Dt 17 - A Txꞌan Biblia Yin Kꞌanjobal 1989

¹ C'am che yak' no wacax, c'al no calnel tol ay is tacnakil yin xajanbalil bay Jehová co Diosal, yujtol yob chi yab Cham, ta chi jun axca tu'.

² Ta a bay junok juntzan conob ok yak' Jehová co Diosal ayex tu' ok el k'umal, tol ay junok winak, ma junok ix chi yun tzet yetal tol c'am chi cha' c'ul Cham, tol c'am chi yikej is trato Cham,

³ tol chi oc yin ayilal bay juntzan comon dios, ma a bay c'u, bay xajaw, ma bay waycan chi oc ayilal, a ton bay juntzan max yal Jehová tol c'am chi oc ayilal,

⁴ a yet chi ablay k'umal tu', chi cam wal beyc'ulnelay el jun k'anej tu'. Ta yel max yun eb jun tzet yajbejtak tu',

⁵ yowalil chi ilaytok mac chi oc mul tu' bay puertail jun conob cax chi k'oklay camok.

⁶ Ta ay cawan, ma oxwan testigo, catatu' chi lowxac'al camich yiban junok mactxel tu'. Palta ta junnej testigo xin, c'amc'al chi je' low camich yiban junok mactxel tu'.

⁷ A eb testigo tu' chi babji k'okon oc ch'en ch'en yin jun ok cam tu'. Catatu' chi k'okon oc masanil eb conob ch'en yin. Caytu' chi yun yel jun yobtakilal ay e xol tu'.

⁸ Ta c'uxan ay junok owal chi aj bay e conobal, palta tol caw wal yatak nachaj elok, k'inalok axca juntzan ti': tatol yin wal c'ul junok mactxel chi mak'on cam anima, ma xin tol man yinok c'ul chi yuneni, ma axca junok owal yin tx'otx', ma junok yas chi uji, yin mi wal c'ul junok tu' chi tita ma c'amak; ma junokxa tzet yetal chi apni oc bay satak eb juez tu', asek bay jun lugar yet Jehová co Diosal tol maxax sic'can el e xol tu',

⁹ cax che lajtinen yetok eb sacerdote titnak yin yinatil Leví, c'al yetok eb juez ayoc yet tu', cax che beyc'ulnen elok. A eb tu' ok naonok tzetbil ok yun yelapnok jun k'anej tu'. A eb ok alonok tzet watx' ok yunej.

¹⁰ Cax che yunen ayex ti' atac'ala' tzet chi yun yalon eb.

¹¹ Axca wal chi yun yalon eb, axca wal tu' chi yun e yikeni. Axca wal max yun yal-lay tu', caytu' che yunej. C'am wal jabok che q'uexa'.

¹² A pax mactxel chi watx'nej yul yet, tol man axcaok max yun yalon cham sacerdote chi ak'on serbil Jehová co Diosal, ma axca c'apax yalon eb juez tu', a jun tu' chi low c'apax camich yiban. Caywal tu' ok yun lajwok ay masanil yobtakilal tu' e xol.

¹³ A yet ok yojtaknen el eb conob tu', ok xiwaj eb, manxa ok watx'nej eb yul yet.

Chekbanilej yin eb rey

¹⁴ A yet ok ex octok bay yul tx'otx' tx'otx' ok yak' Jehová co Diosal ayex, yet mayal ec'can tx'otx' e yuj, axa e cajay ec' bay tu', cax ok e yalon axca ti': Jaokab oc junok co reyal ok yajawbok co xol, axca juntzan nación ayic' co cawilal ti', quex chi mi.

¹⁵ A junok jet conob, a ok e yaoc e reyalok, tol a wal caw Jehová co Diosal ok sic'on c'apax elok. Manak junok tx'ok conobal ok e yaoc e reyalok, ma chi yal elapnok, junok tol man jet conobok.

¹⁶ Palta a jun rey tu', man xiwilok chej ok wajbaj ec'ok, man ok chektok eb winak bay Egipto yuj toj yiontek eb xiwilok no chej, yujtol a Jehová max alon axca ti': C'amxa yechel ok ex meltzoj bay Egipto junelokxa.

¹⁷ Tamwal ok yi' xiwilok ix yet watx' c'am chi ikbelay el cham yin Jehová yuj eb, tamwal ok wajbaj xiwilok ch'en oro c'al ch'en plata.

¹⁸ A yet ok oc jun rey tu' yin yikbej, ok chek watx'nelay junok copiail jun cuybanilej ti'. A wal yin tx'an babel copia ayic' yul k'ab eb sacerdote yinatil Leví, ok ilay eltek.

¹⁹ Yowalil tol ibilc'al oc copiail jun cuybanilej tu' yuj cham, cax chi cuyonc'al yin junjun c'u, yet watx' ay yelapnok Jehová co Diosal yul sat, yetok c'apaxok tol ayokab yelapnok yul sat beybalnen juntzan chekbanilej ti'.

²⁰ Yilokab cham tx'an, yet watx' c'am chi na tol miman yelapnok yintak eb yet conob, yetok c'apaxok, yet watx' c'am chi yiel ba yin junok makan juntzan chekbanilej ti'. Caytu' ok yun najatilbok is yikbej yetok yinatil bay xol eb yet conob.