Eb Juez 1 - A Txꞌan Biblia Yin Kꞌanjobal 1989

Yayc'aybal Adonibezec

¹ Axa max yun xin, a yet mayal camtok Josué, a masanil eb yet israelal, max k'anlej eb bay Jehová, mac tribual babel ok oc yin yak'on owal yetok eb cananeo.

² Max tak'wi Cham, max yaloni tol a tribual Judá chi oc yak'on owal yin babelal, tol a bay ok ak'lay tx'otx'.

³ Yuj tu' xan a eb aj Judá max yawtej eb is yet conob, a ton eb yinatil Simeón, yet chi junanen ba eb, yin yion ec' eb tx'otx' tx'otx', cax ok yi' Judá tu', ok lajwok tu', cax ok yion pax ec' eb tx'otx' ok yi' pax Simeón. A eb yinatil Simeón tu', max cha' c'ul eb junanen ba yetok eb yinatil Judá.

^4-5 Caytu' max yun yak'on eb owal yetok eb cananeo, c'al yetok eb ferezeo, yujtol a Jehová max aon oc eb yul k'ab eb. A bay Bezec max ayc'ay lajoneb mil eb yuj eb. A c'apax jun cham Adonibezec, reyal Bezec xol eb max ak'wi owal tu'.

⁶ Caxc'al mi max elaj cham, palta max tzakloj eb israel yintak, masantac'al max yal michchaj yuj eb, max c'upil eb txutxal yiximal k'ab, c'al txutxal yiximal yakan.

⁷ Yuj tu xin, max yaloni: A yet yalantok, max wiel txutxal yiximal k'ab, c'al txutxal yiximal yakan 70 rey, max ayji ec' eb sic'on aj c'ajil loj yalan in meẍa. Palta a tinani' xin, lajan wal chin yut Dios axca max wut eb tu', ẍi. Max yiontok eb Adonibezec tu' bay Jerusalén, axa bay tu' max cami.

Yayc'aybal Jerusalén c'al Hebrón

⁸ A eb is tribual Judá max oc yak'on owal yin conob Jerusalén, cax max yion eb. Max tzoc'on cam eb masanil anima, max yak'on tz'a eb conob tu'.

⁹ Max lajwi tu', max oc pax eb yak'on owal yin eb cananeo, a ton eb cajan bay siquilal tx'otx', bay yul is makbej Néguev, yetokc'al bay ac'al-lak.

¹⁰ Max oc c'apax eb yak'on owal yin eb cananeo bay conob Hebrón, ac'al oc chi ikon c'apax Quiriat-arba yet payxa, cax max ak'lay cam Sesay, Ahimán c'al Talmai yuj eb.

Yayc'aybal conob Debir

¹¹ Ayman max oc eb yak'on owal yin conob Debir, ac'al oc chi ikon Quiriat-sefer yet payxa.

¹² A cham Caleb max yak' is ti', tatol ay junok mac chi ak'on ayc'ay conob Debir, a bay chi yak' ix Acsa is cutz'in yistzilok.

¹³ Max ayc'ay yuj Otoniel, is c'ajol Cenaz; a Cenaz tu' is tzunan yuẍtak Caleb, xan max yak' cham Caleb tu' is cutz'in tu' yistzilok Otoniel.

¹⁴ A yet lanan toj ix yetok Otoniel tu', max yalon bay ix tol chi k'an ix junok tx'otx' bay is mam. A yet max yilon cham Caleb tol chi aytek ix Acsa yiban no burro, max k'anlen bay ix axca ti': —¿Tzet chach oni? ẍi bay ix.

¹⁵ Max tak'wi ix bay is mam: —Elok yin a c'ul chak'on a' nuk'lak aej ayin, yujtol a tx'otx' tx'otx' max ak' ayin bay Néguev, naba takin tx'otx' tx'otx', ẍi ix. Max yak'on cham Caleb tu' junxa tx'otx' tx'otx' tol ay yaejal bay yiban ajtok, c'al bay yalan aytek bay ix.

A jantak tzet max ayc'ay yuj tribual Judá c'al yuj Benjamín

¹⁶ A eb yinatil Hobab quenita, a ton is ni' cham Moisés max el eb bay conobal an palma, yetok eb tribual Judá, max toj eb cajay xol eb anima cajan bay tz'inan tx'otx' yul yet Judá bay Néguev, bay cawilal conob Arad.

¹⁷ Caytu' max yun toj eb tribual Judá, yetok eb yet Simeón, max oc eb yak'on owal yin eb cananeo cajan bay Sefat. Junelnej max yak' lajwok eb jun conob tu', yuj tu' xan max yak' eb yik jun lugar tu' Horma.*fn*

¹⁸ Max yion c'apax eb conob Gaza, Ascalón c'al Ecrón, yetokc'al is tx'otx'al junjun conob tu' yinlak.

¹⁹ Yujtol ajun Jehová yetok eb aj Judá, yuj tu' xan max je' yuj eb yak'on ayc'ay eb eb cajan bay tx'otx' siquilal tx'otx', yetokc'al eb cajyom, palta maj je' yel eb anima cajan bay ac'al yuj eb, yujtol a eb tu', ay is ch'en carruaje yet owal.

²⁰ Max ak'lay tx'otx' Hebrón bay cham Caleb, axca max yun yaloncan cham Moisés. A Caleb tu', max ion el eb is yinatil eb oxwan c'ajol Anac.

²¹ Axa pax eb tribual Benjamín, maj je' yion el eb eb jebuseo bay Jerusalén. A eb jebuseo yetok eb tribual Benjamín, junejc'al cajan ec' eb bay Jerusalén tu' tinani'.

Yayc'aybal Betel

^22-23 A eb yin yinatil José, max nabalnej el eb yak'on owal yin Betel, a ton jun conob tu' chi yik Luz yet payxa. A Jehová max colwaj yetok eb. Max chekontok eb ilom tx'otx' bay tu'.

²⁴ A eb ilom tx'otx' tu', max yil eb yeltek jun winak bay conob tu', max yalon eb bay: Tatol ach ok on a tx'ox yin, tzetbil ok yun joctok bay yul conobal ti', c'am tzet ok ach jutej, ẍi eb.

²⁵ Axa jun winak tu' max tx'oxon eb, yin tzetbil chi yun yoc eb bay jun conob tu'. Cax max tzoc'on cam eb masanil eb anima cajan ec' bay tu', palta a jun max tx'oxon eb tu', max yak' mimanc'ulal eb yin, yetokc'al masanil eb cajan yetok yul yatut.

²⁶ A jun winak tu', max toj bay is tx'otx' eb heteo, max watx'nen aj jun conob bay tu', max yak'on yik Luz, a ton is bi jun conob tu' chi binaj tinani'.

Juntzan conob maj ayc'ay yuj eb israel

²⁷ A eb is tribual Manasés, maj yuktej el eb eb aj Bet-seán, eb aj Taanac, eb aj Dor, eb aj Ibleam c'al Meguido, c'al yetok yaldeail juntzan conob tu'. Caytu' max yun canc'al el eb cananeo cajan bay tu'.

²⁸ A yet max aj wal can eb israel, axa yak'lay pural eb cananeo tu' yoc yin mulnajil yuj eb, palta maj yuktej el eb.

²⁹ Ac'ala' c'apax eb yin is tribual Efraín, maj c'apax yiel eb cananeo cajan ec' bay Gezer, yuj tu xan a eb cananeo tu' max canc'al cajan bay tu'.

³⁰ A eb tribual Zabulón, maj c'apax yiel eb, eb aj Quitrón yetok eb aj Naalal, yuj tu' xan a eb cananeo max canc'al cajan bay tu', palta max ak'lay pural eb yoc yin mulnajil.

^31-32 Ac'ala' eb is tribual Aser, maj c'apax yiel eb eb cananeo cajan bay Aco, bay Sidón, bay Ahlab, bay Aczib, bay Helba, bay Afec, c'al bay Rehob. Max cajay ec' eb xol eb tu', yujtol maj el eb yuj eb.

³³ Ac'ala' c'apax eb tribual Neftalí, maj c'apax yiel eb eb cananeo cajan bay Bet-semes, c'al bay Bet-anat, palta max ak'lay pural eb yoc yin mulnajil, xan max cajay eb xol eb bay tu'.

³⁴ Maj chalay eb tribual Dan yuj eb amorreo bay ac'al, palta asan bay siquilal tx'otx' max can eb.

³⁵ Caytu' max yun canc'al cajan eb amorreo tu' bay yich witzal Heres, bay Ajalón, c'al bay Saalbim, palta a wal yet max yion wal eb yinatil José yip xin, max ak'lay pural eb amorreo tu' yoc yin mulnajil.

³⁶ A mojonal is tx'otx' eb amorreo tu', max tojtac'al bay witzal yet Acrabim, masantac'al chi apni bay Sela, cax chi tojc'al bay yiban ajtok tu'.