Dt 26 - A Txꞌan Biblia Yin Kꞌanjobal 1989

Ofrenda yin babel sat awoj

¹ A yet cajan exxa ec' bay sat tx'otx' tx'otx' ok yak' Jehová co Diosal ayex,

² cax che wajon babel sat awoj bay sat tx'otx' bay ayex ec' tu', che yiontok yul junok motx bay jun lugar sic'bil el yuj Cham bay chex oc ayilal bay.

³ A tu' chex apni oc bay satak eb cham ayoc yin sacerdoteal yet jun tiempoal tu', che yalon axca ti': Chi wal satak Jehová co Diosal tinani', tol mayal on apni oc sat tx'otx' tx'otx' max yak' Cham is ti' yak'on bay eb jichmam, quex chi.

⁴ Chi lajwi tu' cax chi chaon ec' cham sacerdote jun motx che yitok tu', cax chi yaon oc cham bay satak altar.

⁵ Chi lajwi tu' cax che yalon bay satak Jehová co Diosal juntzan k'anej ti': A eb jichmam, arameo eb, jun yaliẍ bulan eb, toc'al chi ec'jabtok eb. Ijan chi cam eb yuj wajil, xan max tojcan eb bay Egipto yetok jaywan is yuninal. A tu' max oc eb yin conobal, caw wal ay is may max yun eb, cax xiwil is bisil eb.

⁶ Palta caw wal ok'bal c'ul max yun eb yuj eb aj Egipto. Caw wal max yil eb yatakilal yet max alay oc eb yin mosejal.

⁷ Yuj wal tu xin, xan max k'an eb bay Jehová co Diosal, a ton is Diosal eb jichmam tu', tol chi colwaj yetok eb. Max yab Cham tzet max k'an eb, max yilon c'apax mulnajil yatak bay ayoc eb. Ok'bal c'ul yayji eb yin mosejal.

⁸ Max tx'oxon Cham yipal is k'ab, xiwc'ulaltakxac'al yili c'al c'ayubtakxac'al yoqui, tzet max tx'ox bay Egipto yet max yion eltek eb,

⁹ c'al on yiontek Cham bay sat jun tx'otx' caw wal yax sat ti'.

¹⁰ Yuj wal tu xin, ti' chi jitek babel sat awoj chi ji' bay sat tx'otx' tx'otx' max yak' Cham ayon, quex chi. Chi lajwi e yalon juntzan k'anej tu xin, cax che yaon octok te motx tu' bay satak Jehová co Diosal, cax chex ay jajan satak Cham.

¹¹ Lajwi tu' che chaon junok k'in yetok e familia yuj masanil tzet max e cha' bay Cham. Che yawten c'apax eb levita yin jun e tzalojc'ulal tu' yetokc'al eb tx'ok conobal ayic' e xol.

Diezmo

¹² A yet chi tz'aknaj oxox abil, che yak'on is diezmoal jantak tzet che yi' yin e yawoj bay eb levita, c'al bay eb tx'ok conobal ayic' yul e conob, c'al bay eb meba' unin, c'al bay eb xal ix camnakxa yichamil, yet watx' ay tzet chi lo eb yul e conobal,

¹³ cax che yalon bay satak Jehová co Diosal axca ti': Mayal in pojcan el bay in na jantak tzet yetal tol et yin masanil tzet max wi' bay sat tx'otx' tx'otx'. Mayal in pojcan el yet eb levita c'al yet eb tx'ok conobal ayic' co xol, c'al eb meba' unin, yetokc'al eb xal ix camnakxa yichamil. Mayal wikej masanil tzet max ala', c'amxa jun a chekbanil chi toj c'ayc'ulal wuj, c'al c'am chi wikej.

¹⁴ C'am wal jabok juntzan tu' max in lo' yet c'ual ayin oc yin in cusc'ulal yuj camich, c'al yet c'ual man watx'ok wayji ocok atac'ala' yalon ley, tamwal max waltej oc bay eb camnak. Max wikej masanil tzet max ala'.

¹⁵ Ilon aytek bay satcan, bay lugar tol et yayji ocok, ak' a watx'c'ulal jiban ayon a conob Israel on ti', c'al yiban bay sat tx'otx' tx'otx' tol caw wal yax sat bay cajan on, axca wal max yun ak'on a ti' bay eb jichmam on, quex chi.

Yet Jehová yayji conob Israel

¹⁶ A Jehová co Diosal max alon masanil juntzan chekbanilej chi walcan el ayex ti' tol che yikej, c'al e beybalneni. Che yikej yetok masanil e c'ul, c'al yetok masanil e yanimail.

¹⁷ Mayal e yal tinani' tol a Jehová e Diosal yayji. Max e yak'on e ti' e yiken e tzaklojc'al yintak is chekbanil, c'al is cuybanil, c'al is ley.

¹⁸ Mayal yal Jehová tinani' tol ayon conob Israel on ti', is conob onxa axca max yun yaloni, xan yowalil chi jikej is chekbanil.

¹⁹ A Cham ok ex aon oc yin miman nacional, tol ok ex binaj yin watx'il c'al miman e yelapnok yintak juntzanxa nación max watx'nej, cax is conob ex Cham, axca max yun yaloni, ẍi cham Moisés.