Ap 10 - A Txꞌan Biblia Yin Kꞌanjobal 1989

Jun ángel ibil oc jun tx'an yaliẍ un yuj

¹ Max wilon yaytek jun ángel bay satcan, tol xiwil is yipalil, cax max ayol sat tx'otx'. Boc'an oc asun yin axca tol is pichil yayji. Ayaj jun mak'bal nabich yin is jolom. Caw wal chi tzekeki sat axca chaw yakan c'u. Axa yakan, axca xak k'ak'ej chi aj tobobok.

² Ay jun tx'an yaliẍ un jakan, ibil aj yuj yul is k'ab. Max wabaj ay is yakan bay is watx' yiban a' mar. Axa is q'uexan max wabaj ay sat tx'otx'.

³ Max lajwi tu', max awji. Caw yip yawji axca no coj yet chi el yaw no'. A yet max lajwi yawji tu', ukel max bil c'u k'anjabi.

⁴ Lajwi k'anjab yin ukel tu xin, cax ijan max in tz'ibej tzet max wab tu', palta ay jun nuk'ej max k'anjab bay satcan ayin axca ti': Toc'al cha c'ubaj yul a c'ul tzet max yal ukeb nilili bil c'u tu', cax manchak a tz'ibej, ẍi ayin.

⁵ Axa q'uetxban aj jun ángel lecan oc yiban a' mar tu' c'al sat tx'otx' tu' is watx' k'ab satcan.

⁶ A yet max k'anjabi, max locontek bi Cham iquis yin tojbalk'inal, Cham watx'nenej satcan, sat tx'otx', c'al a' mar, c'al masanil tzet ay bay junjun, max yaloni:

⁷ Manxa ok mayjok yunen tzet nabilxac'alta' yuj Dios. A yet ok chaon el yich jun yet is suk ángel xuon is trompeta, axa yunen tzet nabilxata' yuj tu', albilxa yuj bay eb yak'omal serbil, a ton eb is chekbej, ẍi jun ángel tu'.

⁸ A jun nuk'ej max wab yoc bay satcan tu', max k'anjab pax aj ayin junelxa, max yalon axca ti': Asi', cax cha chaon tx'an yaliẍ un jakan tu', tx'an mitx'bil aj yuj jun ángel lecan oc yiban a' mar, c'al sat tx'otx' tu', ẍi ayin.

⁹ Yuj tu', max in toj bay jun ángel tu', max in k'anon ec' tx'an yaliẍ un tu' bay, max yalon ayin axca ti': Tix tx'an ti', lo' tx'an. Caw chi' julinakxac'al ok yun toj tx'an yul a ti', axca yalcab, palta ok c'abok el tx'an yul a c'ul, ẍi ayin.

¹⁰ Max lajwi tu', max in chaon ec' tx'an un tu' bay, cax max in loon tx'an. Chi' julinakxac'al yoctok yul in ti', axca yalcab, palta max c'abi el yul in c'ul yuj.

¹¹ Max lajwi tu', max al-lay ayin axca ti': Yowalil ok alil junelxa, tzetak yetal ok jay yiban conoblak, yiban nacionlak, yiban junjun tiejlak, c'al yiban juntzan eb rey, ẍi ayin.