' bay: —Titan cayti', chi yochej co c'ul tol ach chach oc co yajawilok yin ak'oj owal yin eb amonita, ẍi eb.

⁷ Max tak'wi Jefté axca ti': —Ayex ti' max e yak' yobc'ulalil win, max e yak'xac'al pural quin e yukten el bay yatut in mam, xan ¿tzet yuj xan chex jayoc quin ul e sayon ec' yet ayex oc yin e cawxinakil? ẍi Jefté.

⁸ —A ton yuj ayon oc yin cawxinakil ti', xan chon jayoc ach ul jila'. Tutun wal chi jochej chach toj jetok, ach wal ok ak' owal yetok eb amonita, cax ach chach oc co yajawilok co masanil on cajan on bay Galaad ti', ẍi eb bay.

⁹ Tatol che yochej ayex ti' chin meltzoji, cax chi wak'len owal yetok eb amonita, cax ta ok oc Jehová wetok yet ok ayc'ay eb wuj, ¿ok mi wal in oc e yajawilok chi yal tu'? ẍi Jefté bay eb.

¹⁰ Axa eb yajaw tu' max alonxac'al axca ti' bay: —A Jehová ayoc testigoal jin, tol ok jun axca chal tu', ẍi eb.

¹¹ Catatu' max toj Jefté yetok eb, max yaon oc eb is yajawilalok. A bay Mizpa max cayic'nej Jefté yalon junelxa satak Jehová tzet yetal maxax yal bay eb chekbej tu'.

¹² Lajwi tu', max chekontok Jefté juntzan eb chekbej bay cham reyal Amón, yet chi k'anlej eb bay axca ti': ¿Tzet yuj xan aytek yowal e c'ul jin, xan chex jayoc e yak' owal jin? ẍitok cham.

¹³ Max paktzen cham reyal eb amonita bay eb is chekbej cham Jefté axca ti': A yet max ex el ayex israel ex ti' bay Egipto, max e yiec' co tx'otx', max tojtac'al bay a' aej Arnón, masantac'al max apni oc bay a' Jaboc c'al bay a' Jordán. A tinani xin, ak'ek meltzoj tx'otx' ayon yin watx'c'ulalil, ẍi cham.

¹⁴ Lajwi tu' max chekontok cham Jefté juntzanxa eb chekbej bay is reyal eb tu',

¹⁵ yet chi toj yalon pax eb axca ti': Caywal ti' max yun paktzen cham Jefté axca ti': Ayon israel on ti', c'am e tx'otx' max jiec'ok, tamwal bay eb moabita, tamwal ayex amonita ex ti'.

¹⁶ A yet max on eltek bay Egipto, a bay takin tx'otx' max on titc'al, masantac'al max yal co jayoc bay a' Cakyin Mar, max on apni oc bay Cades.

¹⁷ Max co chekontok juntzan eb co chekbej bay reyal Edom, tol chon is cha ec'tok bay yul is tx'otx', palta yel wal maj yal c'ul eb max on ec'tok. Ac'ala' max jalon c'apax bay reyal Moab tol chon is cha ec'tok bay yul is tx'otx', palta maj yal c'apax c'ul. Yuj tu' xan max on canc'al bay Cades.

¹⁸ Lajwi tu xin, max on ec'c'al bay takin tx'otx', max bet joyonc'al co ba bay yinlak is tx'otx'al eb Edom, c'al yinlak yet eb Moab, masantac'al max yal japni oc bay yichcanil Moab. Max on ayji ec' bay tu' bay junxa k'axepaltok a' Arnón. Palta maj on k'axpoj ec'ok, yujtol a bay tu' chi chail yich is tx'otx'al eb Moab.

¹⁹ Xan max jatok co chekbej bay Sehón, is reyal eb amorreo, bay yul yet Hesbón, max jalon c'apax bay tol chon is cha ec'tok bay yul is tx'otx'al, cax chon apni oc bay co tx'otx'al on, con chitok bay.

²⁰ Palta maj cha yab Sehón tu', maj cha yabej, maj on is chaic'tok bay yul is tx'otx'. Axa max yunej, tol max wajbaj oc masanil is soldado, max toj watx'nen aj is campamento bay Jahasa, max oc ijan yak'on owal jin.

²¹ Palta axa Jehová co Diosal ayon israel on ti', max bekon oc eb yul co k'ab, xan max ayc'ay eb juj. Caytu' max yun jioncan is tx'otx' eb amorreo bay jun lugar tu'.

²² Max jican masanil is tx'otx'al eb amorreo chi tojtac'al bay a' Arnón, masantac'al chi apni oc bay a' Jaboc. Chi toj c'apax bay takin tx'otx', masantac'al bay a' Jordán.

²³ Axa tinani', ¿tom chi yochej e c'ul che tok' pax ec' tx'otx' tx'otx' eb amorreo max yican ec' Jehová, max yak'on ayon?

²⁴ Ta a Quemós e diosal chi ak'on janic'ok tzet yetal ayex e sataknej, a jun tu' che yaloc e yetok, ¿man mi yelok axca tu'? Cayton c'apax tu', a tzet max yak' Jehová co Diosal ayon, a ton chi jaloc jetok.

²⁵ ¿Tom cha na' tol yelxac'al watx' ach yintak Balac, is c'ajol Zipor, reyal Moab? Tokwal max yak' owal jetok yuj jun tx'otx' ti'.

²⁶ Ayxa 300 abil co cajay on bay Hesbón, bay Aroer, c'al yetok bay juntzan aldealak cawilal tu', yetokc'al masanil juntzan conoblak ay bay is tilak a' Arnón. ¿Tzet yuj xan ato tinani' che yak' yowalil ayon yuj jun tx'otx' tu'?

²⁷ Ayin ti', c'am junok tzet yetal yob chi wun ayach. Palta ach ti', yob tzet chonej, chach jayoc ul ak'on owal jin. Palta xin, a Jehová juez yayji jiban on, a ok on beyc'ulnen el ayon israel on ti', c'al ayex ti', ẍitok cham Jefté.

²⁸ Caxc'al mi axca tu' yoqui, palta maj cha' yab eb tzet max yaltok cham Jefté.

Max yak' cham Jefté is ti'

²⁹ Catatu xin, max oc Yespíritu Jehová yin cham Jefté, caytu' max yun yec' bay yul yet Galaad, c'al bay yul yet Manasés, max ec' c'apax bay Mizpa yul yet Galaad tu', max toj yak'on owal yin eb amonita.

³⁰ Max yak' cham Jefté is ti' bay Jehová: Tatol ok ak' eb amonita yul co k'ab,

³¹ ayin ok wak' tz'a yin xajanbalil ayach, mactxel babel ok eltek in ul chaon bay watut, yet ok in meltzoj yin owal ti', ẍi cham.

³² Max toj Jefté yin eb amonita, cax max ayc'ay eb yuj, yuj colwal Jehová.

³³ Xiwil eb ajc'ul tu' max cam yuj cham Jefté, 20 conob max yak' ayc'ay cham Jefté bay nan xol Aroer, bay Minit, c'al bay Abel-keramim. Caywal tu' max yun yayc'ay eb amonita yuj eb israel.

³⁴ Axa yet max meltzoj cham Jefté bay yatut bay Mizpa xin, a ix jun c'otan is cutz'in cham, max eltek ul chaoni, cax chi canalwi ix, lanan txijon pandereta yet max eltek. Asannej ix, c'am junok is c'ajol cham.

³⁵ A wal yet max eltek ix tu', cax max tzilontok cham is pichil yuj tx'oxon elok tol ay is cusc'ulal, max yaloni: —¡Ay… ach in cutz'in! ¡Caw wal ya' chi wab oj! Ach wal max etek jun yailal ti' wiban, yujtol max wak' in ti' bay Jehová, xan a tinani', yowalil ok wikej bay max wak' in ti' tu', ẍi cham.

³⁶ Max tak'wi ix bay: —Mam, yunokab win bay max ak' a ti' bay Jehová, yak'ban tol mayal ayc'ay eb amonita yuj Cham.

³⁷ Asan xin, chin k'an ayach, tol chak' cabokxa xajaw ayin yet chin toj ec'jab yetok eb ix wet k'opojal bay jolomlak witz, yet chin ok' yetok eb, yujtol yowalil ok in cam yet c'amto chin nupayi, ẍi ix.

³⁸ Max yak' cham Jefté cab xajawxa tu bay ix. A yet jun tiempoal tu', max toj ix bay jolomlak witz yetok eb ix tu', max ok' ix, yujtol ok cam ix yet manto nupayok.

³⁹ Max lajwi cab xajaw tu xin, axa meltzoj ix bay ayic' is mam tu'; max yak'on cham Jefté yun bay max yak' is ti' bay Jehová, caytu' max yun cam ix cutz'in cham Jefté yin tol c'amtoc'al junok winak max yilej.

⁴⁰ Yuj tu' max ocxac'al is beybalok eb israel, tol junjunc'al abil chi wajon ba eb ix k'opoj yok'i yin caneb c'ual, yuj nalaytek ix cutz'in cham Jefté.