Ap 14 - A Txꞌan Biblia Yin Kꞌanjobal 1989

Eb chi bitnej jun ac' bit

¹ Lajwi tu' max wiloni, ay jun chi yik Calnel, tol lecan ec' bay tzalan Sión. Ayic' 144 mil eb yetok. Tz'ibbil oc bi jun chi yik Calnel tu', c'al bi is Mam yin nan sat junjun eb.

² Axa max wabeni, max oc jun nuk'ej bay satcan. Caw chi nilili axca bil mimek aej, ma axca nilili bil c'u. Axca wal tol ay xiwilok anima chi txalon xiwilok arpa.

³ A eb chi bitnen jun ac' bit satak is despacho, yetok satak eb querubín canwanil, c'al satak eb icham winak. C'am junok mactxel chi je' cuychaj jun bit tu' yuj. Asannej eb 144 mil colchajnak el xol anima sat tx'otx', asan eb chi je' yuj bitneni.

⁴ A eb tu', c'am junelok max say eb yix. C'am bay max el yunen eb jun yobtakil tu'. Tzakanc'al eb yintak jun chi yik Calnel tu' bayc'al chi ca toji. Max colchaj el eb xol anima. Yuj tu', lajan eb axca junok babel sat awoj chi ak'lay bay Dios, c'al bay jun chi yik Calnel tu'.

⁵ C'am is lek'tial eb chi ilchaji. C'am junok is yobtakil eb max txecloj ajok.

A tzet ok yal oxwan ángel bay eb anima

⁶ Max lajwi tu', max wilon yec' jenenok junxa ángel bay nan satcan. A watx' abix tol ayc'al yin tojbalk'inal ibil oc yuj, yuj yalon el nan xol anima bay junjun nación, c'al bay junjun conob bay yulyibank'inal, caxc'al tx'ok tx'ok yinatil eb, caxc'al tx'ok tx'ok ti' eb.

⁷ Caw yip yalon bay eb axca ti': Xiwanek bay Dios. Alek watx' k'anej bay, yujtol toxa chi jay tiempoal e beyc'ulnelay yuj. Alek e ba bay, yujtol a' watx'nenej satcan, yetok sat tx'otx' c'al a' mar, yetok nuk'lak aej, ẍi.

⁸ Ay junxa ángel tzakan jay yintak jun babel tu', max yalon c'apax axca ti': ¡Mayal wal ayc'ay jun conob chi yik Babilonia. C'am junok axca, palta max ayc'ay wali. A jun conob tu' max etnen el masanil nacionlak yetok is yajmulal. Axca wal tol max oc junjun nación tu' yin uq'uem anil yuj! ẍi.

⁹ Lajwic'al tu', ay junxa yet is yox ángel tzakan yintak jun yet is cab tu'. Caw yip c'apax yalon junxa tu' axca ti': A eb chi yiay ba bay jun chi yik No' tu', c'al bay is yechel, eb max chaoc yechel nan sat ma yin is k'ab,

¹⁰ yowalil ok jayoc jun miman yailal yiban eb yuj Dios. Axca an vino caw ow, c'am jabok somil aytok, cay wal tu' yowal c'ul Dios ok jay yiban eb. Caw wal ow sic'libil. Caw ok yab eb yail nan xol k'ak' k'ak' yetok azufre satak eb yángel Dios, yetok satak jun chi yik Calnel tu'.

¹¹ A bay ok cha eb yailal tu', wacaquic'al yaj mubal yin tojbalk'inal. C'am xewilal eb c'ualil c'al ak'balil, a ton eb max yiay ba bay jun chi yik No' tu' c'al bay yechel, a ton eb max chaoc bi jun No tu' yechelok, ẍi jun ángel tu'.

¹² Xan a mac ex txel yet exxa Dios, mac ex yikem ex bay tzet chi yal is chekbanil, tol che yaoc e c'ul yin Jesús, yowalil caw tec'an che yut e ba yet che yaben yail.

¹³ Max lajwi tu', max waben yoc jun aw bay satcan. Max yalon ayin axca ti': Tz'ibej junxa tzet ok wal ayach ti': A tinani', caw watx' yet eb ayc'al oc yul k'ab Cham Yajaw, cax chi cami, cha tz'ibej, ẍi jun aw tu'. Chi yalon Cham Yespíritu Dios: Caw yel axca ton tu', yujtol ok xew eb yin mulnajil. A jun axca un bay tz'ibbil tzetak yetal watx' max el yunen eb, ok jay yetok eb bay satcan ti', ẍi Cham.

Wajbanilal aj anima

¹⁴ Max lajwi tu', max wilon jun sak asun. Ay jun Cham lajan wal yili axca anima chotan oc yiban jun asun tu'. Ayaj jun oro corona yuj, cax mitx'bil aj jun polbal trigo caw el ye yuj.

¹⁵ Axa yeltek junxa ángel yul templo Dios. Max yalon yin ipejal bay jun chotan ay yiban asun tu' axca ti': Poloc a polbal yin a wajon aj eb anima tol watx'xa yayji, yujtol tiempoxa wajlay aj eb, ẍitok bay.

¹⁶ Aymanc'al max poloc jun chotan oc yiban asun tu' is polbal tu' bay sat tx'otx'. Max yion aj anima axca yaj ixim trigo.

¹⁷ Lajwi tu', max eltek junxa ángel yul templo Dios bay satcan. Ibil c'apax oc jun polbal trigo yuj, caw el ye c'apaxok.

¹⁸ Max eltek junxa ángel bay ayoctok jun altar. A jun tu' ay yikbej yiban k'ak' k'ak'ej. Caw yip yalontok bay junxa ángel mitx'bil aj is polbal tu': Poloc a polbal caw el ye tu', yujtol a an uva bay sat tx'otx', caw k'inxa an, ẍi bay.

¹⁹ Max polon oc jun ángel tu' is polbal bay yulyibank'inal. Axa yion aj juntzan uva tu' masanil, max yaon octok an yul jun miman tec'bal uva. A jun tu', chi yal elapnok yowal c'ul Dios.

²⁰ A jun tec'bal uva tu', a tiel conob ay. Axca chi yun tec'lay eltek yal uva sic'libil, axca tu' max utlay eb anima tu'. Caw najat max aj pian chiq'uil eb max el tu' axca canil bay chi oc freno no chej, caytu' bay max aj pianok. 72 legua wal bay max toj pianok, axcaxac'al junok najab.