Dt 8 - A Txꞌan Biblia Yin Kꞌanjobal 1989

Mannejnak yuj loj xan ayon ec'ok

¹ Chi cam wal e yiken masanil chekbanilej chi walcan el ayex ti' tinani', yet watx' watx' chex elocok c'al yajcan e bisil, cax ok ex octok e sataknen tx'otx' tx'otx' max yak' Jehová is ti' yak'on bay eb jichmam.

² A tinani' naektek jantak yatakil max tx'ox Jehová co Diosal ayon bay takin tx'otx' yin cawinak abil, yet chi yil Cham, c'al yak'on porobal co nabal yin tzet chi co na', ta yel chi jikej is chekbanil ma c'amak.

³ Max jil yailal c'al wajil yuj Jehová. Max lajwi tu', max yak'on maná co lobejok, juntzan loj tol man jojtakok, tamwal eb jichmam max ojtakneni. Max on yut axca tu' yet watx' chi jojtaknej elok tol man asanok yuj loj chi je' jiquisbi, palta chi je' c'apax jiquisbi yuj masanil k'anej chi yal Jehová.

⁴ A co pichil max co k'an yin cawinak abil tu' majc'al lajwok elok, tamwal max malaj jakan co beyi.

⁵ Naek wali tol axca junok mamej chi yak' cuenta yuninal, axca tu' max on yut Jehová c'apaxok.

⁶ Yuj wal tu xin, ikejek masanil is chekbanil Cham, tzaklojanek yintak, c'al ayokab yelapnok yul e sat.

⁷ Yujtol a Jehová ok ex ion apnok bay sat tx'otx' tx'otx' manxa watx'ilok; ay a' aej tol ay is nuk', c'al mimek aej chi tit bay mimek witzlak.

⁸ A bay tx'otx' tx'otx' tu' caw wal chi je' ixim trigo, ixim cebada, an uva, te higo, te granada c'al te olivo. Ay c'apax no yalcab.

⁹ A yet ayexxa ec' bay sat tx'otx' tu', c'amxa tzet ok majax aj ayex, c'amxa e bilc'ulal yuj e lobej c'al yuj junokxa tzet yetal. A xol ch'en ch'en ay bay tu' ay hierro, axa bay yinlak witz ay ch'en cobre.

¹⁰ Watx' ok ex lowok cax ok e yalon yuj diosalil bay Jehová yuj watx' tx'otx' tx'otx' ok yak' ayex tu'.

C'amokab chi toj Jehová c'ayc'ulal yuj eb

¹¹ C'amokab chi toj Jehová co Diosal c'ayc'ulal e yuj. Yowalil che yikej is chekbanil c'al is ley, c'al is cuybanil chi walcan el ayex ti' tinani'.

¹² Axa talaj chi yunej asan tol chex lowi cax nojnak e c'ul cax che watx'nen aj e na caw wal watx' bay chex ayji, chi tojcan Jehová c'ayc'ulal e yuj.

¹³ Ac'ala' yet tol caw wal watx' e wacax c'al e calnel, yetok c'apaxok, yet caw wal ayxa e plata c'al ch'en oro ayex, ta xiwilxa tzet yetal ay ayex,

¹⁴ axa talaj chi yunajok chi aj can maynejbail yin e nabal cax chi tojcan Jehová co Diosal c'ayc'ulal e yuj, Cham max on ion eltek bay Egipto bay ayon oc yin mosejal.

¹⁵ A Jehová max con ikban bay jun miman takin tx'otx' caw wal tol ay is may, bay ay no labaj caw wal ow, c'al no alacrán, bay ay takinti'al, bay c'am a' aej chi uc'layi. A Cham max ion eltek aej bay sat ch'en ch'en cax max juq'ueni.

¹⁶ Max yak'on maná co lo' bay takin tx'otx', jun loj tol maj yojtaknej el eb jichmam. Max oc yailal jiban c'al yak'lay porobal co nabal, yet watx' watx'xac'al chon eloc yuj.

¹⁷ Xe yilc'al e ba ta che yak' c'aytok e nabal che yaloni: A jantak co beyomal ti' yetok wal co mulnajil c'al yetok jipalil max jioni, ta quex chi.

¹⁸ Palta naek wali tol a Jehová co Diosal chi ak'on e nabal c'al e yipalil yet chi je' e yajcan yin beyomal, yet watx' chi yun is trato max yak' yetok eb jichmam axca ton chi jil tinani'.

¹⁹ Palta tatol ok tok Jehová co Diosal c'ayc'ulal e yuj xin, cax ok ex tzakloj yintak juntzan chi al-lay oc diosal, ok e yak'on serbil, c'al e yay nojan yin ayilal bay, ta axca tu' ok e yunej, ayin chi walcan ayex tinani', ok ex c'aylay el yuj Cham.

²⁰ Axca wal ok yun c'ayon el Cham juntzan conoblak bay ok ex apnok, axca wal tu', ok yun e c'aylay elok ta man ok e yikej tzet chi yala'.