Eb Juez 10 - A Txꞌan Biblia Yin Kꞌanjobal 1989

Max yak' cham Tola c'al cham Jair yajawil

¹ A yet mayal camtok Abimelec, ay jun winak yin is tribual Isacar chi yik Tola, is c'ajol Fúa, is yitxiquin Dodo. A jun tu' max colwaj yin eb yet israelal. A Tola tu', a tu' max ayji bay Samaria, bay siquilal tx'otx' tol yet Efraín.

² 23 abil max yak' yajawilal xol eb israel, masantac'al yet max cami, max mukon eb bay Samir.

³ Max lajwi tu' max yak' Jair aj Galaad yajawilal xol eb israel yin 22 abil.

⁴ A Jair tu', ay 30 is c'ajol, junjunc'al eb c'ajolej tu', yibanc'al burro chi ec' eb, ay junjun is conob eb bay yul makbej Galaad. A jun 30 conoblak tu', chito binaj tinani': A juntzan conoblak yet Jair, ẍi.

⁵ A yet max cam Jair tu', a tu' max mukay bay Camón.

Chi etax eb israel yuj eb amonita

⁶ Max oc pax eb israel yunen yobtakil satak Jehová junelxa, cax max c'oli yoc eb ayilal bay satak juntzan yechel Baal, c'al Astarté, c'al bay is diosal eb ti': eb aj Siria, aj Sidón, aj Moab, aj Amón, c'al yet eb filisteo. Caywal tu' max yun bekoncan eb Jehová Dios, cax majxa oc eb yin ayilal bay.

⁷ Yuj wal tu' xan max tit yowal c'ul Jehová yin eb, max alay oc eb yul k'ab eb filisteo, c'al yul k'ab eb amonita; a yet jun abil tu' max ayc'ay eb israel yuj eb.

⁸ 18 abil max oc eb yul k'ab eb, max oc ijan eb yetnen eb israel cajan bay Galaad bay junxa k'axepal ec'tok a' Jordán, bay is tx'otx'al eb amorreo.

⁹ Max k'axpoj ec'tok eb amonita bay a' Jordán yin yak'on eb owal yin eb yinatil Judá c'al yin eb yinatil Benjamín, c'al yin eb yinatil Efraín. Yuj tu xin, max yilon eb israel tol yelc'ulalxac'al chi etnelay eb.

¹⁰ Catawal tu' max k'anon eb colwal Jehová yetok, max yalon eb axca ti': Ach co Diosal, caw wal max oc co mul ayach, max ach co bekcanok, axac'al bay Baal max on oc yin ayilal, ẍi eb.

¹¹ Max yalon Jehová bay eb axca ti': Max ex etax yuj eb aj Egipto, yuj eb amorreo, yuj eb amonita, yuj eb filisteo,

¹² yuj eb sidonio, yuj eb amalecita, c'al yuj eb amonita, axa yet max aj e yaw ayin, max ex in colilok.

¹³ Caxc'al mi axca tu' max wutej, palta max in e bekcanok, yuj e yoc ayilal bay juntzanxa dios, yuj tu' xan a tinani', majxa in colwaj e yetok.

¹⁴ Asek k'anek colwal juntzan dios ayoc yipok e c'ul tu', aokab chi colwaj e yetok yet ayex oc yin cawxinakil axca ti', ẍi Cham.

¹⁵ Yuj tu xin, max tak'wi eb israel bay Jehová axca ti': Caw wal yel max oc co mul on ayach, palta tinani', chi je' cha watx'nej tzet chi cha a c'ul jin on, palta asan tol chon a col tinani', ẍi eb.

¹⁶ Max mak'on poj eb jantak is diosal eb tx'ok conobal, yet chi oc pax eb yin ayilal bay Jehová. Yuj tu xin, maj techaj yuj Jehová, tol toc'al max il-lay oc eb yuj yet lanan yaben eb yailal.

¹⁷ Max wajban oc ba eb amonita bay Galaad, axa pax eb israel xin, max wajbaj c'apax oc ba eb bay Mizpa.

¹⁸ A eb yajaw yayji oc xol masanil eb israel cajan bay Galaad max yaloni: ¿Mac mi txel junok chon ikban oc yin owal yin eb amonita? A wal jun tu' yajaw ok yuncan co xol bay Galaad ti', ẍi eb.