Dt 7 - A Txꞌan Biblia Yin Kꞌanjobal 1989

Is conob Jehová sic'bil el yuj

¹ A yet ok ex yiontok Jehová bay sat tx'otx' bay max yak' is ti' yak'on ayex, a' ok ion el eb nacionlak e satak, a ton eb heteo, eb gergeseo, eb amorreo, eb cananeo, eb ferezeo, eb heveo c'al eb jebuseo; ukeb wal nación tol caw wal mimek e yintak.

² A yet ok yaon oc Cham juntzan nación tu' yul e k'ab, ok e c'ayil eb masanil, c'am che watx'nej e trato yetok eb, tamwal yok' e c'ul yin eb.

³ Manchak e mojbaj e cutz'in yetok c'ajol eb, tamwal cutz'in eb yetok e c'ajol,

⁴ axa talaj chi yunej, chi ilaytok eb e c'ajol tu' yuj eb ix bay yintak is diosal, cax chi oc eb yin ayilal bay, xan chi tit yowal c'ul Jehová, cax chex c'aylay el yuj yin aymanil.

⁵ Masanil is diosal eb bay chi txajli, c'ayek el yetok is yaltaril, c'al ch'en ch'en c'al te te' bay chi oc eb ayilal, tol ya' yili yuj eb. Masanil che yak' tz'aok.

⁶ Ayex ti' is conob ex Jehová Dios, sic'bil ex el yuj bay xol xiwil conoblak bay sat tx'otx' tx'otx' ti', yet watx' yet Cham che yuncanok.

A tzet yowalil chi yun eb israel

⁷ Tol a wal Jehová max el yin c'ul cax max ex sic'on elok, man yujok tol mimek conob ex, ilab tol jaywannej ex yintak juntzanxa conoblak tu'.

⁸ Palta yujtol ay is camc'ulal Cham e yin yet watx' chi yak' yun axca max yut yalon bay eb jichmam, xan max quex yieltek bay Egipto bay ayex oc yin mosejal, max ex yion eltek bay yul is k'ab cham reyal Egipto yetok wal is yipalil.

⁹ Ojtaknejek elok tol a Jehová co Diosal asannej oc Dios. A bay mac chi camc'ulnen Cham c'al yiken is chekbanil, chi yunc'al Cham bay chi yala' c'al ay is camc'ulal Cham yin, c'al yin eb is yinatil yet ok beyc'altok.

¹⁰ Palta chi paktzej Cham bay mac chi yajon Cham; tojolc'al c'ayil eb yuj.

¹¹ Yuj tu xin, chi cam wal e yiken masanil chekbanilej c'al cuybanilej chi walcan el ayex ti' tinani'.

Chi paktzej Cham bay eb yikem

¹² Ta yel wali che taynej e yab masanil juntzan chekbanilej ti', cax che yikeni, a Jehová co Dios ok yunc'al is trato max yak' e yetok, ok tx'oxonc'al is camc'ulal e yin, axca max yun yalon bay eb jichmam.

¹³ Ok ex camc'ulnej Cham, c'al yak'on watx'c'ulalil e yiban c'al yion aj can e bisil. Ok yak'on watx'c'ulal yiban masanil tzet ay ayex: yiban e yuninal, e trigo, e vino, e yaceite, e wacax, c'al yiban e calnel bay sat tx'otx' tx'otx' bay max yak' is ti' yak'on bay eb jichmam.

¹⁴ Ay is watx'c'ulalil Cham e yiban yintak masanil juntzanxa conoblak. C'am junok ix ix tol c'am yune' tamwal junok winak tol c'am yuninal bay yul e conobal ti', tamwal junok e jobbejal no' tol man ok uniwok.

¹⁵ A Jehová ok ex colon el bay ilya' axca wal ilya' max e yil yet ayex ec' bay Egipto. Asan yiban eb ajc'ul oc e yin ok ayc'ay ilya' tu' yuj Cham.

¹⁶ Yuj wal tu xin, yowalil tol ok e c'ayil masanil juntzan conob tu'. A Jehová co Diosal ok aon oc eb yul e k'ab, c'am chi ok' e c'ul yin eb, tamwal e yak'on serbil is diosal eb, yujtol ta c'am che yikej, ok ex ayc'ay yuj.

¹⁷ Ta che na' yin e nabal: A juntzan nación ti' caw wal miman jintak, ¿tzet wal ok yun jion el juntzan conob ti' bay sat tx'otx' tx'otx' ti'? ta quex chi.

¹⁸ ¡Manchak ex xiw bay eb anima tu'! Naektek tzet max yut Jehová eb anima bay Egipto yetok is reyal.

¹⁹ Naektek masanil juntzan yailal, c'al juntzan tzet c'ayubtak, c'al milagro, c'al is yipalil Jehová max tx'ox bay Egipto yet max con yion eltek bay tu'. Axca tu' ok yut Cham juntzan conob bay chex xiw tu'.

²⁰ A Jehová ok aontok jun miman xiwc'ulal xol eb, masantac'al ok c'ayil masanil eb okto canok, c'al eb ok c'ubaj el ba ayex.

²¹ Yuj wal tu xin, c'am chex xiw bay eb anima tu', yujtol a Jehová co Dios ayic' e nan e xol, caw wal tol ay is may Cham.

²² A Cham ok ion el juntzan nacionlak ti' e satak yin c'ojanc'ulal. Man ok c'aylay el eb yin junnej tiempoal, yet watx' c'am chi aj can no chiwajwom no' cax chex chilay yuj no'.

²³ A Jehová co Diosal ok aon oc eb anima tu' yul e k'ab, cax ok oc eb yin xiwc'ulal masantac'al chi c'ayil eb e yuj.

²⁴ A Cham ok aon oc is reyalil eb yul e k'ab, cax che c'ayon el eb, c'amxa bay ok binaj eb bay yulyibank'inal ti'. C'am mactxel ok je' tec'ban ba e satak, ok c'ayil eb e yuj.

²⁵ A is diosal eb che yak' tz'aok. Manchak e yochej oc ch'en plata c'al ch'en oro ayoc yin, cax che yiontok, yet watx' c'am chex ayc'ay yuj, tamwal e yetnentok e ba, yujtol a juntzan tu' chi yajlay yuj Jehová co Diosal.

²⁶ Yuj wal tu xin, c'am junok tzet yetal tol chi yajlay yuj Jehová che yitok bay e na, yet watx' c'am chex c'ayil yuj Cham, yujtol a masanil juntzan tu' ok c'aylay el yuj, xan yowalil che yajcan el ayex ti' c'apaxok.