Ap 4 - A Txꞌan Biblia Yin Kꞌanjobal 1989

Ayic' jun trono bay satcan

¹ Max lajwi tu', max wiloni tol ay jun puerta bay satcan jakan in satak. A jun babel max k'anjab aj ayin, tol lajan wal yoc yul nuk' axca yul nuk' trompeta, a' max alon aytek ayin axca ti': Ajantek cayti'. Ok in tx'ox ayach juntzan tzet tolto ok ujok, ẍi ayin.

² Ay tzet max yak' Cham Espíritu wil yin aymanil. Max wilon jun trono bay satcan tol ay mac chotan ay yul.

³ A Cham chotan ay max wil tu', lajan yili axca junok ch'en jaspe, ma junok ch'en cornalina, tol caw wal chi tzekeki yili. Xoyan oc jun mak'bal nabich chi tzekeki yin jun trono tu' max wila', axca junok ch'en esmeralda.

⁴ A is cawilal tu', a tu' oyan oc 24 ẍila. A tu' chotan ay 24 icham winak max wila'. Caw sak is pichil eb. Ayaj junjun is corona oro eb yin is jolom.

⁵ Chi el joplajbok rayo yin jun trono tu'. Caw chi nilili axca yet chi nilili bil c'u. Ay ukeb mimek tzektebal chi chaw k'ak'al satak, a ton Yespíritu Dios yukwanil.

⁶ Ay c'apax junxa tzet ayic' satak, lajan axca junok najab chi jil tzet ay yul axca ch'en vidrio. A nan yul jun trono tu', c'al yinlak, ay canwan querubín*fn* ayic'ok, nojnak el satak eb, c'al yintak eb yuj is bak' sat.

⁷ A jun babel, lajan yili axca yili junok no coj. A jun yet is cab, lajan yili axca junok ach'ej wacax. A jun yet is yox, lajan yili sat axca yili sat anima. Axa jun yet is can xin, lajan yili axca junok no águila chi ec' jenenok.

⁸ A canwan querubín tu', wakeb is xic' junjun. Nojnak el yin c'al yul is mimanil eb yetok bak' satej. C'ualil c'al ak'balil, chic'al yal eb axca ti': Asanxanej ocok, caw wal asanxanej oc Cham Jajawil co Diosal, chic'al je' yuj masanil tzet yetal. Ayc'alta' ec' Cham, ayic' Cham tinani', c'al t'inan ok jayok, ẍi eb.

⁹ Junjuntakc'al el chi yal eb querubín tu' canwanil tol caw miman yelapnok, cax mimanbil jun Cham chotan ay yul jun trono tu', cax chi yalon c'apax eb yuj diosalil bay Cham tol ayc'al ec' yin tojbalk'inal tu'. Junjunc'al el chi yal eb axca tu',

¹⁰ cax chi ay nojan eb 24 icham winak tu' satak cham. Chi yion ay ba eb bay Cham ayc'alta' ec' yin tojbalk'inal tu'. Chi batxban ay eb is corona satak, cax chi yalon eb axca ti':

¹¹ Ach Jajawil, ach co Diosal, a moj ton yal-lay en tol caw miman elapnok, tol mimanbil ach, cax tol miman ekbej. Yujtol ach watx'nenej masanil tzet yetal. Ay masanil tzet yetal, yujtol axca ti' chi yun yel yin a c'ul, yuj tu' xan watx'nebil oj, ẍi eb.