Dt 9 - A Txꞌan Biblia Yin Kꞌanjobal 1989

Man yujok is watx'il israel xan max sic'lay elok

¹ Ex wet conob Israel, abek. Mayal ajapnok tiempoal yet che k'axponej a' Jordán, yet ok e yion el juntzan nación caw mimek c'al caw tec'an e yintak, mimek conob tol caw wal can yayji tel is murallail.

² A eb anima cajan bay tu', mimek tel eb, yinatil Anac eb. Max e yab yal-layi: ¿Mac wal junok chi je' tec'ban ba bay satak eb yinatil Anac? ẍi eb.

³ Ojtaknejek el tinani' xin, tol a Jehová co Diosal, a babel toj e satak axca k'ak'ej c'aywajwom. Ok c'aylayel eb c'al yilay el eb e satak. Ayex ti' ok e yiel eb e satak, cax ok e c'ayon c'al el eb yin aymanil axca wal yalon Jehová.

⁴ Manchak e na tol yuj e watx'il xan max yiel Jehová masanil eb anima ti' e satak yuj e sataknen jun tx'otx' tu'. A juntzan nación tu' ok ilay el eb e satak yuj Cham, palta yuj is yobtakil eb.

⁵ Man yujok e watx'il, tamwal yuj watx'il e beybal xan ok ex apnok cajan bay sat tx'otx' tu'. Palta yuj is yobtakil juntzan conob tu', xan ok c'aylay el eb e satak, yet watx' chi yuncan el tzet max yal Jehová bay eb jichmam, a ton bay Abraham, Isaac c'al bay Jacob.

⁶ Ojtaknejek el xin tol man yujok e watx'il xan chi yak' Jehová jun tx'otx' manxa watx'ilok tu' ayex yet chi oc e satakok, yujtol caw wal pit ex.

Max aj wan eb israel yin Jehová bay Horeb

⁷ Naektek, tojta c'ayc'ulal e yuj, tol max e tx'emtek yowal Jehová e yiban bay takin tx'otx'. Yettax max ex eltek bay Egipto masantac'al max ex jayoc bay jun lugar ti', caw wal pitc'al max e yut e ba bay Cham.

⁸ A bay witz Horeb caw wal max e tx'emtek yowal Cham, xan max yochej max ex c'aylay el yuj.

⁹ A yet max in ajtok bay jun witz tu' yuj in chaon ch'en cab jenan ch'en bay tz'ibbil oc chekbanilej, a ton is trato Cham jetok, cawinak c'u c'al cawinak ak'bal max in ayji ec' bay tu', c'am jabok tzet max in lo', tamwal ay jabok tzet max wuq'uej.

¹⁰ Max lajwi tu xin, cax max yak'on Jehová ch'en cab jenan ch'en tu' ayin. A wal caw Cham max tz'ibej oc is k'anej tu' yin ch'en, juntzan k'anej max yalcan el bay jolom witz xol xak k'ak'ej yet jun c'ual yet wajan on ec' bay tu'.

¹¹ A yet max lajwi yec'cantok cawinak c'ual c'al cawinak ak'bal tu', cax max yak'on Cham ch'en cab jenan ch'en yet trato tu' ayin.

¹² Max yalon axca ti': Paxan ay yin aymanil, yujtol a jun conob max eiltek bay Egipto mayal yetnejtok ba. Majc'al yikej tzet max wala', xan mayal watx'nej jun is diosal tol oro.

¹³ Mayal wila' tol caw wal pit jun conob ti'.

¹⁴ Jitzil a ba in satak, tol ok in c'ayil juntzan anima ti', cax chi c'ayxac'al el eb bay sat tx'otx' ti'. Asannej etok ok in watx'nej junok miman nación yin enatil, caw wal tol tec'an ok yunej cax xiwil ok yun is bisil yintak eb ti', ẍi Jehová.

¹⁵ Max in paxaytek bay jolom witz bay caw wal tol chi chaw k'ak'al tu', ibil oc ch'en cab jenan ch'en yet trato tu' wuj.

¹⁶ Axa yet max quin ayolok, max wiloni tol mayal oc e mul yul sat Jehová co Diosal, yuj max e watx'nej jun yechel wacax e diosalok. Jun wal bek max e yi el e ba yintak chekbanilej max yal Cham ayon.

¹⁷ Yuj tu xin, max in k'okon ay ch'en ch'en tu' bay e satak, max pojtok ch'en.

¹⁸ Max lajwi tu' max in ayc'al nojan satak Jehová yin cawinak c'u c'al yin cawinak ak'bal, maj inc'al lowok tamwal wuq'uen a', e yailok xan caytu' max wunej, yujtol caw wal yob tzet max e yunej, max e tx'emontek yowal Cham.

¹⁹ Caw wal tol max quin xiwajok yuj max tit yowal c'ul Jehová e yiban yet chex c'aylay el yuj. Palta xin, maxto wal yab Cham tzet max wal yet junelxa tu'.

²⁰ Max tit c'apax yowal Cham yin wuẍtak Aarón, janic'xanej maj c'aylay el yuj, palta max in k'an bay Cham yet chi ak'lay mimanc'ulalil yin.

²¹ Jun wal bek max in mak'ay weknaj jun yechel wacax tu' bay max oc e mul. Ayman max in k'oktok xol k'ak'. Max lajwi tu' cax max in chac'on pojok, max in tiẍon aytok xol a' aej chi aytek bay witz tu'.

²² Axca tu' max e yun c'apax bay Tabera, bay Masah c'al bay Kibrot-hataava. A wal bay tu' max e tx'emtek yowal c'ul Jehová.

²³ A ton yet max yalon Cham tol chex toj bay Cades-barnea, cax chi occan tx'otx' tx'otx' tu' e yetok, ac'ala' bay tu' max e ten tzet max yal Jehová co Diosal. Maj e yaoc yin e c'ul, tamwal max e yikej bay tzet max yala'.

²⁴ Atax yet max ex wojtaknen elok max c'oli wiloni tol caw wal pitc'al che yut e ba bay Jehová.

²⁵ Yuj wal tu xin, xan max yal Jehová tol ok ex c'ayilok, xan max quin ay nojan satak Cham yin cawinak c'u c'al yin cawinak ak'bal tu'.

²⁶ Max in k'anon bay Cham max waloni: Mamin Jehová, c'am cha c'ayil jun a conob ti'. Ach max a colil yetok epalil, max eon eltek bay Egipto yetok a mayk'ak'al.

²⁷ Natek eb cham a chekbej Abraham, Isaac c'al Jacob. Manchak aoc is pitalil jun conob ti' yin a c'ul, yetokc'al is yec'nakilal,

²⁸ yet watx' c'am chi yal eb anima bay max on eiltek tu': Maj je' yuj Jehová yion apnok jun conob tu' bay tx'otx' bay max yak' is ti' yak'on bay eb, asan tol max ilaytok eb yuj yet chi toj yak' cam eb bay takin tx'otx' yujtol max yajilok, ẍi mi eb.

²⁹ Ak' mimanc'ulal yin jun conobal anima ti xin, yujtol a conob yayji. Ach max eiltek bay Egipto yetok a mayk'ak'al. Axca tu' max yun walon bay Jehová.