Dt 4 - A Txꞌan Biblia Yin Kꞌanjobal 1989

Max alay oc nabal eb israel yuj cham Moisés

¹ A tinani' xin ex wet conob Israel, abek chekbanilej c'al ley tol ok wal ayex, yet watx' ok e yikej c'al e beybalneni, yet ok ex octok cajan bay tx'otx' tx'otx' ok yak' Jehová is Diosal eb jichmam jetok ayex.

² Man ok e yaoc tz'akil juntzan k'anej ok wal ayex ti', tamwal tol ok e yielok, palta tol ok e yikej is chekbanil Jehová co Diosal axca wal chi yun walon ayex ti'.

³ Max e yil wal tzet max yun Cham yetok eb max oc yin ayilal bay Baal bay Peor; e satak wali max c'aylay el eb yuj Cham.

⁴ A pax ayex tol max exocc'al tzakan yintak Cham, ilab tol iquis ex toc'al ec' tinani'.

⁵ Caw wal chi cam e yaben canok tol a is ley c'al chekbanilej yet Jehová co Diosal, chi walcan el ayex, yet watx' ok e beybalnej bay sat tx'otx' tx'otx', yet ok e chaon tx'otx' e satakok.

⁶ Ikejek xin, cax che yaon oc yopiso juntzan chekbanilej ti', yujtol a yuj xan aj nabal ex, c'al jelan ex satak juntzanxa nación. A yet ok yaben eb, cax ok yalon eb axca ti': Wal yel caw wal tol jelan, c'al aj nabal jun conob ti', miman nación ton wali, ẍi mi eb.

⁷ Tokwal ay junokxa miman nación ayic' is diosal yetok, axca wal yayji ec' Jehová co Diosal co xol ti', chi colwaj jetok ta chi co k'an bay.

⁸ ¿Baytal ay junokxa nación tol ay is ley c'al chekbanilej tol tojol yayji oc axca jun ley chi walcan el ayex ti' tinani'?

⁹ Yuj tu xin, ikejek cax c'ubajek yin e nabal, yet watx' c'am chi toj c'ayc'ulalil e yuj tzet max e yila', cax c'am che yiel juntzan ti' yin e nabal yet iquis ex ec' ti'. A ti' e yet tol ok e yal bay eb e yuninal c'al bay eb e yi e txiquin.

A bay jolom witz Horeb max k'anjab Dios

¹⁰ Naektek yet jun c'ual yet ayon ec' satak Jehová co Diosal bay witz Horeb, yet max yalon Cham ayin axca ti': Wajbaj oc masanil eb et conob yet watx' ok wak' yojtaknej el eb in k'anej, c'al cuyoncan eb, yet watx' ay welapnok yul sat eb yet iquis ec' eb bay sat tx'otx' ti', c'al cuyoncan eb is yuninal, ẍi Cham ayin.

¹¹ A yet tu' ayon ec' bay yich witz, axa bay yinlak witz tu' tol najat chi aj chulnaj xak k'ak' c'al yaj topopok is mubal can, k'ekk'olinakxac'al yili satcan yuj.

¹² Max k'anjab Jehová ayon bay nan xol xak k'ak'ej tu'. Max jab wal yoc yul is nuk' Cham yetok is k'anej, palta xin, asanc'al is k'anej max jabej, maj jiloc yin Cham.

¹³ Yet max yaloncan el is trato jetok, max yala' tol chi jikej lajoneb mandamiento max tz'ibej oc yin cab jenan ch'en.

¹⁴ Max yalon c'apax Jehová ayin tol chex in cuy yin is chekbanil c'al yin is ley tu', yet watx' che yikej e beybalnen bay sat tx'otx' tx'otx' ok e sataknej, k'axepal ec'tok a' Jordán tu'.

Tenchebal yet c'am chi oc ayilal bay yechelej

¹⁵ A yet max tx'oxon ba Jehová ayon bay tzalan Horeb, yet max k'anjab co nan co xol, a yet jun c'ual tu', c'am junok tzet yetal max e yil bay xol k'ak'ej tu'.

¹⁶ Naek wal tek yet c'am che yetnejtok e ba c'al e watx'nen aj junok yechelej e diosalok, yechel winak ma yechel ix,

¹⁷ ma yechel no no' ay sat tx'otx' ti', ma yechel no tz'iquin,

¹⁸ ma yechel junok no' chi ec' jutxutxok bay sat tx'otx' ti', ma yechel no txay, ma junokxa no' ay yul a'.

¹⁹ Talaj c'uxan chex aj t'anan bay satcan cax che yilon ajtok c'u c'al xajaw c'al masanil jantak waycan, c'al masanil tzet ay bay satcan tu', axa chi yunajok che yak'on ayilal bay, c'al e yak'on serbil; yujtol a Jehová Dios max watx'nen masanil juntzan tu' yuj is watx'ilok masanil conoblak cajan sat tx'otx' ti'.

²⁰ Palta a Jehová max on ion eltek bay jun conob tol axca junok horno bay chi ak'lay uljok ch'en ch'en yayji, a ton Egipto. Yet watx' conobxa Cham max juncanok, axca ton jayji tinani'.

²¹ Max tit yowal Jehová win e yujc'al ayex ti'. Max yalon Cham tol manxa ok in ec'tok bay a' Jordán, tamwal ok in apnok oc bay sat tx'otx' tx'otx' manxa watx'ilok ok yak' Cham e sataknej ayex ti'.

²² Yuj tu xin a cayti' ok in camok, manxa ok in k'axpoj ec'tok bay a' Jordán tu'. Akxa ayex ti', ok ex k'axpoj ec'tok, ok ex cajay bay jun tx'otx' manxa watx'ilok tu'.

²³ Ikejek xin, manchak toj c'ayc'ulal e yuj is trato Jehová co Diosal max yak'can e yetok. C'amokab wal junok yechelej tol chi al-lay oc diosal che watx'nej, yujtol ay yowalil yuj Cham.

²⁴ Caw wal ow Cham yin mac chi oc ayilal bay junokxa tzet yetal. Lajan wal yowal Cham axca k'ak'ej chi tz'acantok masanil tzetak yetal yuj.

²⁵ A yet ayxa e yuninal c'al e yi e txiquin, yet mimanxa tiempoal cajan ex ec' bay sat tx'otx' tu', talaj che yut e ba yin c'am nabalil cax che watx'nen aj junok yechelej e diosalok, cax che yaon oc e mul satak Jehová co Diosal, cax che tx'emontek yowal c'ul Cham.

²⁶ Chi wacan oc satcan c'al sat tx'otx' ti' yin testigoal, tatol axca tu' ok e yunej, yin wal aymanil ok ex c'ayilok. Majxa ex mayjok sat tx'otx' tx'otx' ok e yi' bay k'axepal a' Jordán tu', ok ex c'ayil yin junelnej.

²⁷ A jantak ex ok exto cancanok, chex saklemcantok xolak nación, a tu' ok ex yacantok Jehová.

²⁸ A bay tu' ok e yak' serbil comon dios tol watx'nebil yuj eb anima, te' c'al ch'en, tol c'am chi je' yilwi, c'am chi je' yabeni, c'am chi je' loon junok tzet yetal, tamwal yaben jabil.

²⁹ Ta ok na ba e c'ul yet ayex ec' bay tu xin, ok oc Cham e yetok. Ta yetok masanil e c'ul c'al e nabal chex meltzoj bay Cham, ok ex chalay yuj.

³⁰ Axa yet lajub c'ual yet ok alay oc e yailal tu', ta ok ex meltzoj bay Jehová co Diosal, cax ok e yiken bay,

³¹ man ok ex bekcan Cham. Tamwal ok ex yak' c'ayilok, tamwal ok tok c'ayc'ulal is trato max yak' yetok eb jichmam, yujtol yabenc'ulnewom ton Jehová co Diosal.

³² Naektek juntzan tiempolak mayal eq'uel yettax payxa, yettax max watx'nej Dios eb anima bay sat tx'otx' tx'otx' ti', cax chi toj e k'anlen ec' bay chi apni oc c'anan masanil yulyibank'inal ti', ta ayxa bay max uji, ma ayxa bay max ablay junok tzet yetal caw miman yelapnok axca jun chi uj co xol ti'.

³³ Tok ay junokxa conob max yab yoc yul nuk' Dios, yet chi k'anjab eltek xol xak k'ak'ej, axca wal chi yun jaben ayon ti', cax maj on cam paxok.

³⁴ Tok ay junokxa dios tol max siq'uiltek junok conob bay xol junokxa conob axca wal max con yut yion eltek Jehová bay Egipto yuj co watx'ilok. Max cam e yiloni, tol yetok mimek uchlejbail c'al xiwc'ulal, yetok milagro c'al owal, yetok wal yipal is k'ab max con yion eltek bay Egipto tu'.

³⁵ A juntzan ti' max tx'oxlay wal jila', yet chi jojtaknej wal elok tol c'am junokxa Dios, palta asannej Jehová.

³⁶ Atac'al bay satcan max jab wal k'anjab Cham con cuyoni. Axa bay sat tx'otx' ti xin, max tx'ox mimek k'ak' ayon, max jaben wal k'anjab eltek bay xol k'ak'ej tu'.

³⁷ A wal caw Cham max camc'ulnen eb jichmam, xan max sic'can elok. Lajwi tu' max on col-lay eltek yuj bay Egipto yetok wal is mayk'ak'al.

³⁸ Max yion el co satak juntzan mimek nación tol ay yip jintak, ayonxa chi co makcan is tx'otx'al eb, chi occan jetok axca wal lanan yunen tinani'.

³⁹ Yuj wal tu xin, canokab yin e nabal tol asannej Jehová, Diosal satcan c'al sat tx'otx' ti' yayji, c'am junokxa.

⁴⁰ Yuj tu' ikejek is ley c'al is chekbanil chi walcan el ayex yet jun c'ual ti', yet watx' watx'c'al ok yun e beytok ayex ti' yetokc'al eb e yinatil, cax ok najatilbok e k'inal bay sat tx'otx' tx'otx' max yak' Jehová ayex yin tojbalk'inal, ẍi cham Moisés bay conob Israel.

Juntzan conob bay chi col ba eb chi mak'wi cam anima

⁴¹ Max sic'on el cham Moisés oxeb conob bay k'axepal ec'tok a' Jordán bay yetc'ulal bay chi ajol c'u.

⁴² A bay tu' chi je' colon ba junok mac chi mak'cam junok yet animail tol man yinok c'ul max tita, c'am bay chi yak' owal yetok yet yalantok. A jun tu' chi je' colon ba bay junok juntzan conob tu'.

⁴³ A juntzan conob tu', a ton Beser, bay is pananil tz'inan tx'otx' makbil yuj eb yinatil Rubén; Ramot, bay yul yet Galaad, makbil yuj eb yinatil Gad; axa junxa xin, a ton Golán, ay yul yet Basán, makbil yuj eb yinatil Manasés.

Chi yal cham Moisés lajoneb mandamiento

^44-45 A ton wal juntzan chekbanilej ti' max yal cham Moisés bay eb yet conob. A jantak cuybanilej ley, c'al chekbanilej ti' max yal cham bay eb yettax max eltek eb bay Egipto.

⁴⁶ A tu' max yaltek bay k'axepal ec'tok a' Jordán, bay ac'al bay satak conob Bet-peor, bay tx'otx' makbil yuj Sehón reyal eb amorreo. A cham Sehón tu', a tu' cajan bay conob Hesbón, max ayc'ay yuj cham Moisés c'al yuj conob Israel yet maxax eltek eb bay Egipto.

⁴⁷ Axca tu' max yun makon eb israel tx'otx' tx'otx' makbil yuj Sehón tu' c'al tx'otx' makbil yuj Og reyal Basán yet yalantok. A eb ti' is reyal eb amorreo yayji eb bay k'axepal ec'tok a' Jordán bay yetc'ulal bay chi ajol c'u.

⁴⁸ A tx'otx' tu' chi tojtac'al bay conob Aroer bay tilak a' Arnón, masantac'al bay miman witz Sirión, ac'al oc chi yik c'apax Hermón;

⁴⁹ c'al masanil yul yet Arabá, bay is k'axepal a' Jordán, masantac'al bay a' Mar Muerto bay yich witzal Pisga.