Dn 3 - A Txꞌan Biblia Yin Kꞌanjobal 1989

Ayilal bay jun yechelej tol oro

¹ Max chek cham rey Nabucodonosor watx'nelay jun yechelej tol oro, tol ay 30 metro is tel cax 3 metro wal is pimal. Max yaloni tol a tu' chi watx'nelay aj bay ac'al chi yik Dura bay yul yet Babilonia.

^2-3 A yet mayal watx'ji el jun yechelej tu' cax max yawtentek masanil eb ayoc yin yajawilal bay masanil yul makbej nación tu', eb yajawilal eb soldado, eb gobernador, yetokc'al eb ayoc yin yajawilal bay yulak conoblak, c'al eb tesorero, c'al eb juez, c'al juntzanxa eb ayc'al oc yin yajawilal, yet chi chalay is k'inal jun miman yechelej tu'. Xan max wajnaj oc masanil juntzan eb mimek yajaw tu' satak jun yechelej tu', cax max chalay is k'inal.

⁴ A jun mactxel ayoc yiban tol ok k'anjab elok, max chael yich yalon yin ipejal: Abek xin e masanil ex anima max ex tit bay masanil conoblak, c'al nacionlak, c'al junjun makan tiejlak.

⁵ A yet ok e yaben yet ok aj nuk' masanil son ti', axca flauta, tambor, arpa, salterio, c'al zampoña, c'al masanil juntzan música ti', a yet tu' cax ok ex ay jajnaj e masanil satak jun miman yechelej max chek cham rey Nabucodonosor ti' watx'nelayok.

⁶ Masanil mactxel tol man ok ay jajanok c'al yoc yin ayilal bay jun yechelej ti', yin aymanil ok k'oklaytok bay yul jun horno tol chi chaw is k'ak'al, ẍi.

⁷ Yuj tu xin, axa masanil eb anima wajan ec' bay tu', a yet max yaben eb yaj nuk' masanil son tu', cax max ay jajnaj eb masanil, max yaon ay ba eb bay jun yechelej tol oro tu'.

⁸ A yet tu' ay juntzan eb aj Caldea max alon bay cham rey Nabucodonosor yuj juntzan eb aj Judá ayoc xol eb tu'.

⁹ Max yalon eb axca ti': —Mamin rey, ayokab ekbej yin tojbalk'inal.

¹⁰ Tol ach max ala' tol a yet chi aj nuk' masanil juntzan son ti', cax chi ay jajnaj masanil anima yin ayilal bay satak jun miman yechelej ti',

¹¹ axa mactxel tol c'am chi yikej xin, chi k'oklaytok bay yul horno tol chi chaw k'ak'al, cachi.

¹² Palta xin, ay juntzan eb aj Judá, a ton Sadrac, Mesac yetok Abed-nego, max ak' mimek opiso bay eb yul makbej Babilonia ti', palta c'am wal janic'ok elapnok yul sat eb. C'am jabok chi oc eb yin ayilal bay juntzan a diosal ti', tamwal chi ay jajan eb bay jun miman yechel a diosal max a chek watx'nelay aj ti', ẍi eb aj Caldea tu'.

¹³ A yet max yaben cham Nabucodonosor jun ti' max tit yowal, cax max chekon yilaytek eb is satak. A yet mayal apni oc Sadrac, Mesac c'al Abed-nego is satak,

¹⁴ cax max k'anlen el cham rey bay eb axca ti': —¿Tom yel ayex ti' maj ex oc yin ayilal bay juntzan in diosal, tamwal bay yechel in diosal, max in chek watx'nelay ajok?

¹⁵ A tinani' xin, ta bekan e c'ul, a yet ok e yaben yaj nuk' son tu' junelxa, cax ok ex oc yin ayilal bay satak jun yechelej max in chek watx'nelay aj tu', c'am tzet ok ex onok. Ta c'am che yikej e yay jajan yin ayilal xin, a wal yet jun bek tu', ok ex k'oklaytok bay yul jun horno tol chi chaw is k'ak'al. Ta caytu' ok ex utlayok, ¿tzetto wal diosal ok je' ex colon el yul in k'ab? ẍi cham.

¹⁶ Max tak'wi Sadrac, Mesac c'al Abed-nego bay cham rey, max yalon eb axca ti': —C'amxa tzet watx' jalon etok yin jun ti', mamin rey.

¹⁷ A co Diosal on, bay chon occ'alta' yin ayilal, chi je' yuj on colon el bay xol xak k'ak'ej bay horno tu', c'al bay masanil tzet chi yochej a c'ul, a' ok on colon el yul a k'ab.

¹⁸ Caxc'al man ok on col-lay yuj xin, palta chi jak'xac'al ojtaknej el mamin rey, tol man ok on ayc'alta' jajan bay juntzan a diosal tu', tamwal bay jun yechel a diosal naba oro max a watx'nej aj tu', ẍi eb.

Eb oxwan ach'ej max colchaj bay horno

¹⁹ A wal yet max yaben cham rey Nabucodonosor juntzan k'anej eb nak ach'ej tu', max cakbixac'al el sat cham yuj tit yowal, cax max chekon jeklay ajtok k'ak'al jun horno tu' ukelokxa ec'ban axcac'alta' chi yun yajtok is k'ak'al.

²⁰ Cax max chekon juntzan eb is soldado caw wal tec'an, yuj c'al-lay ay Sadrac, Mesac c'al Abed-nego, cax chi k'oklaytok eb bay xol xak k'ak'ej bay yul horno tu'.

²¹ A eb oxwan ach'ej tu' ayoc is pichil eb chi k'an yin yopiso bay ayocok, cax max c'al-lay ay eb, max k'oklaytok eb bay xol xak k'ak'ej yul horno tu'.

²² Tutun tol a cham rey max alon xin, yet wal jun bek tu' max ikelayi. Axa jun horno tu' caw wal ow is k'ak'al, xan a yet max k'oklaytok eb nak ach'ej tu' yuj eb soldado caw wal tec'an tu', max elol chulnaj xak k'ak' yin eb soldado tu', cax max cam eb yuj k'ak' tu'.

²³ A pax eb oxwan tu xin, c'alanc'al eb max ayc'ay eb xol k'ak' bay yul horno tu'.

²⁴ Yinxac'al aymanil max aj jucnaj cham rey Nabucodonosor, max xiwaj c'ul, max yalon bay eb yajaw ayic' bay tu': —¿Tom man oxwannejok eb ach'ej max e c'albaj, cax max e k'okontok bay xol k'ak' tu'? ẍi cham. —Axca ton tu', mamin rey, ẍi eb.

²⁵ —Palta ayin ti' canwan eb chi wila', tol bekan elok, cax chi ec'jab eb bay nan xol k'ak'ej tu', c'am wal jabok tzet chi on eb. Axa jun yet is can tu', lajan wal yili axca junok dios, ẍi cham.

²⁶ Max lajwi yalon cham Nabucodonosor jun ti', max jitzontok ba bay cawilal ti' horno tu', max yalon axca ti': —Sadrac, Mesac c'al Abed-nego, chekbej ex Dios Cham Axac'al Ocok, elanektek cax sebaxek cayti', ẍi cham. Max eltek eb yoxwanil xol xak k'ak'ej tu'.

²⁷ Lajwi tu' max oc bulnaj masanil eb yajaw yul jun nación tu' c'al eb yaomal oc nabal cham rey yilon eb nak oxwan ach'ej tu', tol c'am wal jabok max tz'atok is mimanil eb nak yuj k'ak' k'ak'ej tu'. Max cam wal yilon eb tol tamwal jabok xil is jolom eb max tz'a'i, tamwal c'apax jabok is pichil eb max tz'a'i, c'am wal jabok jabil bay ijan max tz'a'i.

²⁸ A wal yet jun bek tu' max yalon aj cham rey Nabucodonosor axca ti': Al-layokab watx' k'anej bay is Diosal Sadrac, Mesac c'al Abed-nego, tol a' max chektek is yángel yet chi col-lay el eb is chekbej chi ya wal oc c'ul yin, eb tol maj iken in chekbanil ayin rey in ti', tol bekan c'ul cami yintak pax yay jajan bay tzanc'al tzet diosal tol man is Diosalok.

²⁹ A tinani' xin, ayin chi wala' tol tzanc'al mac animail chi alon yobal k'anej yin is Diosal juntzan ach'ej ti', tol coc'tzoc' wal ok yun cami. Axa is yatut eb ok uchlay lajwok ayok, caxc'al tzet conobal, tzet nacional, ma tzet tiejal chi yala', yujtol c'am junokxa dios chi je' colwaj axca is Diosal eb ti', ẍi cham.

³⁰ Lajwi tu' max yaoc cham rey eb nak oxwan ach'ej tu' yin mimek opiso bay makbej Babilonia tu'.