Ap 7 - A Txꞌan Biblia Yin Kꞌanjobal 1989

Eb max sellonelay xol eb israel

¹ Max lajwi tu', max wilon canwan ángel tol leclom ba oc junjun bay junjun txiquinlak tx'otx' tx'otx'. Chi tenoc waan eb canebal cak'ek'al yulyibank'inal. Yuj tu', c'amxa jabok cak'ek' chi ec' sat tx'otx', c'al yiban a' mar. C'amxa junok te te' chi bil jabok.

² Cax max wilon yajol junxa ángel bay chi ajol c'u. Ibil oc is sello Cham Dios iquis yuj. Caw wal yip max yun yawji bay eb ángel canwanil, a ton eb ak'bil yikbej yetnentok tzetak yetal sat tx'otx', c'al yetok tzetak yetal yulak a' mar. Max yalon bay eb axca ti':

³ ¡Manchakto e yetnejtok tzetak yetal ay sat tx'otx', c'al tzetak yetal yulak a' mar, c'al te te', masantac'al ok jaoc selloal nan sat junjun eb yak'omal serbil co Diosal! ẍi bay eb.

⁴ Axa max waben bisil eb max sellonelayi, tol 144 mil eb. A eb tu', wet israelal eb. Ayc'al yet junjun tribual.

⁵ 12 mil eb yinatil Judá max oc is selloal. 12 mil eb yinatil Rubén; 12 mil eb yinatil Gad.

⁶ 12 mil eb yinatil Aser, 12 mil eb yinatil Neftalí, 12 mil eb yinatil Manasés.

⁷ 12 mil eb yinatil Simeón, 12 mil eb yinatil Leví, 12 mil eb yinatil Isacar.

⁸ 12 mil eb yinatil Zabulón, 12 mil eb yinatil José, 12 mil c'apax eb yinatil Benjamín.

Eb anima sak is pichil

⁹ Lajwi tu', max wiloni, tol xiwil anima ayic' satak jun trono tu', yetok satak Cham chi yik Calnel. A xol eb tu', ay eb aj junjun nación, junjun yinatil, junjun tiejal, c'al junjun conobal. C'amxa chi alchaj el jantak bisil eb. Saklubinakxac'al yili is jokan pichil junjun eb. Ibil aj is xak palma junjun eb.

¹⁰ Max aj yaw eb masanil, max yalon eb axca ti': ¡A Cham co Diosal chotan ay yul is trono. A ton Cham max ak'on co colbanil. A c'apax Cham chi yik Calnel tu', a' max ak'on co colbanil tu'! ẍi eb.

¹¹ Lecan aj masanil eb ángel, cax oyan oc eb yin jun trono tu', yetok eb icham winak, c'al eb querubín canwanil. Max ay nojan eb sat tx'otx' satak jun trono tu'. Max c'oli yalon eb axca ti':

¹² ¡Yunokabi! ¡Al-layokab watx' k'anej bay Dios! ¡Al-layokabi, tol miman yelapnok, c'al jelan Cham! Moj tol chi al-lay yuj diosalil bay, tol mimanbil Cham, xiwil is yikbej, cax xiwil yip Cham yin tojbalk'inal. ¡Yunokabi! ẍi eb.

¹³ Max lajwi tu', max k'anlen jun eb icham winak ayin axca ti': ¿Mactxel eb sak pichil ti' cha na'? ¿Baytal tax titnak eb cha na'? ẍi ayin.

¹⁴ Mamin, ach ojtak. Ayin ti' man wojtakok, quin chi bay. Yuj tu xin, xan max yal ayin axca ti': A eb ti', a ton eb petoj xol jun miman yailal. Max ilay el is yobtakil eb yuj is chiq'uil Cham chi yik Calnel. Axca tol max tx'ajil eb is pichil, caw sak max yuncan el yuj is chiq'uil tu'.

¹⁵ Yuj tu', ayic' eb satak is trono Dios bay is templo. Cac'al ti' yak'wi serbil eb bay tu' yet c'ualil c'al yet ak'balil. Axa Cham chotan ay yul is trono tu' chi taynen eb, yujtol ayc'al ec' yetok eb.

¹⁶ Majxa yak' eb wajil, c'al takintial. Majxa tz'a eb yuj yakan c'u. C'amxa k'ak' ok yab eb.

¹⁷ Yujtol a Cham chi yik Calnel tu', a' ayic' yul nan is despacho, xan a' chi ilon eb axca junok ilom calnel. A' chi iontok eb bay a' aej yet k'inalej tol ayc'al yin tojbalk'inal, cax ok jolay el masanil yal sat eb yuj Dios, ẍi ayin.