Dt 10 - A Txꞌan Biblia Yin Kꞌanjobal 1989

Max watx'ji is q'uexel ch'en cab jenan ch'en

¹ Lajwi tu' max yalon Jehová ayin axca ti': Jos cabok jenan ch'en ch'en, axca ch'en max wak' ayach yet babelal. Cha watx'nen c'apax junok te caẍa, cax chach ajtek ayin bay jolom witz ti'.

² Cax ok in tz'iben pax oc k'anej ayoc yin ch'en max wak' ayach yet babelal, a ton ch'en max a k'ok pojok. Axa ch'en yet is cayelal ti xin, ok aytok ch'en yul caẍa tu', ẍi Cham.

³ Cax max in watx'nen jun te caẍa, a te' acacia max waoc yin. Max in joson ch'en cab jenan ch'en tu', max wion ajtok ch'en wetok bay jolom witz.

⁴ Max tz'iben oc Jehová lajoneb mandamiento yin ch'en cab jenan ch'en tu' junelxa, axca max yun tz'iben ch'en yet babelal, a ton juntzan k'anej max yal Cham ayon nan xol k'ak'ej bay jolom witz yet wajan on ec' bay tu'. Max yak'on Cham ch'en ayin.

⁵ Axa in paxaytek bay jolom witz tu xin, cax max waon aytok ch'en bay yul te caẍa tu' axca max yut yalon Jehová ayin. Ayaytok ch'en bay tu' tinani'.

⁶ (Max el eb conob Israel bay Beerot-bene-jaacán, cax max apni eb bay Mosera. A tu' max cam cham Aarón, max mukay bay tu'. Axa is c'ajol chi yik Eleazar max occan is q'uexelok yin sat sacerdoteal.

⁷ Lajwi tu xin, max el pax eb conob Israel bay tu' cax max apni oc eb bay Gudgoda. Max el pax eb bay tu xin, max apni oc eb bay Jotbata. A bay jun lugar tu' caw wal ay a' aej.

⁸ A yet tu' max ak'lay yikbej is tribual Leví yuj Jehová yet chi yiontok eb te' is caẍail trato Cham, c'al yak'wi serbil eb bay satak Cham, c'al yalon eb watx' k'anej yiban eb anima yin is bi Cham. Axca ton tu' chi yunc'al eb tinani'.

⁹ Yuj tu xin, a eb tribual Leví tu' maj cha eb is satak yin tx'otx' tx'otx', yujtol a Jehová ayoc is satakok eb, axca max yut yalon Cham.)

¹⁰ A yet jun tiempoal tu' cawinak c'u c'al cawinak ak'bal ayin ec' bay jolom witz tu', axca max wun yet babelal. Ac'ala' yet junelxa ti' max cha' c'ul Jehová yaben tzet max wala', xan maj ex c'aylay el yuj Cham.

¹¹ Max yalon Cham ayin axca ti': Asi', cax cheontok jun conob tu', yet chi toj cha eb tx'otx' tx'otx' tol ok oc yetok eb, a ton tx'otx' max wak' in ti' wak'on bay eb e yichmam, ẍi Jehová.

A tzet yowalil chi yikej Israel

¹² A tinani' xin ex wet conob Israel, ¿tzet chi k'an Jehová co Diosal ayon? Tix tzet chi k'an Cham ti', tol ayokab yelapnok yul co sat, cax tzakanokab onc'al yintak, cax chi co camc'ulneni c'al joc yin ayilal bay, yetok masanil co c'ul c'al masanil janemail.

¹³ Ta chi jikej masanil is cuybanil c'al is chekbanil, watx'c'al ok on eloc yin masanil.

¹⁴ Beyc'ulnejek elok tol a Jehová co Diosal, a' ay yet satcan yetokc'al bay sataktok satcan, tx'otx' tx'otx' ti' yetok masanil tzet ayay sat.

¹⁵ Yujtol a Jehová ay is camc'ulal yin eb jichmam, xan max sic'can el Cham yinatil eb, ayon toni, max on sic'lay el xol juntzanxa nación yuj Cham axca ton lanan jilon ti' tinani'.

¹⁶ Aek oc jun trato tu' yin e c'ul, cax manchak e pitnejc'al e ba.

¹⁷ Yujtol a Jehová co Diosal, ec'ban yiban tzet chi al-lay oc diosal, Yajaw Cham yiban eb yajaw. Ay is may, moj miman yelapnok. C'amc'al bay q'uexan chi yut c'ul yin anima. C'am chi cha' tumin yuj is beyc'ulal, tamwal chaon sabalej yet chi montelayi.

¹⁸ Chi ok' is c'ul yin eb meba', c'al yin eb ix ix camnakxa yichamil. Ay c'apax is camc'ulal yin eb tx'ok conobal ayic' co xol, xan chi yak' is lobej c'al is pichil eb.

¹⁹ Axcaokab tu' c'apax chi junej, yujtol tx'ok conobal max yun jec' cajan bay yul conobal Egipto.

²⁰ Asanokab Jehová co Dios miman yelapnok yul co sat. Asan bay Cham chon oc ayilal, cax yikemc'al chi jut co ba bay. Ta ay bay chi jak' co ti' yin junok tzet yetal asannejokab yin bi Cham chi jak'a'.

²¹ Jiek aj can Jehová co Diosal. Juj xan max yun Cham xiwil tzet ay is may c'al c'ayubtakxac'al yili, axca wal max yun jiloni.

²² A yet max apni oc eb jichmam bay Egipto, asan 70 is bisil eb, axa tinani' xin, a Jehová max ion aj can co bisil, axcaxac'al bisil waycan bay satcan.