Dt 18 - A Txꞌan Biblia Yin Kꞌanjobal 1989

Is satak eb sacerdote, yinatil Leví

¹ A eb sacerdote yinatil Leví yetokc'al masanil eb tribual Leví, c'am is satak eb axca yet juntzanxa eb jet israelal. A yuj xajanbal ok ak'lay tz'a bay Jehová ok on yec' tiempo yuj eb. A tzet yetal yet Cham, a juntzan tu' yet eb.

² Man ok cha' eb satak axca yet juntzanxa eb jet conob, yujtol a tzet yetal yet Jehová ayoc is satakok eb, axca max yun yalon Cham.

³ A tzet yetal ayoc satakok eb sacerdote yin no wacax, c'al yin no calnel chi yak' eb anima yin xajanbalil, a ton juntzan ti': a ton jolom xic' no', no bak'chil tiej, c'al yetok no tzucutz.

⁴ Is satak c'apax eb yayji ixim babel trigo, babel vino, c'al babel aceite, yetok no babel lana chi el yin no calnel.

⁵ Yujtol a Jehová co Diosal max sic'on el eb yetok yinatil eb bay xol masanil juntzanxa tribu, yet watx' chi ak'wi serbil eb bay Cham yin tojbalk'inal.

⁶ Ta a junok levita bay tzanc'al tzet conobal, yul e makbej, chi el wal yin c'ul chi toj bay jun lugar max sic'can el Jehová,

⁷ chi je' yoc yin ak'oj serbilal bay Cham, lajanc'al chi yuncan axca eb yet levitail lanan yak'wi serbil bay Cham.

⁸ Lajanc'al ok yut chaon is lobej axca yet eb tu', caxc'al ay tzet chi cha' yin satak is mam.

Tenchebal yuj beybal eb tx'ok conobal

⁹ A yet ok ex octok bay tx'otx' tx'otx' ok yak' Jehová co Diosal ayex, manchak e beybalnej is beybal juntzan nación ayto ec' bay tu', tol caw wal yajbejtak yoqui.

¹⁰ C'amokab junok ex che yak' tz'a e yuninal yin xajanbalil. C'amokab mactxel chi yut ba yin naom el k'anejal, tamwal mactxel chi yut ba ajtxumal, tamwal chi yaoc ba yin ajbalil,

¹¹ tamwal eb tz'akan ay c'ul, tamwal eb chi yal ba bay eb naom el k'anej, tamwal eb chi yawtej pixan camnak.

¹² Yujtol chi yaj can el Jehová masanil mactxel chi yun juntzan ti', yuj tu' ok yiel Cham juntzan nación tu' e satak, yujtol yelxac'al yob is beybal eb tu'.

¹³ Yowalil tol caw wal watx' che yut e nabal satak Cham.

Jun chekbej Jehová ok jayok

¹⁴ A eb anima ay bay juntzan nación ok e yican el tu', chi yikej eb bay eb alom el k'anej yin ayoktoc'al yunen yaloni, c'al eb naom el k'anej yaloni. A pax ayex ti' xin, maj cha' c'ul Jehová co Diosal ok e yun juntzan tzet yetal tu'.

¹⁵ A Cham ok siq'uil junok jet conob ti' is chekbejok, axca max quin yut sic'on el ayin ti'. Yowalil ok e yikej bay tzet ok yala'.

¹⁶ Wal caw yel a ton jun tu' max e k'an bay Jehová co Diosal yet ayex ec' bay witz Horeb, yet jun c'ual wajan on ec' bay tu', max e yalon axca ti': C'amxa chi yochej co c'ul chi jab yoc is nuk' Jehová co Diosal tu', tamwal jilon jun miman k'ak' tu', yet watx' c'am chon cami, quex chi.

¹⁷ Yuj wal tu xin, max yal Jehová ayin axca ti': Watx' tzet max yal eb anima tu'.

¹⁸ Ayin ok wi' aj wan junok in chekbej e xol axca ach ti', junok e yet conob. Ayin ok wak' yojtaknej el tzet ok yala', cax ok yalubtanen ayex masanil tzet chi wala'.

¹⁹ A mac c'am chi cha yab bay jun in chekbej tu', tol ok k'anjab in q'uexelok, yowalil ok wak' yowalil bay.

²⁰ A pax junok chekbej tol chi alon in k'anej yaloni, palta c'am pax tzet chi wal bay, ma xin yin junokxa comon dios ok k'anjab elok, a jun tu' yowalil chi cami, ẍi Jehová.

²¹ Palta ayex ti' chim e na: ¿Tzet wal ok yun jojtaknen elok ta manak Jehová chi alon tzet chi yalil jun chekbej tu'? quex chi mi.

²² Ta tol c'amc'al chi yun tzet chi yalil jun chekbej tu' is q'uexelok Jehová, a ton axca tu' chi yun nachaj elok tol manak Cham chi ak'on yala', yulc'al yet chi yalon ajok. Yuj tu' c'am chex xiw bay.