Ap 22 - A Txꞌan Biblia Yin Kꞌanjobal 1989

¹ Lajwi tu', max tx'oxon jun ángel tu' jun miman aej ayin, caw wal sak axca vidrio, a ton a' chi ak'on co k'inal tol ayc'al yin tojbalk'inal. A bay is trono Dios, yetok Cham chi yik Calnel tu', a tu' chi eltek.

² A bay yul nan jun is miman calleal jun conob tu' chi bey yakan a'. A bay capaq'uil ti a' tu', ay te te' chi ak'on co k'inal tol ayc'al yin tojbalk'inal. A te te' tu', lajcaw el chi satni te' yul abil, xan junjun xajaw chi satni te'. Chi oc xak te' yambalok nacionlak.

³ C'am junok tzet, tamwal junok mac catabnebil yuj Dios ok oc bay tu'. A bay jun conob tu', a tu' ayay is trono Dios c'al yet Cham chi yik Calnel tu'. A eb yak'omal serbil, ok yiay ba eb bay.

⁴ Ok yil eb sat. Ok oc is bi yin is nan sat eb.

⁵ A bay tu', c'am ak'balil. A eb ok oc bay tu', c'amxa yopiso tzektebal yuj eb. C'amxa yopiso yakan c'u yuj eb, yujtol a Cham Jajawil Dios ok tzektanen eb, cax ok yak' eb yajawilal yin tojbalk'inal.

Toxa ok jay Jesucristo

⁶ Lajwi tu', max yalon jun ángel tu' ayin axca ti': Caw yel juntzan k'anej ti'. Chi je' aon oc yipok a c'ul. A Cham Jajawil Dios, a' ak'nejcan yal eb is chekbej. A Cham cheknejtek jun yángel, a' max ul ak'on yojtaknej el eb yak'omal serbil juntzan tzetak yetal toxa ok ujok, ẍi.

⁷ ¡Yin aymanil ok in jayok! Caw watx' yet eb chi iken tzet chi yal jun libro ti', yujtol a Dios max ak'on ojtaknelay el tzet chi yala', ẍi Jesucristo.

⁸ Ayin Juan in ti' max wabej, cax max wilon juntzan ti'. A yet max lajwi wabeni, c'al lajwi wilon juntzan ti', axa way jajnaj satak jun ángel max ak'on wojtaknej el tu', cax max wion ay in ba bay.

⁹ Palta max yal ayin axca ti': Man ot axca tu', yujtol ayin ti', yak'omal in c'apax serbil Dios etok, c'al yetok eb oẍtak, a ton eb is chekbej, c'al jantak eb chi iken tzet tz'ibbilcan yul jun libro ti'. A bay Dios cheay a ba, ẍi.

¹⁰ Max yal c'apaxok: Manchak a c'ubaj el juntzan tzet tz'ibbil ay yul jun libro ti', yujtol toxa ok yun tzet chi yala'.

¹¹ A tinani', a mac chi yun yobtakil, yunokabc'al yobtakil tu'. Yetok c'apax eb yajbejtak, yunokabc'al eb yajbejtakil tu'. Axa eb watx' tzet chi yun xin, yunokabc'al eb watx'ilal tu'. C'al eb ayoc nabal yin Dios, yaokabc'al oc eb nabal yin Cham, ẍi.

¹² Max yal Jesucristo axca ti': Abek, yin aymanil ok in jayok. Ibil oc is paktzil junjun mactxel wuj, atac'ala' tzet max el yunen junjun.

¹³ Ayin ti', babel in satak masanil tzetak yetal, cax is lajub in c'apaxok. Axca yayji cab letra, a ton A, yetok Zeta, cayin tu', ẍi Cham.

¹⁴ A eb chi ilaycan el is yobtakil, axca tol chi tx'ajil eb is pichil, caw watx' yet eb, yujtol ay yalon yet eb loon sat te te' chi ak'on co k'inal tol ayc'al yin tojbalk'inal. Ok je' yoc eb bay puertail jun conob tu'.

¹⁵ Ay juntzan eb man ok je' yoqui, a ton eb yob is nabal, axca junok tx'i', yetok eb ajtxum, eb ajmul, eb mak'om cam anima, eb chi yiay ba bay tzet chi al-lay oc diosal, yetok eb chi ochen lek'tial cax chi yak'on c'apax lek'tial tu'. A jantak eb ti', maj je' yoc eb.

¹⁶ Ayin ton Jesús in max in chektek jun wángel ul yalon juntzan ti' ayach, yet watx' chi al-lay bay eb creyente bay junjun iglesia. Ayin ti', yinatil in David, palta yuj wipalil xan pitzc'ojnak el David tu'. Lajan in axca jun miman puj chi tzekeki, ẍi Cham.

¹⁷ A Cham Yespíritu Dios, yetok eb ok oc axca yetbiok Cham chi yik Calnel tu', chi yal eb axca ti': ¡Sebach! ẍi eb. Yetok eb chi abeni: ¡Sebach! ẍiokab c'apax eb. A mac chi tak is ti', jayokab eb, ta chi yochej eb. Yuc'okab eb a' aej chi ak'on co k'inal tol ayc'al yin tojbalk'inal, a' toc'al chi ak'layi.

¹⁸ Axa ayex e masanil, mac ex che yab tzet chi yal jun libro Dios, a ayex ok waltok junxa ti': Ta ay mac ok aon oc tz'akil juntzan k'anej ti', a juntzan yailal chi yaltek jun libro ti', a' ok yatek Dios yiban eb.

¹⁹ Ta ay mac ok ion el junok tzet tz'ib yayji yul jun libro Dios ti', ok yiel Dios is satak eb yin te te' yet k'inalej tol ayc'al yin tojbalk'inal, c'al yin is conob Cham tol chi binaj yul jun libro ti'.

²⁰ A Cham max alon juntzan ti', ac'al oc chi alon c'apax axca ti': Wal yel ok in jay yin aymanil, ẍi Cham. Yunokabi, sebach ach Jajawil Jesús.

²¹ Yak'okab Cham Jajawil Jesús is watx'c'ulal ayon co masanil.