Dn 5 - A Txꞌan Biblia Yin Kꞌanjobal 1989

A tzet max tz'ibelay bay sat pared

¹ Axa max yunej a cham Belsasar, reyal Babilonia, max yawtej jun mil eb mimek yikbej bay yul is nación yin jun k'in. A yin jun is miman k'in tu', max oc loj c'al uq'uej an. Max uc'wi an cham yetok eb.

^2-3 Lananxa somchaj c'ul cham rey Belsasar yuj uq'uej an, cax max chekon toj tit copa c'al sec' naba oro, juntzan yinaktek Nabucodonosor is mam icham, bay templo bay Jerusalén. A yul juntzan copa c'al juntzan sec' max bet ilaytek tu', a tu' max yuc' yan yetok eb xal is yistzil yetokc'al juntzanxa eb xal is cab yistzil, c'al yetok masanil mac ayic' bay k'in tu'.

⁴ Masanil eb, uq'uem anxac'al el eb, cax max yion aj can is diosal naba oro, plata, bronce, hierro, te' c'al ch'en.

⁵ A wal yet jun bek tu' cax max tx'oxon aj ba jun k'abej bay sakk'inal yuj candil, cax max c'oli tz'ibli oc bay sat pared bay yul na tu'. A wal yet max yilon cham rey jun k'abej chi tz'ibli tu',

⁶ sakxac'al max yun yili sat yuj xiwilal. Toxac'al max baybon aj yakan max paxxac'al yip.

⁷ Ayman max el yaw cham, max yawtentek eb tz'akan ay c'ul, eb chi nachaj el yuj tzetbil yayji waycan, c'al eb naom el k'anej. Max yalon bay eb: —A mac chi je' yilon juntzan tzet yetal tz'ibbil oc tu', cax chi yalon ayin tzet chi yal elapnok, chi alay oc junok pichilej púrpura yin, cax chi alay c'apax oc junok cadena oro yin is nuk', cax chi oc yin yet is yox yajawilal bay in makbej ti', ẍi.

⁸ Masanil eb tz'akan c'ul ayoc yopiso yin yak'on nabal cham rey, max octok eb bay yul jun cuarto, palta c'am wal junok max je' nachaj el yuj, tzet yelapnok, c'al coc' alnen el bay cham rey tu'.

⁹ Cax max texac'al xiwaj cham rey Belsasar, sakxac'al max yun yili sat. Axa masanil eb winak ayic' yetok bay tu', c'amxa chi nachaj el yuj eb tzet chi yunej.

¹⁰ A yet max yaben xal reina, is txutx cham rey tu', yel yaw, c'al yetok eb awtebil, max octok xal bay yul cuartoal bay ayoc k'in tu', max yalon axca ti': —Ayokabc'al ekbej yin tojbalk'inal. C'amokab chach oc il, cax c'amokab chach sakbi el yuj xiwilal,

¹¹ yujtol a bay yul a makbej ti' ay jun winak chi je' nachaj el yuj. Tol ayoc is jelanil juntzan dios yin. A yul is tiempoal a mam icham, a jun winak tu' max tx'ox wali tol ay jun is nabal caw wal watx', jelan, aj nabal wal sic'libil axca yet eb dios. Yuj tu' xan a rey Nabucodonosor a mam icham, a' max aon oc jun winak tu' yin yajawilalok eb tz'akan ay c'ul, c'al eb naom el k'anej, c'al eb aj nabal bay yul is nación ti'.

¹² A jun winak tu' Daniel yoc is bi, axa a mam icham max q'uexon is bi yin Beltzasar. Yelxac'al q'uexan is jelanil c'al yojtakbilal, yet chi je' nachaj el wayichej yuj, cax chi je' nachaj el yuj tzet chi yal elapnok junok k'anej tol ya' nachaj elok, c'al watx'nen el cawxinakil yatak yayji ocok. Awtelayokab Daniel tu xin. A' ok ak'on ojtaknej el tzet yelapnok juntzan letra bay sat pared tu', ẍi xal bay.

¹³ Axa yawtelay Daniel tu xin, max ilaytok satak cham rey cax max k'anlen bay: —¿Ach mi ti' chek Daniel, jun aj Judá ibiltek preso yuj Nabucodonosor in mam icham?

¹⁴ Max al-lay ayin tolab ayoc jelanilal juntzan dios en, tolab caw wal ay a nabal, jelan ach,

¹⁵ xan max ach wawtej. Ilab max wawtej masanil eb winak tz'akan ay c'ul, c'al eb aj bal bay yul nación ti', yet chi yawtej aj eb juntzan k'anej tz'ibbil ay ti', c'al yalon eb ayin tzet yelapnok, palta tamwal jabok chi nachaj el yuj eb.

¹⁶ Max al-lay ayin tolab chi je' oj a watx' alnen el k'anej tol yatak nachaj elok, xan ta chi je' oj, awten aj juntzan k'anej ti', cax chalon ayin tzet yelapnok. Ok alay wal oc pichilej tol púrpura en, cax ok alay oc junok cadena oro yin a nuk', cax ok ach oc yin yet is yox yajawilal bay yul in makbej ti', ẍi cham rey tu'.

¹⁷ Cax max yalon Daniel axca ti': —Canokab a sabal tu' etok mamin rey, cax chi je' ak'on jun ikbej tu' bay junokxa, palta ok wal ayach tzet wal yelapnok juntzan k'anej tz'ibbil oc bay sat pared ti'.

¹⁸ Mamin rey, a cham Dios Axac'al Ocok, a' max ak'on ikbej, mimanbilal, c'al is mayk'ak'alil bay Nabucodonosor a mam icham.

¹⁹ A wal yuj ikbej max ak'lay bay tu', xan max xiw masanil anima bay junjun nacionlak c'al tiejlak, tol miman yelapnok cham rey tu' yul sat eb. Chi je' yak'on camok c'al yaoncan yin yiquisal mac chi yochej c'ul. Ay mac max ilay can yuj, ay c'apax mac max ilay ay yuj, atac'ala' bay chi yochej c'ul.

²⁰ Palta a wal yet max maynen aj ba xin, max etax el is beybal, max ilay ec' is yikbej yin reyal tu', c'al is mimanbilal.

²¹ Max uktelay el xol eb yet animail cax max occan axq'uijan nabal no no'. Junejxac'al max ayji ec' yetok no xolakilteal burro. Max loon ac'un axca no wacax, axa yal ak'bal max ayc'ay yiban is mimanil masantac'al max yal nachaj el yuj, tzetbil wal yayji oc Dios, Cham Axac'al Ocok, tol asan ay yikbej yiban nacionlak, cax chi yaon oc Cham yin yajawilal mac chi yochej c'ul.

²² Axa pax ach ti', mamin rey Belsasar, tol is yitxiquin ach cham tu', caxc'al ojtak tzet max yunej, palta c'am wal jabok chach oc yin ayilal.

²³ Axa max yun xin, yelxac'al ch'aan max ot a ba satak Cham Yajawil satcan. Max ak'on ilaytek bay a meẍa juntzan copa c'al juntzan sec' yet is templo Cham. A yul juntzan tu' max oc' an vino yetok masanil eb awtebil oj, cax max e yion aj can juntzan dios tol oro, plata, hierro, te' c'al ch'en, a ton juntzan dios tol c'am chi je' yiloni, c'am chi je' yabeni, tamwal ay jabok tzet yetal yojtak. Cax manak bay Dios max al watx' k'anej, ti pax wal a yul k'ab Cham ay a cawil, cax a c'apax Cham chi naon tzet chonej.

²⁴ Yuj tu' xan max yatek Dios jun k'abej max tz'iben juntzan k'anej ti',

²⁵ MENE, MENE, TEKEL, PARSIN.

²⁶ A juntzan ti' axca ti' chi yal elapnok: MENE: Mayal bis Dios jayebto c'ual ayach ec' yin ekbej, mayal tx'ox is lajubal.

²⁷ TEKEL: Mayal ach echelay yul echbal, cax man tz'akanok alil.

²⁸ PERES:*fn* A a makbej toxa ok pojaxtok, cax ok occan yul is k'ab eb Medo yetok eb Persa, ẍi Daniel.

²⁹ Lajwi tu xin, max chekon cham rey Belsasar yalay oc pichilej púrpura yin Daniel. Max alay oc jun cadena oro yin is nuk', axa yalon bay masanil anima tol a wal yet jun bek tu' max occan yin yet is yox yajawilal yul is makbej.

³⁰ A wal yet jun ak'bal tu' cax max mak'lay cam Belsasar, reyal eb caldeo.

³¹ Axa Darío aj Media, max yacan oc ba yin yajawil is q'uexelok. A yet tu' 62 abil is k'inal cham Darío tu'.