Dt 20 - A Txꞌan Biblia Yin Kꞌanjobal 1989

Leyalil yoc owal

¹ A yet ok ex tok e yak'len owal yetok eb ajc'ul, ok e yila' tatol xiwil bisil chej eb, c'al carruaje yet owal, yetokc'al is soldado eb, xiwilxa bisil eb e yintak, manchak ex xiw bay eb, yujtol a Jehová co Diosal, Cham max on ion eltek bay Egipto, a' ok oc e yetok.

² A yet chi apnixac'al yorail yoc owal tu', a cham sacerdote ok k'anjab bay eb soldado,

³ cax ok yalon axca ti': Abek ex wet israelal, a tinani' toxa ok ex tok yin owal yin eb ajc'ul, c'amc'al chi cabax aj e c'ul, tamwal chex xiwi. C'amc'al chex bilaj yuj xiwilal,

⁴ yujtol a Jehová co Diosal ayoc e yetok. A' ok yak' owal yin eb ajc'ul tu', xan ok ayc'ay eb e yuj, ẍiokab cham sacerdote tu'.

⁵ Chi lajwi tu', chi yalon eb yajaw axca ti': Ta ay junok mactxel tolto max watx'nej aj junok yatut, c'amtoc'al chi cajay yul, tokokab cajay bay yatut tu', axa talaj chi yunej, chi cam bay xol owal, tx'okxa mactxel chi cajay yul na tu'.

⁶ Ta ay junok e xol ti' toltoc'al max yaw junok yawoj uva, c'amtoc'al chi yak' tzalojbok c'ul yetok, tokokab bay yatut. Axa talaj chi yunajok chi cam bay xol owal, cax tx'okxa mac chi wajon sat uva tu'.

⁷ Ta ay junok mactxel mayal yak' is ti' tol ok nupayok, palta c'amtoc'al chi nupay paxok, tokokab bay yatut nupayok, axa talaj chi yunej, chi cam bay xol owal, tx'okxa pax mac chi nupay yetok ix ix tu', ẍiokab eb.

⁸ Chi lajwi tu', cax chi yalon pax eb yajaw yayji tu' bay eb soldado: Ta ay junok mac chi xiwi, paxokab bay yatut, yet watx' c'am chi tacaj c'ul juntzanxa yuj, ẍiokab eb.

⁹ A yet chi lajwi k'anjab masanil eb yajaw tu xin, cax chi ak'lay yikbej junjun ikbajwom yin junjun bulan soldado.

¹⁰ Ta chex apni oc cawilal junok conob yin e yak'on owal yetok, babel che yala': ¿Chim e yochej junc'ulal ma owal? quex chi.

¹¹ Ta a eb aj conob tu', chi cha' c'ul eb tol ayokab junc'ulalil, cax chex chaon oc eb yul conob tu', yowalil che yak' pural eb yoc e mosook.

¹² Palta ta c'am chi oc eb yin junc'ulalil e yetok, asan tol chi yal eb: Ocokab owal, ta ẍi eb, cax chex oymoj yin conob tu', chex ocxac'al yin owal.

¹³ A Jehová co Diosal ok ak'on ayc'ay eb yul e k'ab, axa e mak'on cam masanil eb winak bay tu', yetok espada.

¹⁴ Palta a eb ix ix, eb unin, no jobbejal no' yetokc'al masanil tzet yetal ay bay jun conob tu', e yet chi yuncanok, cax che yak'on tzalojbok e c'ul yetok masanil tzet yetal ok cha' c'ul Jehová co Diosal yet chi cancan yul e k'ab, a ton tzet yetal ok ec'can bay eb ajc'ul tu' e yuj.

¹⁵ Cayc'al tu' ok e yun yetok juntzanxa nación najat ay bay ok ex cajay tu'.

¹⁶ Axa juntzan nación ay bay tx'otx' tx'otx' ok yak' Jehová co Diosal e sataknej, c'amxa junok mactxel che yak'can yin yiquisal.

¹⁷ Ok e yak' lajwok ay eb tu': a ton conob hitita, amorreo, cananeo, ferezeo, heveo, c'al eb jebuseo, axca wal max yun yalon Cham.

¹⁸ Caytu' che yut eb, yet watx' c'am che cuytok e yet yin e beybalnen juntzan tzet yetal caw wal yajbejtak chi yun eb tu', yuj yion aj can eb is diosal, cax chi oc e mul satak Jehová co Diosal.

¹⁹ A yet chex oc yin junok conob, tol mimantak tiempoal chex ayji ec' bay yinlak tu', c'am che k'akaj is satnom te' eb yetok echej, yujtol ok je' e loon sat te'. A te awbejal te' tu', c'am che c'ayil te', yujtol man lajanok te' yetok anima, c'am chi je' tit te' e yin yak'on owal e yetok.

²⁰ A pax te comon te', tol c'am sat chi yak'a', chi je' e k'akon aj te' yuj yoc te' e walubok yinlak jun conob tu', masantac'al chi yal yayc'ay yul e k'ab.