Dt 15 - A Txꞌan Biblia Yin Kꞌanjobal 1989

A abil yet bekbanilal

¹ Yin uk uktak abil, cax che bek e k'anon meltzoj tzet max e yak' majanil.

² A jun k'anej ti', tix wal yayji oc ti': Masanil mac tol ay tzet max yak' majanil bay junok jet conob, c'amxa chi k'ana', yujtol a jun abil tu' max yal Jehová, tol c'amxa chi k'anlay ec' tzet yetal aytok majanil.

³ A bay junok tx'ok conobal chi je' e k'anon ec' tzet yetal max e yak' majanej tu'. Axa pax bay junok jet conob xin, c'amxa che k'anic' bay.

⁴ C'am che cha' aj can mebil yin eb jet conob, yujtol a Jehová co Diosal ok yak' yaxilal e yiban bay jun lugar ok yak' ayex tu'.

⁵ Tatol ok e yikej e beybalnen juntzan chekbanilej lanan waloncan ayex ti',

⁶ ok yak' Jehová co Diosal yaxilal e yiban, axca wal max yun yak'on is ti', xiwilxa tzetak yetal ok je' e yak'on majanil bay juntzanxa nación. Palta ayex ti', mayexnak ok e k'an tzet yetal e majanej. Xiwil juntzanxa nación ok ex yajawbok yiban, palta manak eb ok yajawbok e yiban.

⁷ Ta ay junok eb jet conob ti' meba' e xol bay junok conob tol max yak' Jehová ayon, man yobok che yut e c'ul yin, palta che col eb jet conob yin is cawxinakil.

⁸ A ti' e yet, che sa' tzet yetal bay eb, cax che yak'on majanil bay eb tzet yetal tol chi oc yopiso yuj eb.

⁹ Manchak e chaoc junok yobal nabalej yin e nabal axca ti': Ilab tol cawilxa chi jayoc yet is suk abil, a ton jun abil yet c'amxa chi k'anlay ec' tzet yetal majanebil, man quex chiok. Maj je' yob ok e yut e c'ul yin eb meba' ay xol eb jet conob ti', axa chi yunajok, c'amxac'al che yak' majanej eb janic'ok tzet chi k'an eb, talaj chi aj yaw eb bay Jehová yuj e yobc'ulal tu', cax chi oc e mulok satak Cham.

¹⁰ Manokab yobok che yab yuj chex colwajc'al bay eb, bekanokab yel e yuj, yujtol a yuj tzet watx' che yun tu', ok yak' Jehová co Diosal yaxilal e yiban yet ok ex beyc'altok.

¹¹ Ayc'alta' eb meba' e xol, yuj tu' xan ayin chi wal ayex, tol bekanokab yel e yuj bay eb jet conob, tol lanan yaben yail mebil bay yul e conobal tu'.

Ley yiban eb mosejal

¹² Ta ay junok eb jet israelal, junok winak, ma junok ix chi txonlay ayex yin e mosook, asan wakeb abil chex ak'lay serbil yuj. Axa yet is suk abil xin, che bekon elok.

¹³ A yet chi el ayex tu', c'am chi toj yin tol c'am jabok tzet che yak' bay.

¹⁴ Palta che yak' no calnel, yetok mimanok trigo c'al vino bay. Chi yal elapnok chi yi' c'apax yet yin masanil tzet yetal max yak' Jehová co Diosal ayex.

¹⁵ C'amokab chi toj c'ayc'ulal e yuj tol max on ec' c'apax yin mosejal bay Egipto, axa Jehová co Diosal max con colon eltek. Yuj tu' xan chi yak' jun chekbanilej ti' ayex tinani'.

¹⁶ Palta ta a junok eb e chekbej tu' chi yala' tol c'am chi yal c'ul chex beklaycan yuj, yujtol ay is camc'ulal e yin, c'al yin e familia, yetok c'apaxok yujtol watx' e c'ul yin,

¹⁷ ta axca tu', che yitek junok ch'en olbalej cax che jitzontok bay puertail e yatut, cax che yolon is txiquin e chekbej tu' yetok ch'en. Caytu' chi yun canxac'al can e chekbejok yin tojbalk'inal. Cay c'apax tu' chi utlay eb ix ix chi yaxac'al can oc ba yin mosejal yin junelnej.

¹⁸ Manokab yobok che yab yet che bekon el eb e chekbej, yujtol a yin wakeb abil max ex yak' serbil eb, cax asan ch'an nan is tojol eb max e yak' axca wal is tojol junok mulnajwom. Axa Jehová co Diosal ok yak' yaxilal yiban masanil tzet che yunej.

Chi sic'lay el babel yune' no no' tol icham

¹⁹ Masanil babel yune' e wacax, ma e calnel tol icham, che sic'can el no' yin yoccan yetok Jehová co Diosal. C'am che yak' mulnaj no' babel yune' wacax tu', tamwal che tzukil xil no' babel yune' calnel tu'.

²⁰ Junjunc'al abil, ok e chion no' yetok e familia satak Jehová co Diosal, bay jun lugar tol a Cham sic'nen elok.

²¹ Palta ta ay janic'ok is tacnakil no' xin, ta k'ajil, ma yob bak' sat no', ma man wal watx'ok no', c'am che yak' no' yin xajanbalil bay Jehová.

²² A no' tu', chi je' e chion no' bay conob bay cajan ex tu'. Yalc'al mactxel chi je' chion no', tac'al watx' yayji eb, ma man watx'ok yayji eb, atac'ala' yalon ley, axcac'al chi yun e chion no gacela ma no tx'ucchej.

²³ Palta c'am che chi' is chiq'uil no', asan tol che seccan ay bay sat tx'otx', axcac'al chi yun pulcantok a' aej.