Dt 29 - A Txꞌan Biblia Yin Kꞌanjobal 1989

¹ A juntzan k'anej tz'ibbilcan ti': a ton trato max yal Jehová bay cham Moisés, tol chi watx'ji yetok conob Israel bay yul is makbej Moab, is tz'akil trato max watx'nej Cham yetok eb bay witz Horeb.

Juntzan tenchebalej

² Max wajbaj oc cham Moisés masanil eb yet conob, max yalon axca ti': Ayex ti', max cam wal e yilon tzet max yun Jehová yetok cham reyal Egipto, yetokc'al eb ayoc yin yajawilal yetok, c'al yetok masanil eb bay yul nación tu'.

³ Testigo e yayji yin juntzan yailal, c'al yechelej tol c'ayubtak yoc max yun Cham.

⁴ Palta ato tinani', c'amtoc'al chi yak' Jehová e yojtaknej elok, c'al nachaj el tzet yelapnok juntzan ti' e yuj.

⁵ Ayin max ex wikbaj yin cawinak abil bay takin tx'otx'. A yet jun tiempoal tu', maj lajwok el e pichil, tamwal max lajwi el e xanab.

⁶ Maj e lo' pan, maj e yuc' vino, tamwal max e yuc' vino pajbinakxa, yet watx' chi nachaj el e yuj tol a Jehová a ton co Diosal.

⁷ A yet max on jayoc bay jun makan tx'otx' ti', max eltek Sehón, reyal Hesbón yak'on owal jin, yetok Og, reyal Basán, palta max ayc'ay eb juj.

⁸ Max jioncan is tx'otx'al eb, cax max jak'on is tx'otx' eb tu' bay tribual Rubén, c'al bay tribual Gad, yetokc'al bay nanxa tribual Manasés.

⁹ Yuj wal tu', ikejekc'al e beybalnen jun trato ti', yet watx' watx'c'al ok yun e yeloc yin masanil tzet yetal ok e yunej.

¹⁰ A wal tinani', ti wal wajan ex ec' satak Jehová co Diosal. Masanil eb yajaw yin e tribual, eb yicham winakil conob, yetok eb ay yopiso, yetok masanil eb jet israelal:

¹¹ eb winak, eb unin, c'al eb ix ix, yetokc'al eb tx'ok conobal cajan ec' e xol, a ton eb siwom, c'al ikom aej,

¹² wajan on ec'ok yet watx' chi jak' co ti' yin is trato Jehová co Diosal chi yak' jetok ti' tinani'.

¹³ A wal chi yuncan tinani' tol is conob on Jehová co Diosal, axa Cham chi occan co Diosalok, axca max yun yak'on is ti' bay Abraham, bay Isaac, c'al bay Jacob, a ton eb tu' jichmam yayji ocok.

¹⁴ Man asannejok jetok mac on ayon ec' is satak ti' tinani', chi watx'nej Jehová jun trato ti',

¹⁵ palta yetok c'apax eb c'amto ec' jetok tinani'.

¹⁶ Ayex ti', caw wal e yojtak wal sic'libil, tzetbil wal max yun co cajay ec' bay Egipto, yetokc'al tzet max yun jec'tek bay juntzan nación yulak be.

¹⁷ A bay tu' max jil juntzan comon dios, juntzan yechelej tol te', ch'en, plata, c'al oro, tol yajbejtak tzet chi yun juntzan anima tu' yin yak'on eb ayilal bay.

¹⁸ Chi cam e yiloni tol c'amokab winak, tamwal ix co xol ti', tamwal junok tribu tol ok bekoncan Jehová co Diosal, cax ok oc ayilal bay is diosal juntzan nación tu'. Ta chi yun juntzan tu', lajan mi axca junok ac'un tol caw wal c'a', cax veneno is xe'.

¹⁹ A mi yet chi lajwi yaben jun k'anej bay chi jak' co ti' ti', talaj ay junok ok na' tol yelxac'al watx' yet, cax ok yaloni: Yelxac'al watx' chin elocok, caxc'al chi wun masanil tzet chi yochej in c'ul, ẍi mi. Ta axca tu', ok mi low jin co masanil.

²⁰ Yuj tu' xan a Jehová, majxac'al yak' mimanc'ulal. Palta tol ok jay yowal c'ul yiban jun anima tu'. A masanil juntzan yowal c'ul albil can bay yul tx'an libro ti', ok ayc'ay yiban. Axa junok mactxel axca tu' chi yut ba, ok c'aylay el yinatil bay sat tx'otx' tx'otx' ti' yuj Jehová.

²¹ A Cham ok pojon el jun winak tu' xol masanil eb tribual Israel, yuj yaon oc yailal yiban, xan masanil yailal albilcan yul tx'an libroal trato, bay tz'ibbilcan masanil ley, ok ayc'ay yiban.

²² A eb anima toltoc'al ok jayok, a ton eb e yinatil ok jayc'al, yet c'am exxa ec' ayex ti', yetokc'al juntzanxa anima tx'ok nacional chi tit bay najat, ok yil wal eb yailal, c'al ilya' ok yatek Jehová bay yiban tx'otx' tx'otx' ti'.

²³ Ok yil eb tol a jun tx'otx' ti', asan azufre, atz'am, c'al tz'ayil tx'otx' ay. C'amxa tzet yetal ok je' yawlay bay jun tx'otx' tu'. C'amxa tzet chi je' yak'oni, tamwal junok an comon ac'un chito wal je' ch'ibajok. Axca wal max yun lajwi ay Sodoma, Gomorra, Adma c'al Zeboim, a ton juntzan conob tu' max yak' lajwok ay Jehová yetok yowal c'ul, caywal tu' ok yunej.

²⁴ Yuj tu xin, masanil anima bay yulyibank'inal ti' ok k'anlej: ¿Tzet yuj xan caytu' max yut Jehová jun conob ti'? ¿Tzet wal yuj xan yelxac'al miman max yun tit yowal c'ul yin eb? ẍi mi eb.

²⁵ Axa is paktzebal juntzan tu xin: Yujtol a is conob Cham tu' max bekcan is trato max watx'nej yetok eb yichmam eb, yet max eltek eb bay Egipto.

²⁶ Palta tol max oc eb ayilal bay comon dios man ojtakbilok yuj eb yet yalantok, tol manak Jehová max alon bay eb tol chi oc eb ayilal bay.

²⁷ Yuj wal tu' xan max tit yowal c'ul Cham yiban jun conob ti', xan max ayc'ay yiban masanil juntzan yailal tz'ibbil bay yul tx'an libro.

²⁸ Max yuktej el Cham jun conob tu' yetok yowal c'ul, cax max tojcan eb bay xolak juntzanxa nación, axca ton chi uj tinani', a ton paktzebal tu'.

²⁹ Ay wal tzet yetal man jojtakok. A juntzan tu', yet Jehová co Diosal yayji ocok. Palta ay tzet yetal ak'bil jojtaknej elok, c'al yojtaknen el eb juninal yin tojbalk'inal, yet watx' chi jikej masanil juntzan ti', a ton masanil juntzan chekbanilej ti', c'al ley.