Dt 12 - A Txꞌan Biblia Yin Kꞌanjobal 1989

Asannej oc jun is cajlobal Dios

¹ A ton wal juntzan chekbanilej c'al cuybanilej ti' yowalil tol ok e beybalnej yet ayex ec' bay tx'otx' tx'otx' ok yak' Jehová co Diosal e sataknej, a ton c'apax is Diosal eb jichmam jetok.

² Uchek ay masanil is txajlobal eb anima ok e yak' ayc'ay tu'. Che yak' lajwok masanil is yaltar eb bay chonlak witz c'al bay yinlak tzalan, c'al bay yichlak te te' pim xak.

³ Mak'ek poj masanil is yaltar eb, ch'en ch'en c'al te te' bay chi oc eb yin ayilal bay Asera. Che yak'on tz'a te te' tu', c'al e mak'on poj is diosal eb, yet watx' c'amxa bak'in chi oc ayilal bay comon dios bay juntzan lugar tu'.

⁴ Man cayok tu' chi yun e yoc yin ayilal bay Jehová co Diosal, axca chi yun yoc eb ayilal bay is diosal tu'.

⁵ A jun lugar ok sic'can el Jehová xol e tribual tol yet yayji ocok, a bay tu' ok ex tok oc yin ayilal.

⁶ Cax ok e yak'on e xajanbal tol ok e yak' tz'a'ok c'al juntzanxa xajanbal yuj e yion aj can Jehová. Ok e yion c'apaxtok e diezmo, e yofrenda che yak' e ti' e yak'oni, c'al e yofrenda tol chi el wal yin e c'ul e yak'oni. Ac'ala' ok e yion c'apaxtok no' babel yune' e wacax c'al babel yune' e calnel.

⁷ A bay tu' ok ex low yin tzalojc'ulal satak Jehová yetok e familia. Caytu' ok yun e loon tzet yetal che yi' yin e mulnajil atac'ala' is watx'c'ulal Cham ok yak' ayex.

⁸ A bay tu' manxa ok e yun ayex ti' axca tzet chi jun cayti' tinani', yujtol a cayti' yalc'al tzet chi cha c'ul junjun anima, a' chi yunej.

⁹ Wal yel c'amto chex apni oc bay jun lugar bay c'amxa tzet ok e na', tol a Jehová ok ak'on e sataknej.

¹⁰ Lananxa yajapnok c'ual yet ok ex ec'cantok bay a' Jordán, yet chex apnican oc bay sat tx'otx' tx'otx' ok yak' Cham e sataknej, yet mayal ex colaycan el yul is k'ab eb ajc'ul oc e yin, c'amxa xiwc'ulalil ok yun e yayji ec' bay tu'.

¹¹ Axa jun lugar ok sic'can el Jehová yet chi oc yetok, a bay tu' ok e yak' masanil tzet yetal max wal ayex tol ok e yunej. A bay tu' ok e yak' no xajanbal tol chi tz'a'i, yetokc'al juntzanxa xajanbal, yuj e yion aj can Cham, c'al e diezmo, c'al e yofrenda tol chi el yin e c'ul e yak'on bay Cham, c'al bay che yak' e ti' e yak'oni.

¹² Cax che chaon k'in satak Jehová co Diosal, yetok eb e yuninal, yetok eb e chekbej, c'al yetok eb levita ok cajay ec' e xol tu'. Ilab tol c'am is satak eb levita tu' ok cha' e yetok bay tx'otx' tx'otx' tu'.

¹³ Che yilc'al tol man comonok che yak' tz'a no' e xajanbal bay tzanc'al tzet lugaril tol chi cha e c'ul,

¹⁴ asan bay jun lugar sic'bil el yuj Jehová xol e tribual. A bay tu' che yitok e xajanbal yin e yak'on tz'a'ok, c'al e yiken masanil tzet chi walcan ayex ti'.

¹⁵ A yet chi tit yin e c'ul e chion chibej chi je' e mak'on cam junok e yet cax che chioni bay ayex ec' tu', atac'ala' tzet chi yak' Jehová ayex. Caxc'al ayex watx' e yayji atac'ala' yalon ley, ma c'amak, chi je' e chioni, axcac'al chi yun e chion junok no tx'ucchej ma sakchej.

¹⁶ Asan wal is chiq'uil no' xin, caw wal c'am chi je' e chioni ma e yuq'ueni, asan tol che seccan ay bay sat tx'otx' axca aej.

¹⁷ C'am chi je' e mitx'on bay yul e conobal is diezmoal e trigo, e vino, c'al e yaceite, tamwal no' babel yune' e wacax c'al babel yune' e calnel, tamwal e yofrenda che yak' e ti' e yak'oni, tamwal junokxa tzet yetal tol chi el yin e c'ul e yak'on yin ofrendail bay Jehová, tamwal e yofrenda chi oc batxan satak Cham.

¹⁸ Asan bay jun lugar ok sic'can el Jehová co Diosal, a tu' ok e chi' juntzan xajanbal tu', ajun eb e yuninal e yetok c'al eb e chekbej, yetokc'al eb levita ayic' e xol. A tu' che yak' tzalojbok e c'ul satak Cham yuj tzet chi yak' e mulnajil tu'.

¹⁹ Yak'ban ayex ec' bay jun tx'otx' tu', c'amokab chi toj eb levita c'ayc'ulal e yuj.

²⁰ A wal yet ok bic'oj c'al e tx'otx' yuj Jehová co Diosal bay jantak max yak' is ti' yak'oni, ta chi yochej e c'ul ok e chi' chibej, ok je' e chion no' yin tzanc'al tzet c'ual.

²¹ Ta najat cajan ex bay jun lugar max sic'can el Jehová co Diosal bay chi oc ayilal, chi je' e mak'on cam e wacax c'al e calnel chi yak' Cham ayex bay cajan ex tu', cax che chion no' atac'ala' jantak chi yochej e c'ul che chi', axcac'al max yun walon ayex.

²² Axcac'al chi yun e chion tzanc'al tzet makanil no tx'ucchej, cac'al tu' chi yun e chioni, mac watx' yayji atac'ala' yalon ley, c'al mac man watx'ok yayji, chic'al je' chioni.

²³ Palta c'am chi je' e chion chibej tol c'am chi el is chiq'uil, yujtol a is chiq'uil no' tu', is k'inal no' yayji ocok. C'am chi je' e chion no chibej tu' yetok is k'inal.

²⁴ Asan tol che seccan el is chiq'uil no' bay sat tx'otx' axca aej.

²⁵ Manchak e chi' ma e yuq'uen is chiq'uil no no' tu' yet watx' watx'c'al chex eloc yetok e yuninal yuj che yikej bay Jehová.

²⁶ A pax masanil tzet yetal tol yet-xa Dios yayji e yuj xin, c'al tzet yetal tol mayal e yak' e ti' e yak'oni, yowalil che yitok bay jun lugar max sic'can el Cham.

²⁷ A bay yiban altar yet Jehová co Diosal, a tu' che yak' xajanbal tol chi ak'lay tz'a masanil is chibejal c'al yetok is chiq'uil. Axa pax junxa makan no xajanbal xin, chi je' e chion is chibejal no', asan wal is chiq'uil no' che seccan oc yin altar bay satak Cham.

²⁸ Chi cam e yabeni c'al e yiken masanil tzet chi wal ti', yet watx' watx'c'al ok yun e beytok yetok eb e yuninal yin tojbalk'inal, yujtol che yikej bay tzet chi cha' c'ul Jehová co Diosal cax tojol exc'al yul sat Cham.

Tenchebal yet c'am chi oc ayilal bay yechelej

²⁹ A yet ok yak'on ayc'ay Jehová co Diosal masanil juntzan nación e satak ayex ti', a yet mayal ayc'ay tu xin, ayexxa ok ex cajay can bay sat tx'otx'al eb tu'.

³⁰ Caw wal chi cam e yiloni tol c'am chex tzakloj yintak beybal eb axca chi yun yoc eb yin ayilal bay is diosal, yujtol ta axca tu' ok e beybalnej, ok jayoc yowal c'ul Cham e yiban. Tamwal che k'anlej ec' tzet chi yun yoc eb yin ayilal bay is diosal tu', yet watx' caytu' che yun ayex ti'.

³¹ Manchak ex oc ayilal axca tu' bay Jehová co Diosal, yujtol a masanil tzet yetal tol yajbil el yuj Cham, c'al c'am chi techaj yuj, a' chi beybalnej eb yin ayilal bay is diosal. Toltax chi yak' tz'a eb is yuninal yin xajanbalil bay is diosal tu'.

³² Ikejek e beybalnen masanil tzet chi walcan ayex ti'. C'am che yiel janic'ok, tamwal e yaon oc tz'akil juntzan chekbanilej ti'.