Am 8 - A Txꞌan Biblia Yin Kꞌanjobal 1989

Is motxal sat awoj k'inxa

¹ A tzet max tx'ox Jehová wila': A ton jun motx sat awoj, tol caw wal k'inxa.

² Cax max k'anlen Cham ayin axca ti': —¿Tzet yetal chel bay tu' Amós? ẍi Cham ayin. —A jun motx sat awoj caw wal k'in chi wila', quin chi bay. Cax max yalon Jehová ayin axca ti': —A Israel, axca wal tol mayal k'inbi elok. Majxac'al wak' mimanc'ulal yin junelokxa.

³ A wal yet ok waon oc yailal tu', a bit chi oc bay templo, a ok meltzoj oc yin cusc'ulal. Xiwil anima ok camok, tz'inxac'al ẍi eb. Xiwil mimanilej ok can teljab bay tu', ẍi Jehová.

Cawilxa chi jayoc beyc'ulal yiban conob Israel

⁴ Chi cam wal e yaben juntzan k'anej ti', mac ex che yetnej eb yaynakil, c'al eb meba' bay conob ti'.

⁵ Che yalon paxok: ¿Bak'in wal ok ec'tok k'in yet unin xajaw, cax ok je' co txonon co trigo? ¿Bak'in ok ec'tok c'ual xewilal, cax ok je' co txonon sat jawoj yin can tojol, c'al yetok echbal man tz'akanok?

⁶ Ok co txon c'apax yobalil ixim. Junelnej tol chi jetnej juntzan eb meba' ti', masantac'al ok yal txonon el ba eb ayon, cax chi occan eb co mosook. Caywal tu' ok yun tojlanen el eb is jec ayon, caxc'al asan ch'an junok mojan xanabej is jec eb, quex chi.

⁷ Yuj tu' max yak' Jehová is ti'; Cham chi ilay can yuj Jacob max yal axca ti': C'am bak'in ok tok c'ayc'ulal wuj is yobtakil eb, ẍi Cham.

⁸ Ok bilaj tx'otx' tx'otx' yuj masanil juntzan tu', ok ok' masanil eb cajyom. A tx'otx' tx'otx' ti', ok aj tx'otx' can, cax ok ayc'ay paxok, axca chi yun a' Nilo, chi ch'ibaj a' cax chi tan pax ay a'.

⁹ Ayin Jehová in, chi wal yuj jun c'ual tu': Yet wal chuman c'u, cax ok waon oc k'ekk'inal, yet wal watx' yay yakan c'u, cax ok oc kekk'inal yiban sat tx'otx' ti'.

¹⁰ A e k'in che cha', ok yuncan aj yin cusc'ulal. Axa e bit ok occan yin ok'il yuj camich. Axac'al pichilej yet cusc'ulal ok e yaocok, cax ok e tzukon el xil e jolom yuj e tx'oxon el e cusc'ulal. Ok ex ok' axca junok mactxel chi ok' yuj max cam junok c'otan yuninal, cax masanil yobxac'al ok yun lajwican ajok.

¹¹ Ay wal jun c'ual ok watek wajil bay yulyibank'inal ti'. Man wajilok yuj loj, tamwal takintial yuj aej, palta wajil yuj in k'anej.

¹² A eb anima, toxac'al ok ec'jabtok eb yin ak'bil puralil yin yec' sayon ec' eb mac chi alon el in k'anej. Ok tok eb bay is tilak a' Mar Muerto, masantac'al ok apnok oc eb bay is tilak a' Mar Mediterráneo, ok ec'c'al eb bay can paq'uil tx'otx' tx'otx'; palta c'am mac ok ilchaj yuj eb.

¹³ A wal eb ix k'opoj ix caw wal watx' yili, c'al eb ach'ej caw wal tec'an, toxac'al ok pax yip eb yuj takintial yet jun c'ual tu'.

¹⁴ Caywal tu' ok yun mactxel chi yak' is ti' bay juntzan yechelej q'uixwiltak ay bay Samaria, a ton eb chi alon axca ti': Chi wak' in ti' yin bi diosal eb aj Dan, ma yin bi diosal eb aj Beerseba, ẍi eb. Yuj tu' ok ayc'ay eb, palta majxac'al aj wan eb, ẍi Jehová.