Dt 32 - A Txꞌan Biblia Yin Kꞌanjobal 1989

¹ Yabokab satcan tzet chi wal ti', tol chin k'anjabi; cax yabokab tx'otx' tx'otx' tzet chi wala'.

² A cuybanilej chi wal ti' lajan wal axca nab chi ayc'ayi. A k'anej chi wal ti' lajan wal axca yal ak'bal chi ayi, ac'ala' axca yayc'ay nab yiban te te' c'al yiban an ac'un, axca tu' yayji.

³ Ok walcan el tzetbil yayji oc Jehová. Iek aj can Cham yetok is mayk'ak'al.

⁴ A Cham ayoc jenelok axca junok ch'en miman ch'en. Tz'akan chi eloc tzet chi yunej c'al tojol yayji. A Dios chi k'anjabi, chic'al yun bay chi yala'. C'am junok lek'tial chi yala', tojol Cham yin masanil tzet chi yunej.

⁵ Ayex wet conob ex ti', caw wal tol c'am e watx'il, tenomtak ex bay Jehová. Caw wal man e mojok chex oc yuninalok Cham.

⁶ ¿Tom cay wal ti' chi yun e q'uexpaknen bay Jehová? Ayex ti' c'am e nabal, c'am jabok e jelanil. ¿Tom manak Jehová co Mam xin? ¿Tom manak Cham max con watx'neni? A Cham max con watx'neni, c'al con yaon oc yin conobal.

⁷ Naektek is yunben Jehová cax che naon yin juntzan tiempo max ec'can elok. K'anlejek e yabej bay e mam c'al bay e txutx. Abek c'apax bay eb cham icham winak.

⁸ Yet max pojaxcantok anima c'al nacionlak yuj Cham Axac'al Ocok, yuj yaoncan oc is mojonal is tx'otx' junjun conob, yin babelal max na' Cham yin jantak bisil eb israel.

⁹ A yinatil Jacob max sic'can el Cham yet chi occan yetok.

¹⁰ Max chaloj eb yuj bay takin tx'otx', bay yobxac'al yili te te' yujtol jab cak'ek'. A tu' max batxlaytek eb yuj Cham. Caw wal max ya'ilnej Cham eb, axca wal co ya'ilnen co bak' sat.

¹¹ Axca chi yun toj jenan is xic' no águila yiban is wayub, axca chi yun yikban no yune' yet chi jupwi no', axca wal chi yun yiontok no águila tu' is yune' yiban is xic', axca wal tu' max utlay eb israel yuj Jehová.

¹² A Cham max yikbaj is conob, c'am junok comon dios max colwaj yetok.

¹³ Max yaoc Jehová tx'otx' siquilal tx'otx' yul k'ab is conob. Max low eb yuj Cham yuj tzet chi ch'ibaj sat tx'otx', c'al yuq'uen eb yalcab chi eltek bay yulak ch'en ch'en, c'al aceite chi el yin te olivo chi ch'ibaj bay satlak ch'en ch'en.

¹⁴ Ay leche c'al queso max yak' is wacax eb, c'al is chiwo eb. Ay no ach'ejtak calnel caw wal watx' max chi' eb, c'al no calnel ay bay Basán, c'al no chiwo. A wal ixim trigo caw wal watx' max lo eb, cax max yuq'uen eb vino, yal an uva.

¹⁵ Axa yet max bak'echbi el Jesurún,*fn* max nojxac'al el eb yuj bak'echal, max yion el ba eb yin Cham max watx'nen eb, max yintaknen el eb is Colomal.

¹⁶ Caw wal max tx'emtek eb is yowal c'ul Jehová, yujtol max oc eb ayilal bay yechelej yajbil yuj Cham.

¹⁷ Max yak'on eb xajanbal bay eb demonio man diosok, bay yechelej tol man yojtakok eb yet yalantok, comon dios tolto chi watx'ji ajok, man ojtakbilok yuj eb is yichmam eb.

¹⁸ Max toj c'ayc'ulal yuj Israel is Watx'nemal tol is Colomal yayji. Majxac'al natek is Diosal tol max ak'on is yiquisal.

¹⁹ Yuj tu' max tit yowal c'ul Jehová yet max yilon juntzan tu', xan max yajcan el Cham eb is c'ajol c'al eb is cutz'in.

²⁰ Max yalon Jehová axca ti': Majxa in toj t'anan yin eb; okto wila' tzet ok yut ba eb. Wal yel a juntzan anima ti', caw wal c'am is watx'il eb, c'am chi je' jaon oc eb yipok co c'ul.

²¹ Max tx'emtek eb wowal yuj is diosal eb tol man diosok. Max yak'on eb chichon in c'ul yuj juntzan dios tol c'am yelapnok. Yuj tu' xan ok in tx'emtek yowal eb yuj jun conob chi yal eb tol man conobok yayji. Ok wak' pax tit yowal eb yuj jun conob tol c'am is nabal.

²² A wal yowal in c'ul max cancan jopan axca junok k'ak'ej. Masanil tzet ay sat tx'otx' tx'otx' chi tz'acantok yuj, cax chi chaw is k'ak'al bay yul tx'otx' bay yichlak mimek witz.

²³ Ok wacantok masanil makanil yailal yiban eb. Ok lowcan masanil in julbal yin eb.

²⁴ Ok cam eb yuj wajil c'al yuj k'ak'al ilya'; a junok ya'ilalej caw wal ow ok c'ayon el eb. Ok waontok no chiwajwom no' xol eb, c'al labaj caw wal ow is venenoal.

²⁵ A bay yulak calle ok cam is yuninal eb yuj espada, ok ayjok ec' eb bay yatut yin xiwc'ulal. Ok cam eb ach'ej c'al eb ix k'opoj, eb icham anima c'al eb unin chi txutxwi.

²⁶ Max in na' wuchon saklem eb israel ti', c'al in c'ayon el eb bay sat tx'otx' tx'otx' ti', yet watx' c'amxac'al bay ok binaj eb.

²⁷ Palta c'am chi wochej chi wab is buchwal k'anej eb ajc'ul. C'am chi yal in c'ul chi maynej ba eb tu'. Talaj chi yal eb axca ti': Ayon wal max jak' ayc'ay eb israel ti', manak Jehová max ak'on ayc'ayok, ẍi talaj eb.

²⁸ C'am jabok is nabal eb anima tu', c'am chi nachaj el yuj eb.

²⁹ Ta ay is nabal eb, chi mi je' nachaj el yuj eb tzet ok elocok.

³⁰ ¿Tzet wal chi yun yelaj junok mil israel bay junok eb ajc'ul? ¿Tzet wal yuj xan a bay cawan chi elaj lajoneb mil eb? C'am tzet chi je' yuj eb ta mayinnak Jehová is Colomal in Israel max waoc eb yul k'ab eb ajc'ul tu', ẍi Cham.

³¹ Caw wal yojtak eb ajc'ul tu' tol a is colomal eb c'am chi je' lajlen ba yetok co Colomal.

³² A eb ajc'ul tu' chi tzalojbi eb yetok yobtakil eb aj Sodoma c'al eb aj Gomorra. Axa is tzalojc'ulal eb tu' lajanxac'al axca veneno.

³³ A is vino eb lajanxa axca is venenoal no bakne' labaj.

³⁴ Max yalon pax Jehová axca ti' Masanil is yobtakil juntzan eb wajc'ul tu' yin in conob Israel naanc'al wuj axca tol toc'al c'uan ec' wuj.

³⁵ Ayin ay walon wet waon oc is yailal eb. Ayin ok wiec' pak bay eb. Ay jun c'ual ok ayc'ay eb. Cawilxa chi jayoc is c'ual yet ok lajwok ay eb. Cawilxa chi jayoc yorail yet ok chaon eb is paktzebal, ẍi Jehová.

³⁶ Ok colwaj Jehová yetok is conob yet chi yiloni tol lanan pax yip eb. Cax ok cusoc c'ul Cham yin is chekbej, yet chi yiloni tol c'amxa junok mac chi je' colwaji, tamwal eb mosejal, tamwal eb yet ba.

³⁷ Catatu' ok k'anlen Jehová bay eb is conob: ¿Baytal ayoc e diosal tu' tinani': juntzan e colomal che yaoc yipok e c'ul tu',

³⁸ juntzan chi chion aytok is seboal e xajanbal, c'al yuq'uen e vino che yak' bay yin xajanbalil? Ajokab wan e diosal tu' yet chi colwaj e yetok, jayokabi yet chex taynelay yuj.

³⁹ Asannej in Dios in. C'am jaywanokxa dios in satak. Ayin chi wak' cam junok mactxel, cax ayin chi wak' c'apax iquisbok. Ayin chi wak' yasjok eb anima, cax chi wanten paxok. C'am mactxel chi je' colon el ba yul in k'ab.

⁴⁰ Asannej in ayin ec' yin tojbalk'inal. Chi wiaj in k'ab bay satcan cax chi wak'on in ti',

⁴¹ tol a yet ok in nikon ajtek ye wespada toxac'al chi jopopi, ok in watx'nej el jun owal ti'. Ok in pakon in ba bay eb ajc'ul oc win, cax ok wak'on yailal axca is mojalil is sawenal eb win.

⁴² Caw wal ok bonchajcantok in julbal yuj is chiq'uil eb. A wespada ok tzoc'oncantok is chibejal eb camnak, c'al yetok eb mitx'biltek yin owal. Axa is jolom eb ajc'ul oc win, chic'takxac'al ok yun canok, ẍi Jehová.

⁴³ Ex nacionlak tzalojanek yetok is conob Jehová, yujtol ok paktzej Cham is camichal eb is chekbej. Ok yak' lajwok Cham eb ajc'ul oc yin eb, cax ok yak'on tan mul is conob yiban, ẍi Moisés.

Lajub chekbanilej max yal cham Moisés

⁴⁴ Max apni oc cham Moisés bay satak masanil conob Israel, tzunan oc cham Josué is c'ajol Nun yintak cham, cax max yalon cham masanil is k'anejal jun bit ti' bay conob Israel.

⁴⁵ Max lajwi tu xin, max yalon cham axca ti':

⁴⁶ Naek wal yin masanil tzet max wal ayex ti', cax aek oc yin e c'ul, ikbajek eb e yuninal yet watx' yelc'ulal chi yikej eb jun ley ti'.

⁴⁷ Man comon k'anejok yayji juntzan ti', palta tol e cawil yayji ocok. Tatol che yikej masanil, najatil ok yun e k'inal bay sat tx'otx' tx'otx' ok e sataknej bay k'axepal ec'tok a' Jordán, ẍi cham Moisés.

Max yilcantok cham Moisés tx'otx' Canaán

⁴⁸ A yet jun c'ual tu' max k'anjab Jehová bay cham Moisés axca ti':

⁴⁹ Ajantok yin witzal Abarim cax chach ajapnok bay jolom witz Nebo, bay yul is tx'otx'al eb moabita, bay satak Jericó. A tu' chelcantok tx'otx' Canaán ok wak' bay eb et conob ti'.

⁵⁰ A bay jolom jun witz bay chach ajtok tu', a tu' ok ach camxac'al, axca max yun cam oẍtak Aarón bay jolom witz Hor.

⁵¹ Yujtol e cawanil max e ten tzet max wala', maj in e yi' can satak eb conob Israel bay a' aej chi yik Meriba-cades bay takin tx'otx' chi yik Zin.

⁵² Yuj wal tu' xan majxa ach apnok bay tx'otx' tx'otx' max wak' in ti' wak'on bay eb conob Israel, najat-xac'al chelcantok tx'otx', ẍi Jehová.