Dn 9 - A Txꞌan Biblia Yin Kꞌanjobal 1989

Max txajli Daniel yuj is conob

¹ Max yalon Daniel: A Darío c'ajol Asuero, titnak yinatil bay xol eb aj Media, a tu' ayoc yin reyal bay makbej eb caldeo.

² A yet babel abil yoc Darío yin yajawilal, ayin Daniel in ti' lanan in cuywi yin juntzan tx'an libro yet Dios cax chin naon yin tzet yetal max yal Jehová bay Jeremías is chekbej, tol a Jerusalén ok cancan yin tol uchbilayok yin 70 abil, ẍican yul tx'an un yet Jeremías.

³ Yuj tu xin max in txajli, c'al in tewi bay Dios, cax max in oc yin c'ajbanc'ulal; max waon oc el pichilej, max in ay chotan xol tik'ak'il tan.

⁴ Max in txajlic'al bay Jehová in Diosal, max walon in ba bay axca ti': Mamin, Wajawil ach, mimanbil ach, c'al tol ay a may. Chi yunc'al a trato, cax cha tx'oxon a camc'ulal bay eb ay is camc'ulal en, a ton eb chi iken a chekbanil.

⁵ Max oc co yobtakil c'al co tenomtakil on ayach. Axac'al yobtakil chi junej, manxa naanok ach juj. Max jintaknejxac'al can el a chekbanil c'al a ley.

⁶ Caw wal maj co cha jab janic'ok bay tzet max yal eb a chekbej. Max yal eb a k'anej bay eb co reyal on, bay eb yajaw yayji co xol on, bay eb jichmam on, c'al bay masanil co conob on.

⁷ Ach ti' Mamin, caw wal tojol ach, xal on ayon Israel on ti' xin, q'uixawtak onxac'al. Mawal axca eb titnak bay Judá c'al bay Jerusalén yetokc'al juntzanxa eb jet israelal cajan bay najat c'al bay cawil, ayon ton max on a saklemnejcantok yuj max oc co tenomtakil ayach.

⁸ Ayon ti' Mamin Jehová, caw wal lajan onc'al axca eb co reyal, eb yajaw yayji co xol, yetokc'al eb jichmam. Q'uixawtakxac'al co c'ul on a satak, yujtol max oc co mul on ayach.

⁹ Palta ach ti', co Diosal ach Mamin. Caw wal ay a yabenc'ulal c'al a mimanc'ulal. Xal on xin, asanxac'al tenomtakil chi jun a satak.

¹⁰ Yelxac'al maj wal jikej ayach Mamin Jehová co Diosal, axca max yun a chekon yal eb a chekbej ayon.

¹¹ Ayon ti' max co ten a chekbanil, majxac'al jochej max jab tzet max ala'. Yuj wal co mul tu' xan max jay jiban on masanil juntzan yailal tz'ibbilcan bay yul tx'an libro max tz'ibej a chekbej Moisés.

¹² Mayal yun tzet yetal max ala' tol ok jay jiban ayon ti', c'al yin eb co yajawil on. Caw wal miman max yun ak'on yailal yiban Jerusalén yintak junokxa conob.

¹³ Masanil wal juntzan yailal tz'ib yayjican bay tx'an libro yuj cham Moisés, max jayoc jiban tinani'. Palta ayon ti' majxac'al wal on tzakloj entak ach Jehová co Diosal. Axac'al yintak yobtakil, max on tojcanok, majxac'al jikej a k'anej.

¹⁴ Yuj wal tu xin Mamin Jehová, xan max a na' aontek jun miman yailal ti' jiban on. Yujtol ach ti', ach co Diosal, tojol ach yin masanil tzet chonej, axa ayon ti' yelxac'al maj co cha jab ayach.

¹⁵ Ach co Diosal tol co Yajawil ach, max a tx'ox wal a miman ipejal yet max eon eltek eb jichmam on bay Egipto. Caw wal miman a binaj yet tu', ac'ala'c'al ton axca tinani', palta ayon xin, max oc co mul, asanc'al yobtakil chi junej.

¹⁶ Jojtak Mamin tol chonc'al tzet chala'. Yuj tu' elok wal yin a c'ul eon el yailal, c'al yowal a c'ul ayoc yiban conob Jerusalén, yujtol a conob yayji, c'al et yayji jun tzalan Sión. Masanil wal nacionlak ay cawilal chi buchwaj eb yin a conob Jerusalén, yujc'al wal co yobtakil on, c'al yuj is yobtakil eb jichmam on.

¹⁷ Ach co Diosal, ab wal yoc in txaj c'al in tewilal ayin a chekbej in ti'. Yuj wal a binaj Mamin, tx'ox a watx'c'ulal yiban a templo tol uchbil ayok.

¹⁸ Cha ab xin Mamin, ila wal tzetbil jayji, tol max uchlaytok jun conob tol chi binaj tol et yayji. C'am chon tewi ayach yetok co watx'il yul jet, palta a wal yuj a miman watx'c'ulal.

¹⁹ Mamin Jajawil, tak'wej on, ak' tan co yobtakil on, sebach, colwajan jetok Mamin. Yuj wal a binajbilal Mamin, manchak ach mayji on a coloni, yetok Jerusalén, yujtol ojtakbil tol et on, quin chi yin in txaj.

Max al-lay yin ayokto yuj 70 semana

²⁰ Max in occ'al ijan in txajli yin walon ajtek in mul, c'al walon is mul in conob Israel, cax chin tewi oc yin Jehová in Diosal yuj is tzalan Sión tol yet yayji ocok.

²¹ Yak'ban lanan in txajli xin, axa Gabriel, jun max tx'ox ba wil yet yalantok, max jayoc jenenok bay ayin ec'ok, axca wal yorail yet chi ak'lay xajanbal bay Jehová yet yayc'ualil.

²² Max yalon ayin axca ti': Daniel, chin jayoc ayach cax chi ul wak'on a jelanil yet chi nachaj el oj juntzan cha cuy ti'.

²³ A wal yet max a chaon oc a txajli, max paktzen Dios a txaj, xan chin jayoc yet chi ul wal ayach, yujtol caw wal ochebil ach yuj Dios. A tinani' xin, taynej wal ab jun k'anej ti' cax nachajokab el oj jun tzet max el ti':

²⁴ Ok ec' 70 semana*fn* yiban eb et israelal c'al yiban a conob tol yet Dios yayji, masantac'al yet chi lajwican ec'nakilal c'al mulej, cax chi ak'lay tan mulej tu', axa yayjic'al ec' tojolal yin tojbalk'inal. A yet tu' ok yuncan el masanil tzet max tx'oxlay yil eb chekbej Dios, c'al tzet albilcan yuj eb, cax ok alay oc jun sic'bil yuj Dios yin yopiso.

²⁵ Yowalil ok nachaj el jun ti' oj: A yet ok lajwok yal-lay chekbanilej tol chi ca watx'nelay aj conob Jerusalén, ok ec'tok ukeb semana, c'al yetok 62 semana. Catatu' ok jay jun Yajaw tol sic'bil elok. A yul jun tiempoal tu' ok ca watx'nelay aj calleal c'al is murallail Jerusalén xol xiwil yatakilal.

²⁶ A yet mayal lajwican ec' 62 semana tu', cax ok ilay el is k'inal jun Yajaw sic'bil el tu', xan man ok yi' tzet t'inan yioni. Lajwi tu' cax ok ayc'ay templo c'al conob Jerusalén yuj is conob jun yajaw ok jayok. Ayman ok uchlay pax lajwok Jerusalén axca jay junok a' elom aej. Ok beyc'altok yoc owal c'al uchlejbail atac'ala' tzet nabil yuj Dios masantac'al yet is lajub c'ual.

²⁷ Ok watx'nej jun yajaw tu' is trato yetok xiwilok eb anima yin junxa semana, palta yet nan wal ayoc jun semana tu', axa tenon oc wanaj yak'lay xajanbal c'al ofrenda. Axa jun etnewom tu' ok yaon ajtok tzet yetal tol yajbil yuj Dios bay chon templo. Ay wal ec' bay tu' masantac'al ok yatek Dios tzet yetal nabil yuj yiban jun etnewom tu', ẍi Gabriel tu' ayin, ẍi cham Daniel.