Dt 33 - A Txꞌan Biblia Yin Kꞌanjobal 1989

Max yalcan el Moisés watx' k'anej yiban Israel

¹ A wal yet toxa chi cam cham Moisés is chekbej Jehová, max c'oli yaloncan el watx' k'anej yiban conob Israel.

² Max yalon axca ti': Chi tit Jehová bay witz Sinaí. A tu' chon is tzektanejtek bay Seir. Chi jopopitek bay witz Parán. Yelc'ulal chi tit Cham co cawilal yetok eb is yángel yinxa milal. A is watx' k'ab inej oc ley, caw wal chi chaw is k'ak'al.

³ Caw wal chi camc'ulnej Cham is conob, chi taynej Cham eb yet-xa yayji. A eb tu' chi oc eb ayilal satak Cham, cax chi yiken eb is chekbanil.

⁴ A jun ley max wak'a', axca tol is beyomal conob Jacob yayji ocok.

⁵ A Jehová ayoc reyal bay Jesurún*fn* yet chi wajban ba eb yajawil conob, yet chi wajban oc masanil eb is tribual Israel, ẍi cham Moisés.

⁶ Max chaon el yich cham Moisés yaloncan el watx' k'anej yiban junjun tribu. Yin babelal max yal yiban is tribual Rubén axca ti': Ayokab is cawil Rubén, c'amokab chi c'ayilok, caxc'al c'am wal tx'ial is yinatil, ẍi cham.

⁷ Max yalon c'apax yin is tribual Judá axca ti': Mamin Jehová, abc'al tzet chi yal Judá. Junanej oc yetok yet conob, colwajan yetok a may a k'ak'al. Colwajan yetok bay eb is yajc'ul, ẍi cham.

⁸ Ac'ala' c'apax yin is tribual Leví max yal axca ti': Mamin Jehová, cha tx'oxil ochwan yin Urim c'al Tumim ak'bil oj yul is k'ab eb a chekbej levita tol yikem, eb max ak' porobal bay Masah, eb max a teyelej a ba yetok bay a' Meriba.

⁹ Yelxac'al max ach yochej eb yintak is mam is txutx, yintak is yuẍtak c'al yintak is yuninal. A eb tu' max yikej eb a chekbanil, majc'al yetnejtok eb a trato albilcanok.

¹⁰ Ok yak'c'al eb a ley cuy eb yinatil Jacob. Ok yalonc'al eb a cuybej bay a conob Israel. Ok yak'onc'al tz'a eb incienso a satak, cax ok yak'on tz'a eb xajanbal bay altar.

¹¹ Mamin Jehová, ak' wal a watx'c'ulal yiban eb, cax yetok masanil a c'ul cha chaon tzet chi yak' eb ayach. Cha tec'ay eb ajc'ul oc yin eb yet watx' c'amxa chi sic' aj wan ba eb ay sawenal tu', ẍi cham Moisés.

¹² Max yalon c'apax yin is tribual Benjamín axca ti': Caw wal ochebil Benjamín yuj Jehová, yin masanc'ulal ayic'ok. A Cham chi colwaj yetok. A ayoc is taynemalok, ẍi cham Moisés.

¹³ Max yalon c'apax yin is tribual José axca ti': Yak'okab Jehová is yaxilal yiban tx'otx'al is tribual José. A yal ak'bal watx' chi ayc'ay yiban, c'al yal tx'otx' watx' chi ajolok.

¹⁴ Watx'okab chi yun k'inbi sat awoj yuj k'axanil yakan c'u, cax watx'okab chi yun sat te' lobejal te' yin is tiempoal.

¹⁵ Nojnakokabxac'al el yuj awoj caw wal watx' bay juntzan witzlak tol ayc'altac'a ec' yet payxa.

¹⁶ Nojnakokab el sat tx'otx' yuj xiwil tzet yetal tol watx' chi yak'a', c'al yuj is watx'c'ulal Jehová, Cham max tx'ox ba xol te q'uix chi chaw k'ak'al. Titokab can masanil is watx'ilal yiban José, tol sic'bil el xol eb yuẍtak.

¹⁷ Caw wal watx' nak axca jun ach'ej wacax babel aljinak. Ay is yip axca no yichlakil teal wacax mimek yuc'a'. Ok tek masanil conob masantac'al bay lajub tx'otx' tx'otx'. A is yuc'a' no' tu', a' chi tx'oxontek yipalil xiwil milal is bisil eb Efraín yetokc'al milal is bisil eb Manasés, ẍi cham Moisés.

¹⁸ Max yalon c'apax yin is tribual Zabulón, c'al Isacar axca ti': Tzalojanek ex yinatil Zabulón yuj bay chex ec'jabi. Ac'ala' c'apax ayex ti' ex yinatil Isacar, tzalojanek bay e mantiado.

¹⁹ Che yawtej masanil eb nación bay jolomlak witz, cax che yak'on xajanbal tol chi cha' c'ul Jehová. Che yak'on e nabal yin masanil is beyomal a' mar, c'al yaxilal bay is tilak a', ẍi cham Moisés.

²⁰ Ac'ala' c'apax yin is tribual Gad, max yalon axca ti': Ilayokab aj can Cham max ak'on miman a tx'otx'. Axca wal yay pakan junok no coj, caywal tu' yayji is tribual Gad. Chi jatzon el is k'ab c'al xil is jolom eb ajc'ul.

²¹ A yinatil Gad max ioncan tx'otx' tx'otx' caw wal watx'. A jun tx'otx' tu' moj wal tol yet eb capitán yayji. Yet max wajban ba eb yajawil conob Israel, ikbajwom max yun eb yajawil yinatil Gad yin ikemalil bay is chekbanil c'al is ley Jehová, ẍi cham Moisés.

²² Ac'ala' max yalon c'apax yin yinatil Dan axca ti': A wal Dan ti' lajan wal axca junok no ach'ej coj, max tittac'al t'uknaj bay Basán, ẍi cham Moisés.

²³ Ac'ala' max yalon c'apax yin is yinatil Neftalí axca ti': A is yinatil Neftalí, watx' yayji eb yuj is watx'c'ulalil Jehová, yet eb yayji a' najab masantac'al bay chi elcan a', ẍi cham Moisés.

²⁴ Ac'ala' max yalon c'apax yin is yinatil Aser axca ti': Jayokab xiwil watx'il yiban Aser xol eb yinatil Jacob, cax camc'ulnelayokab yinatil yuj eb yuẍtak. Xiwilokab ok yun yaj can aceite bay eb.

²⁵ Watx'okab makay is puertail is conob eb yetok chapa tol hierro c'al bronce. Tec'anc'al waay eb yin masanil is k'inal.

²⁶ C'am mac chi je' lajlen ba yetok is Diosal Jesurún. Caw wal ay is may yec'jab bay yiban asun yet chi jay colwaj jetok.

²⁷ A Dios ayc'al ec' yin tojbalk'inal. A ayoc co taynemalok. A is mayk'ak'al Cham c'am is lajubal, a ayoc jipomalok. A Cham ok ion el eb ajc'ul oc jin co satak, cax ok yalon Cham tol ok co c'ayil eb.

²⁸ Ayon Israel on ti' watx'xac'al ok yun jayji bay co tx'otx'al; yinc'al junc'ulalil ok yun jayji ec' ayon yinatil on Jacob ti'. Xiwil co trigo c'al co vino. A yal ak'bal chi aon oc yal co tx'otx'al ti'.

²⁹ Caw wal watx' jet ex wet israelal, ¿mac wal junok chi je' lajban ba jetok? A Jehová max on coloni, a' Cham chon tayneni c'al colwaj jetok. Axca jespada yayji Cham yet chi jak' ayc'ay jablabok eb ajc'ul oc jin co satak, cax ok co tec'on ay is maynejbail eb, ẍi cham Moisés.