Dn 2 - A Txꞌan Biblia Yin Kꞌanjobal 1989

Is wayich cham Nabucodonosor

¹ A yet cabxa abil yoc Nabucodonosor yin reyal, a yet tu' ay juntzan is wayich cham max oqui. A yuj juntzan is wayich tu' caw wal max oc yin bilc'ulal, c'amxa chi oc wayan yuj.

² Yuj tu' xan max yak' cham awtelay eb tz'akan ay is c'ul, eb aj bal c'al eb chi nachaj el yuj tzetbil yayji waycan, yet chi toj yal eb tzet yelapnok is wayich cham tu'. Max toj eb xin, axa yoc eb satak cham rey tu'.

³ Max yalon cham bay eb axca ti': —Ay wal jun in wayich max oqui, caw wal ayin oc yin somc'ulal yuj. Chi wochej tol chi nachaj el wuj tzet chi yal elapnok, ẍi cham.

⁴ Max yalon eb tz'akan c'ul tu' bay cham rey axca ti' yin is ti' eb: —Mamin rey, ayokabc'al ec' ekbej tu' yin tojbalk'inal. Al a wayich tu' ayon a chekbej on ti'. Ayonxa ok jala' tzet yelapnok, ẍi eb.

⁵ Max tak'wi cham axca ti': —Mayal in na', ta man ok e yal ayin tzet max in wayichnej tu' c'al tzet yelapnok, coc' tzoc' wal ok yun e cami, axa e yatut ok uchlay lajwok ayok.

⁶ Tatol ok e yal ayin xin, tzet yetal max in wayichnej tu', c'al tzet yelapnok, ok e cha' wal mimek sabalej ok wak' ayex, c'al watx'c'ulalil, cax yel mimek ok yun e yelapnok. Yuj tu xin, alek ayin tzet yetal max in wayichnej tu', c'al tzet yelapnok, ẍi cham rey tu'.

⁷ Max tak'wi eb tz'akan c'ul tu' yin yet is cayelal axca ti': —Al a wayich tu' ayon, mamin rey. Ayonxa ok co watx' alnej elok tzet wal yelapnok, ẍi eb.

⁸ Max tak'wi cham: —Wojtak wali, tol che yochej tzet chi yun e colon e ba, xan toc'al che yiec' tiempo, yujtol max e yabej tzet yetal nabil wuj e yin.

⁹ Yuj wal tu', ta man wal ok e yal tzet yetal max in wayichnej tu', asannej tzet nabil wuj tu' ayoc e yiban ok yunej, yujtol che lajtinej e paktzen ayin yin lek'tial, xan che yechbanej ta chin q'uex tzet nabil wuj e yin. Alek tzet max in wayichnej tu', yet watx' ok nachaj el wuj tol ok je' e yalon c'apaxok tzet wal yelapnok, ẍi cham.

¹⁰ Max tak'wi eb axca ti': —Mamin rey, c'am mac bay yulyibank'inal ti' yojtak tzet yetal chochej chojtaknej elok, yetok c'apaxok, c'amto junok rey chi k'anlej junok tzet yetal ayon axca jun ti', caxc'al tol miman yikbej,

¹¹ yujtol a jun ti' tol yelxac'al yatak nachaj elok. C'am junok mactxel chi je' yaloni, asan mi eb dios chi nachaj yuj, palta eb tu' man cajanok eb co xol ayon anima on ti', ẍi eb.

¹² A wal yet max yaben cham rey axca tu', cax max tit wal yowal cham. Max chekon mak'lay cam masanil eb tz'akan ay c'ul bay Babilonia.

¹³ A yet max eltok jun orden tu', max sayonxac'al ec' eb Daniel yetok eb ayoc yetok yuj yak'lay c'apax cam eb.

Yalnak Daniel tzet yelapnok is wayich cham rey

¹⁴ Max k'anjab Daniel yin bayc'al ijanilal, c'al yin c'ojanc'ulal bay cham Arioc. Yajaw yayji cham tu' xol eb chi taynen cham rey, a ton max ak'lay yikbej yin mak'on cam masanil eb tz'akan c'ul tu'.

¹⁵ Cax max k'anlen Daniel bay axca ti': —¿Tzet yuj xan max yak' cham rey jun ley ti' tol yelxac'al ow? ẍi Daniel. Max yalon cham Arioc tzet wal yayji ocok.

¹⁶ Lajwi tu' max toj Daniel bay cham rey, cax max bet tewok bay tol chi yechbanej janic'okxa, cax chi je' watx' alnelay el is wayich tu' c'al tzet yelapnok. A jun tu' max cha c'ul cham rey.

¹⁷ Ayman max toj Daniel bay yatut, max yalon bay eb ajun yetok, a ton Ananías, Misael, c'al Azarías, tzetbil yayji oc jun k'anej tu',

¹⁸ yet chi k'an eb is colwal Dios yin jun makan k'anej tol c'ayubtak yoc tu', yet watx' c'am chi mak'lay cam eb yetok juntzanxa eb tz'akan c'ul bay Babilonia tu'.

¹⁹ A yet jun ak'bal tu' a Dios max ak'on yil Daniel jun k'anej yatak nachaj el tu'. Yuj wal tu xin, xan max yal Daniel watx' k'anej bay Cham Dios aj satcan.

²⁰ A ton juntzan k'anej ti' max yala': Al-layokab watx' k'anej yin tojbalk'inal en ach Dios, yujtol et yayji jelanilal c'al ipejal.

²¹ Ach ojtak jantak chi mayji junjun mactxel yin yak'on yajawilal, yujtol chaoc eb yin yopiso, ac'ala' ach che c'apax el eb yin yopiso tu'. Oj xan ay is nabal eb aj nabal. Oj xan ay is jelanilal eb jelan.

²² Ach cha tx'ox tzet yetal tol man txequelok, cax cha tx'oxon c'apax tzet yetal tol ewantak yayji. Ojtak masanil tzetak yetal ay xol k'ekk'inal yujtol aj sakk'inal ach.

²³ A ayach, ach in Diosal, Diosal ach c'apax eb wichmam, chi wal yuj diosalil ayach, c'al walon watx' k'anej ayach, yujtol max ak' in jelanilal c'al in tec'anil. A tinani' xin, max ak' wojtaknej elok tzet max co k'an ayach. Max ak' jojtaknej elok tzet yayji oc wayich cham rey, ẍi Daniel bay Dios.

²⁴ A yet max lajwi jun ti' max toj Daniel bay cham Arioc, a ton jun max ak'lay chekbanilej bay, tol chi mak'lay cam masanil eb tz'akan c'ul bay Babilonia. Max yalon bay axca ti': —Manchak a mak' cam eb tz'akan c'ul tu', asan tol chin etok bay satak cham rey, cax ayin ok wal masanil is wayich cham tu', ẍi Daniel.

²⁵ Yuj tu' xan yin aymanil max ilaytok Daniel yuj cham Arioc bay satak cham rey Nabucodonosor. Max yalon bay cham rey tu' axca ti': —Mamin rey, max ilchaj jun winak wuj bay xol eb aj Judá ayic' co xol ti', a' ok je' yalon tzet yelapnok a wayich tu', ẍi.

²⁶ Max yalon cham rey bay Daniel, a ton chi yik c'apax Beltzasar: —¿Tom ok je' oj ach ti' alon tzet yetal max in wayichnej, c'al tzet yelapnok in wayich tu'? ẍi cham.

²⁷ Max tak'wi Daniel axca ti': —Mamin rey, caxc'al c'am junok aj nabal c'al naom el k'anej c'al tz'akan ay is c'ul, ok je' nachaj el yuj, yalon tzet yetal chi yochej a c'ul chojtaknej elok,

²⁸ palta ay jun Dios bay satcan, chi je' tx'oxon el tzet yetal tol ewantak yayji. A' max tx'oxon ayach tzet yetal ok uj yet yajtok tu'. Ti ok wal ayach tzet max el yin a wayich yet lanan a way tu'.

²⁹ Ach ti' mamin rey, a yet ayach ec' bay a wayub, cax max a naon yuj tzetak yetal ok uj yet yajtok tu', axa Dios chi tx'oxon tzet yetal tol ewantak yayji, a' max tx'oxon ayach.

³⁰ Ac'al oc Cham max tx'oxon jun k'anej ti' ayin, man yujok tol yelxac'al ay in nabal yintak masanil eb anima, c'amak. Palta asan yuj chin tx'ox ayach tzetbil wal yelapnok a wayich tu', yet watx' ok je' nachaj el oj tzet nabalejal max jayoc yin a nabal.

³¹ A yin a wayich tu', mamin rey, max ela' tol lecan oc jun yechel anima tol miman, cax toxac'al chi jopopi, ayxa is may yili sat.

³² A is jolom jun yechelej tu', naba oroc'al. Axa txamc'ul yetokc'al is k'ab, naba platac'al elok. Axa is c'ul yetokc'al c'ojlub is xub, naba broncec'al elok.

³³ Axa yakan, ay jun makan naba hierroc'al elok, axa junxa makan xin, hierro soman yetok tx'otx' tol tz'anakxa.

³⁴ Yak'ban lanan elon jun ti' mamin rey, axa bay sat jun witz, toc'al max tit jun ch'en ch'en tol c'amc'al mac max tenontek. Palanc'al jayoc yin yakan jun yechelej tu' bay soman hierro yetok tx'otx'.

³⁵ A wal yet jun bek tu', a ch'en hierro tu', c'al tx'otx' tx'otx' tu', c'al ch'en bronce, c'al ch'en plata, yetokc'al ch'en oro tu', pokokxac'al max yuncantok. Axcaxac'al matz'il trigo bay tec'bal yet waresma tol chi xulaytok yuj cak'ek', c'amxa jabok is coc'takil chi cancan yuj, caytu' max yuncantok jun yechelej tu'. Axa ch'en ch'en max jayoc mak'on poj jun yechelej tu', max yutcan aj ba ch'en yin miman witzal tol max makay el yulyibank'inal ti' yuj.

³⁶ A ton wal a wayich tu xin. A tinani' mamin rey, ok wal ayach tzet yelapnok.

³⁷ Ach ti', mamin rey, sat rey ach yiban eb rey, yujtol a Dios aj satcan, a' max ak'on ekbej, c'al epalil, c'al a mimanbilal,

³⁸ c'al a yajawbi yiban masanil tx'otx' tx'otx' bay cajan eb anima, c'al no no', c'al no tz'iquin. Yujtol a Dios max aon oc yalan ekbej, xan ach ton chach yal is jolom jun yechelej tol oro tu'.

³⁹ A yet ok lajwok ec' ekbej ti', cax ok aj wan junxa nación, palta man lajanok yetok jun et ti'. Lajwi tu' ok aj wan jun yet yox nación, a ton jun chi tx'ox ch'en bronce tu'. A ton jun tu' ok yajawbok yiban masanil yulyibank'inal ti'.

⁴⁰ Ok lajwok tu' cax ok aj wan junxa yet is can nación yelxac'al tec'an, axca ch'en hierro tu'. Yujtol a ch'en hierro tu' chi mak'poj ch'en masanil, cax chi c'ayon elok. Axca tu' ok yun junxa nación ok aj wan tu', ok c'aylay el juntzanxa nación yuj.

⁴¹ Max elon c'apax is yakan c'al yiximal yakan jun yechelej tu' tol ay jun makan ch'en hierro, ay junxa makan xin, tx'otx' tz'anak. A jun tu' chi yal elapnok tol a jun nación tu' ca pojan yayji; ay janic'ok yipalil axca ch'en hierro yujtol max el ach ti' tol ay ch'en hierro soman yetok tx'otx'ej tu'.

⁴² Max ela' tol a yiximal yakan jun yechelej tu', tol soman ch'en yetok tx'otx'ej tz'anak. A jun tu' chi yal elapnok tol a jun nación tu' ay nanok tol ay yipalil, axa nanokxa c'am wal is yipalil.

⁴³ Tutun max ela' tol soman yayji ch'en hierro tu' yetok tx'otx'ej. Axca tu' ok yun juntzan nación tu', ok yak'lej eb tol junxanej ok yut ba yuj yilen eb yistzil bay junjun, palta wal yel, man ok je' junanen ba eb, axca ch'en hierro c'am chi je' junanen ba yetok tx'otx' tx'otx'.

⁴⁴ A yul is tiempoal juntzan eb yajaw tu', a yet tu' ok watx'nej ay Cham Dios aj satcan is yikbej tol c'amxa yechel ok ayc'ayok, tamwal okto oc yul k'ab junokxa nación. Ok c'aylay el juntzanxa nación yuj, asanxanej yikbej ok ayjok ec' yin tojbalk'inal.

⁴⁵ A ton wal jun tu' chi yal elapnok ch'en ch'en max el tittac'al bay sat witz, tol c'am junok mac max tenontek ch'en. A wal jun ch'en tol pokokxac'al max yuncantok ch'en hierro, ch'en bronce, tx'otx'ej, ch'en plata, c'al ch'en oro yuj. A Dios Cham Yelxac'al Miman Yayji Ocok, a' max tx'oxon ayach, mamin rey, tzet yetal ok uj yet yajtok tu'. A jun wayichej tu' yel toni, ac'ala' axca wal chi yun in watx' alnen el ti' axca tu' ok yunej, ẍi cham Daniel bay cham rey.

⁴⁶ A yet max yaben cham rey Nabucodonosor jun tu', cax max ay paknaj sat tx'otx' satak Daniel. Catatu' max chekon yak'lay xajanbal yetok incienso bay.

⁴⁷ Max yalon c'apax bay axca ti': —Wal yel a e Diosal ayex ti' asannej oc yelxac'al miman yintak juntzanxa dios. A ton wal is yajawil eb rey, cax a' chi tx'oxon tzet yetal tol ewantak yayji. Ti' wal ach max je' nachaj el jun k'anej ti' oj, ẍi cham.

⁴⁸ Axa cham rey max aon oc Daniel yin ikbej yelxac'al miman yayji ocok, cax max ak'lay sabalej yelxac'al watx' bay, xan max alay oc yin gobernadoral bay yul is makbej Babilonia, c'al yin sat yajawil xol eb tz'akan c'ul bay jun nación tu'.

⁴⁹ Max chaon c'ul cham rey tzet max k'an Daniel, xan max yaoc Sadrac, Mesac, c'al Abed-nego yin yajawil yul makbej conob Babilonia. Axa Daniel xin, tutun miman yikbej bay is despacho cham rey.