Dt 11 - A Txꞌan Biblia Yin Kꞌanjobal 1989

Is mimanbilal yayji oc Jehová

¹ Camc'ulnejek Jehová co Diosal, ikejek masanil tiempo tzet chi chek e yunej, is cuybanil c'al is chekbanil c'al is ley.

² Naek tinani' yin tzet max e cuycan yin masanil tzet max yun Jehová e yuj. Ayex ti' max e yila', manak eb e yuninal max ilon tzet max yun Cham. Ayex ti' max e yil is mayk'ak'al c'al is yipalil c'al milagro max yunej.

³ Max e yil tzet max yun Jehová bay Egipto yin cham reyal conob tu' c'al yiban masanil anima.

⁴ Max e yil tzet max yun Jehová yetok eb soldado yet cham reyal Egipto, c'al jantak carruaje ibil oc yuj no chej. Masanil juntzan tu' max mukaycantok yuj Jehová bay yul a' Cakyin Mar yet max con uktelay yuj eb, axa Cham max c'ayon el eb yin junelnej.

⁵ Naek c'apaxtek jantak watx'c'ulal max yun Cham jin bay takin tx'otx' masantac'al yet max on jayoc cayti'.

⁶ Che naon c'apaxtek tzet max yun Cham yetok Datán c'al yetok Abiram is c'ajol Eliab, titnak yin is tribual Rubén. Max poj ba tx'otx' tx'otx', max mukaycan aytok eb yetok is familia, yetok is mantiado eb, c'al yetok is chekbej eb, c'al yetok is jobbejal no' eb. Cay wal tu' max yun c'ayil el eb yuj Jehová co satak.

⁷ Ayex ti' testigo ex yin masanil tzet max yun Cham tol c'ayubtakxac'al yoqui.

Tx'otx' tx'otx' max yak' Jehová is ti' yak'oni

⁸ Yuj wal tu xin, ikejek masanil is chekbanil Jehová chi waltek ayex ti' tinani', yet watx' chi oc wal e yip cax chex toj cajan bay sat tx'otx' tol ok oc e yetok tu'.

⁹ Yetok c'apaxok yet watx' najatil ok ex ec' cajan bay tx'otx' tx'otx' caw wal yax sat tu', a ton tx'otx' max yak' Jehová is ti' yak'on bay eb jichmam c'al bay yinatil eb.

¹⁰ A tx'otx' ok ak'lay ayex tu', man lajanok axca tx'otx' Egipto bay max con tita. A bay tu' chi lajwi e yawon e yawoj, cax che yaon oc yal axca junok hortaliza.

¹¹ A pax wal tx'otx' bay ok ex apnok oc tu xin, ay is witzlakil tx'otx'. Ay c'apax is pananil, ayc'al oc yal tx'otx' yuj nab chi yak' Jehová.

¹² A jun tx'otx' tu' taynebil yuj Cham, ayc'al oc sat yin tx'otx' masanil abil.

¹³ Yuj tu xin, ikejek is chekbanil Cham yin bayc'al ijanilal, juntzan lanan walon ayex ti' tinani'. Camc'ulnejek Jehová co Diosal, ak'ek serbil yetok masanil e c'ul, c'al masanil e yanimail.

¹⁴ Ta axca tu' ok e yutej, ok yak'c'al babel nab c'al yet tzunanil, xan caw wal watx'c'al ok yun e yawoj, e trigo, e vino c'al e yaceite.

¹⁵ Ay c'apax yax ac'un ok lo' e jobbejal no', cax xiwil ok yun yaj can sat e yawoj yet watx' ay e lobej.

¹⁶ Naanokabc'al e yuj xin, tol manchak e yak' c'aytok e nabal, cax che pojon el e ba yintak Jehová, axa talaj bay junokxa comon dios chex oc yin ayilal, c'al e tzakloj yintak.

¹⁷ Axa chi yunej chi tit yowal c'ul Cham e yin. C'amxa chi yak' nab, xan manxa ok satnok masanil e yawoj, cax chex cam yuj wajil bay sat tx'otx' tx'otx' caw wal yax sat lanan yak'on Cham ayex.

¹⁸ Chi cam wal e yabencan juntzan k'anej ti' xin, cax che c'ubancan yin e nabal. C'alek oc yin e k'ab c'al yin e nan sat.

¹⁹ A juntzan ti' ok e yak' cuy eb e yuninal yin junjun c'u. Ayexc'al oc e yalon bay eb, yet ayex ec' bay e yatut, c'al bay yulak be yet chex ec'jabi, c'al yet chex waycan ajok, c'al yet chex aj wanok.

²⁰ Cax che tz'iben oc yin is pilaliẍal c'al yin is puertail e yatut,

²¹ yet watx' chi najatilbi e k'inal yetok eb e yuninal bay sat tx'otx' tx'otx' max yak' Jehová co Diosal is ti' yak'on bay eb jichmam. Ok ex cajayc'al ec' bay tu' yak'ban ayic' satcan bay yiban tx'otx' tx'otx' ti'.

²² Tatol che yikejc'al masanil juntzan chekbanilej chi walcan el ayex ti', tol che camc'ulnej c'apax Jehová co Diosal, yikem exc'al e yunen bay masanil tzet chi yal Cham,

²³ catatu' bian, a Cham ok ion el masanil juntzan mimek nación tu' e satak, cax ok e cajoncan is tx'otx'al juntzan nación tol ay yip e yintak.

²⁴ Masanil lugar bay ok ex ec'ok, e yet ok yuncanok; chi tojtac'al tx'otx' bay takin tx'otx' masantac'al chi apni oc bay Líbano, cax chi tojtac'al bay a' miman aej Éufrates masantac'al chi apni oc bay a' mar Mediterráneo.

²⁵ C'am mac ok je' tec'ban ba e satak. A Jehová ok aon oc xiwc'ulal c'al tacanc'ulalil xol anima bayc'al ok ex ec'ok, axca max yun yak'on Cham is ti' ayon.

²⁶ Abek xin, a yet jun c'ual ti' chi wak' e sic'lej, a mi watx'c'ulalil che yochej ma a yowal c'ul.

²⁷ Ok e cha' is watx'c'ulal Jehová co Diosal tatol che yikej is chekbanil lanan walon ayex ti'.

²⁸ A yowal c'ul ok tit e yiban tatol man ok e yikej juntzan chekbanilej ti' cax che yican el e ba yintak Cham cax che yaon oc e nabal yin comon dios tol man e yojtakok, cax chex tzakloj yintak.

²⁹ A yet mayal quex yioctok Jehová co Diosal bay sat tx'otx' tx'otx' tol ok yak' ayex tu', ok e yalon el watx' k'anej bay yich witz Gerizim, c'al catab k'anej bay yich witz Ebal.

³⁰ A juntzan witz tu', a tu' ay bay satak ec'tok miman be chi ec'tok, bay k'axepal ec'tok a' Jordán, bay yetc'ulaltok bay yayub c'u, bay is tx'otx'al eb cananeo, eb anima ay bay is yac'alil ti' a' miman Jordán bay sataktok Gilgal. Junej ay yetok bay matx'jilak yet More.

³¹ Lananxa yapni yorail yet ok ex k'axpoj ec'tok bay a' Jordán, cax chi occan tx'otx' tx'otx' tu' e yetok yuj Jehová co Diosal. A yet mayal e yi' xin, axa e cajayxac'al ec' sat tx'otx' tu',

³² yowalil tol ok e yikej masanil chekbanilej chi walcan ayex tinani'.