Ap 13 - A Txꞌan Biblia Yin Kꞌanjobal 1989

A eb cawan chi yik No'

¹ Axa max wiloni, max ajol jun chi yik No' yul a' mar. Ay ukeb jolom, cax ay lajoneb yuc'a'. Ayc'al aj corona junjun yuc'a' tu'. Tz'ibbil oc jun is bi yin junjun jolom tu'. Caw wal yob yoc is bi tu' chi yab Dios.

² A jun chi yik No' max wil tu', lajan yili axca junok no mimek tz'ib coj. Lajan yakan axca yakan no oso. Lajan ti' axca ti' no coj. Max yak' no dragón is yikbej bay, cax max yaon oc No' yin yajawilal is q'uexelok. Miman yikbej No' max yak' bay.

³ Ay jun is jolom jun chi yik No' tu', yasjinak. Axca tol camnak el jun is jolom tu' yuj yas tu'; palta max anchaj jun yas yayji tu'. Yuj tu', caw wal max c'ayaj c'ul anima bay masanil yulyibank'inal yuj, cax max yaon oc ba eb yetok.

⁴ Max yiay ba eb bay jun dragón tu', yujtol a' max ak'on yikbej jun chi yik No' tu', xan max yi c'apax ay ba eb bay jun chi yik No' tu'. Max yalon eb axca ti': Tok ay junok chi apni axca jun chi yik No' ti'. ¿Xin ta ay junok chi je' yak'len owal yetok? ẍi eb.

⁵ Max chalay c'apax k'anjab jun chi yik No' tu' yin maynejbail, c'al yalon buchwal k'anej yin Dios. 42 xajaw max ak'lay yikbej yak'on yajawilal.

⁶ Max oc ijan k'anjabi yin buchwaj yin Dios, c'al yin is cajlobal Cham. Max buchwaj c'apax yin jantak eb cajan satcan.

⁷ Max ak'lay c'apax yikbej yak'wi owal yetok eb yet-xa Dios, toltax max can eb yalan yuj. Max ak'lay yikbej yiban masanil bay junjun conob, c'al junjun nación. Caxc'al tx'ok tx'ok inatilejal eb, caxc'al tx'ok tx'ok is ti eb, pilan max yajawbi yin eb.

⁸ Max yiay ba masanil anima sat tx'otx' bay jun chi yik No' tu'. A pax eb tz'ibbil ay is bi yul tx'an un yet k'inalej tol ayc'al yin tojbalk'inal, maj yiay ba eb bay. A eb tu' max tz'ibelaycantok bi eb yul tx'an un yet Cham chi yik Calnel, Cham mak'bil cam yettax manto tz'unchaj yulyibank'inal atac'ala' is nabal Dios.

⁹ Masanil mac chi aben juntzan ti', yacbajokab eb txiquin bay sic'libil.

¹⁰ A mac yet yayji yin yilaytok preso, ok ilaytok preso. A mac yet yayji yin teklay cam yetok espada, espada ton ok on cami. Yuj tu', a ayon yet onxa Dios ti', tec'anokab chi jut co ba jaben yail, cax chi jaonc'al oc co c'ul yin Dios.

¹¹ Lajwi tu', max wilon yajol junxa chi yik No' yul tx'otx'. A junxa tu', cabnej yuc'a', lajan axca is yuc'a' calnel, palta lajan k'anjab axca k'anjab junok dragón.

¹² Caw lajan is yikbej yetok jun babel No' c'apax is bi. Max yak' pural masanil anima bay sat tx'otx' yion ay ba bay jun babel chi yik No' tu', jun yasjinak jun is jolom, palta anchajnak.

¹³ Ay juntzan milagro max el tx'oxon tol caw miman yelapnok. Toltax max yitek k'ak'ej bay satcan, cax max ayol sat tx'otx' yil anima.

¹⁴ Max chalay tx'ox juntzan milagro tu' satak jun babel chi yik No' tu'. Caytu' max yun yion aytek sat anima bay sat tx'otx'. Max yalon c'apax bay eb, tol yowalil chi watx'nej eb junok yechel jun babel chi yik No' tu', jun tol caxc'al yasjinak yuj espada, palta iquisc'al.

¹⁵ Max ak'lay yikbej jun yet is cab chi yik No' tu' yak'on pitzc'oj aj yechel jun babel tu'. Yuj tu', max k'anjab ajok. Max yak'on cam masanil mac maj yiay ba bay.

¹⁶ Max yak' pural masanil anima yoc is yechel junjun yin is watx' k'ab, ma yin is nan sat. Caxc'al unin ma icham anima, caxc'al beyom ma meba', caxc'al yet ba ma mosejal, max oc yechel eb masanil.

¹⁷ A jun yechelej tu', a ton is bi jun chi yik No' tu', ma is númeroal chi tx'oxon is bi tu'. A eb c'amoc jun yechelej tu' yin, maj je' manji eb, tamwal c'apax txonji eb.

¹⁸ Ta ayex jelan ex, ta chi nachaj el e yuj, ok je' nachaj el e yuj tzet chi yal elapnok númeroal jun chi yik No' tu', yujtol a jun número tu', a junok anima chi tx'oxo'. 666 jun número tu'.