Dn 6 - A Txꞌan Biblia Yin Kꞌanjobal 1989

Max k'oklay aytok Daniel bay olan bay ayic' no coj

¹ Max yaon oc cham rey Darío 120 gobernador yet chi yil eb junjun makan conob bay yul is makbej.

² Max yaon oc oxwanxa yel mimek yikbej yiban eb gobernador tu', yuj yilon eb, c'al taynen eb masanil tzet yetal, yet watx' tz'akan chi yun yak'lay tojlabal bay cham rey tu'. A juntzan yelxac'al mimek yikbej tu' ayoc Daniel xol eb.

³ Jun wal bek max txecloj el Daniel xol eb yet yajawilal tu' yuj watx'c'al chi yut ba. Yuj tu' xan max na cham rey yin yaon oc yin sat yajawilal bay yul is nación tu'.

⁴ Axa juntzanxa eb yet yajawilal Daniel tu' max sayon eb tzet chi yun yak'on ayc'ay yin yopiso tu'. Palta a Daniel xin, tutun wal tol caw wal yikem, c'am chi elk'an yin tzet chi yunej, pitz'an c'ul yin yopiso. Yuj tu xin, c'am wal junok tzet yetal max je' yalon aj eb yin,

⁵ xan max occ'al ijan eb naoni, cax max yalon eb: C'am wal junok tzet chi je' jalon aj yin Daniel ti', ta man yinok is religión chi co na' junok k'anej, ẍi eb.

⁶ Yuj tu' xan max lajtinej juntzan eb yajaw tu' yet chi toj eb k'anjab bay cham rey Darío. A yet ayic' eb bay is satak cham tu' max yalon eb axca ti': —Mamin rey Darío, ayokabc'al ekbej yin tojbalk'inal.

⁷ Max co wajbaj oc co ba on co masanil ayon yajaw on ti' bay yul nación ti' yin k'umbalba. Max co naoni tol cha watx'nej junok ley cax chi al-lay xol masanil anima bay masanil yul a makbej ti', tol c'am junok mactxel chi yiay ba, c'al txajli bay is diosal tamwal k'anon tzet chi yochej bay junok yet animail yin junok xajaw, palta asan ayach mamin rey, chi yal ba. A mactxel c'am chi yikej jun ley ti', tojolc'al yalay aytok bay olan bay ayic' no coj.

⁸ Yuj tu xin, mamin rey, ak' firmar jun ley ti', yet watx' c'am mac chi je' q'uexoni, atac'ala' co ley ayon medos c'al persas on ti', tol c'am chi je' q'uexchaji, ẍi eb.

⁹ Yuj tu' max yaoc cham rey Darío firma yin jun ley tu'.

¹⁰ Axa yet max yaben Daniel xin, tol mayal al-lay el jun ley tu', max toj bay yatut cax max ajtok bay jun is cuarto can, cax jakban is wentena acantok bay yetc'ulaltok Jerusalén, max ay jajanok max txajli bay Dios. Oxel max txajli yet jun c'ual tu' axca chi yunc'alta'a.

¹¹ Axa juntzan winak tu xin, max wajbaj oc ba eb, max yilon eb tol lanan txajli Daniel c'al tewi bay Dios.

¹² Axa toj eb bay cham rey tu'. Max bet yalon eb yuj jun ley mayal al-lay el tu', max yalon eb axca ti': —Tutun max a chek al-lay el jun ley tol ẍi axca ti': Tzanc'al mactxel chi yal ba bay is diosal, ma bay junokxa tx'ok animail yin jun xajaw cax manak bay cham rey chi yal tzet chi yochej, yowalil tol chi k'oklay aytok bay olan bay ayic' no coj, ẍi. ¿Man mi yelok axca tu'? ẍi eb. —Axca ton tu' max yunej. A jun ley tu' yowalil chi ikelayi, atac'ala' co leyal ayon medos c'al persas on ti', tol c'am chi je' q'uexlay tzet chi yala', ẍi cham rey.

¹³ Cax max occ'al ijan eb yalon axca ti': —A Daniel, jun max ilaytek bay Judá, c'am chi yikej. C'am jabok chi xiw ayach mamin rey, cax c'am jabok yelapnok jun ley tu' yul sat. Mayal wal jila' tol oxel wal chi txajli bay is Diosal yin junjun c'u, ẍi eb.

¹⁴ A yet max yaben cham rey axca tu', cax max oc yin cusc'ulal. Masanil jun c'ual tu' max sayic' tzet chi yun col-lay el Daniel yuj.

¹⁵ Axa yet lananxa toj c'u max wajban paxtok ba juntzan winak tu' satak cham rey, max yalon eb: —Ojtak wal mamin rey, tol atac'ala' co ley ayon medos c'al persas on ti', ta ay junok k'anej ma junok ley bay mayal yalil cham rey, c'amxa chi je' yec'tok, ẍi eb.

¹⁶ Lajwi tu xin, max chekon cham rey yilaytok Daniel, cax max k'oklay aytok bay olan bay ayic' no coj. A yet c'amto chi k'oklay aytok, max yalon cham rey bay: —Matawal ok ach col-lay yuj a Diosal tol ayachc'al oc yin ak'on serbil, ẍi cham.

¹⁷ A yet mayal aycantok Daniel bay ayic' no coj tu', cax max yiontek eb jun ch'en ch'en, max yaoncan oc eb is makilok, axa yaoncan oc cham rey tu' is sello yet is yikbej yin ch'en, c'al is sello eb mimek yajaw yayji yetok, yet watx' c'am chi tenlay ec' tzet max al-lay yin Daniel tu'.

¹⁸ Max lajwi tu', max toj cham rey bay is palacio, palta majxa lowok, majxa chek yilaytek eb chi ak'on tzalojbok c'ul. Max toj wayok, palta junelnej maj oc is wayan yet jun ak'bal tu'.

¹⁹ Max pet aj wanok, cax max toj lemnaj ti' olan bay ayic' no coj tu'.

²⁰ A yet max apni oc cham rey bay is cawilal tu', cax max awji bay Daniel. Yin cusiltakxac'al max yut awjok ba, max yaloni: —Daniel, ach chekbej Cham Dios iquis, ¿maxmi je' yuj a Diosal tol ayachc'al oc yin ak'on serbil tu', ach colon el bay no coj tu'? ẍi cham.

²¹ Max tak'wi Daniel axca ti': —Mamin rey, ayokab ekbej yin tojbalk'inal.

²² A in Diosal max chektek is yángel, a' max makchen is ti' no coj ti', yuj tu' c'am wal jabok tzet max in yut no', yujtol yojtak Dios tol c'am wal jabok in mul, cax c'am tzet yetal yob max wun c'apax ayach, mamin rey, ẍi Daniel.

²³ Yel miman max yun tzalojbi aj cham rey, cax max chekon cham yilay ajtek Daniel bay ayic' no coj tu'. Axa yet max ilay ajtek tu xin, max yilon eb tol c'am wal jabok bay ay jabok yas yinlak is mimanil, yujtol asannej wal is Diosal ayoc yipok c'ul.

²⁴ Max lajwi tu xin, cax max chekon cham rey toj tit eb max alon aj k'anej yin Daniel tu', cax max k'oklaytok eb yetok yistzil c'al yetok yuninal bay xol no coj tu'. C'amtoc'al chi ayc'ay eb xol no', cax chi oc jucnaj no' yin eb, coc'xac'al max yuntok eb yuj no'.

²⁵ Lajwi tu' max tz'ibentok cham rey Darío k'anej bay masanil anima c'al tiejlak ay bay yul is makbej ti', max yalontok: Chi watok cawil e c'ul.

²⁶ Chi walon ayex e masanil bay yul in makbej, tol mimanokab yelapnok is Diosal Daniel yul e sat. Yujtol iquis Dios toni, cax ayc'al ec' yin tojbalk'inal. A is yikbej c'am yechel chi c'ayilok, tamwal is lajubal.

²⁷ Asannej oc Cham colwajwom c'al bekwajwom. A' chi ak'on yechelej tol c'ayubtak yoc bay satcan c'al bay sat tx'otx' ti'. A' wal max colon el Daniel bay no coj, ẍitok cham rey.

²⁸ Cax max occ'al Daniel tu' yin yikbej yet ayoc cham Darío yin reyal, yet ay c'apax oc cham Ciro aj Persia yin reyal.