Am 7 - A Txꞌan Biblia Yin Kꞌanjobal 1989

Oxeb tzet yetal max ak'i yil Amós

¹ A yet tolto wal chi tzoc'lay el an babel sacate, tol yet cham rey yayji, yet lananxa tit wol an junelxa, a Jehová Cham Yajaw max ak'on wila', tol lanan yak'on pitzc'oj aj no chapulín.

² A yet lananxa lajwi el an ac'un yuj no chapulín, cax max walon axca ti': —Mamin Jehová, ak' wal mimanc'ulal jin, ayon yinatil on Jacob ti', tol yaliẍ conob on ch'an. ¿Tzet wal ok yun techaj jun ti' juj? quin chi.

³ Cax max naon Jehová yin jun ti', max yalon axca ti': —A jun ti' man ok yunej, ẍi Cham.

⁴ Max tx'oxon c'apax Jehová Cham Yajaw ayin tol k'ak'ej max yatek yin yaon oc yailal, toxac'al cak xayinak is tzak'ak'il, max takaj a' miman mar yuj, cax lanan tak c'apax aj tx'otx' tx'otx'al conob Israel.

⁵ Cax max waloni: —Mamin Jehová, elok wal yin a c'ul, ocan waanok. ¿Tom wal ok techaj juj ayon yinatil on Jacob ti'? Ilab tol yaliẍ conob on ch'an, quin chi.

⁶ Cax max naon Jehová yin tzet yetal nabil yuj, max yalon axca ti': —A jun ti', tamwal ok yunej, ẍi Cham.

⁷ Max tx'oxon c'apax Jehová jun ti' ayin. A tu' ayic' Cham bay junok pared tol watx'nebil yetok plomo yet albañil, lacbil c'apax aj jun plomo yuj.

⁸ Cax max k'anlen Cham ayin axca ti': —¿Tzet yetal chel tu' Amós? ẍi Cham. —A jun plomo yet albañil chi wila', quin chi bay. —Axca chi yun yil-lay junok pared yetok junok plomo, caytu' ok yun wilon tzetbil yayji in conob Israel, tatol tojol yayji is beybal ma c'amak. Ta yob, majxac'al wak' mimanc'ulal yiban eb junelxa.

⁹ A juntzan can ayajok bay chi oc eb yinatil Isaac yin ayilal, ok lajwok ayok. A juntzan is templo eb aj Israel ok uchchajayok, cax ok in chekon c'aylay el yinatil Jeroboam yetok espada, ẍi Jehová.

Max chalej ba Amós yetok Amasías

¹⁰ A Amasías, sacerdote yayji bay Betel, a max chekon yal-lay bay Jeroboam, reyal Israel axca ti': Mamin rey, a Amós lanan yec' xol a conob, yuj yak'on ajc'ulal en. Majxa techaj yuj eb anima tzet chi yalil tu'.

¹¹ Chi ec'c'al yalon co xol axca ti': Yuj espada ok cam Jeroboam, cax ok ilaycantok masanil conob Israel ti' preso bay tx'ok conobal, ẍi Amós, ẍitok Amasías.

¹² Max yalon Amasías bay Amós axca ti': —Elan cayti' ach chekbej Dios, cax chach tojcan bay Judá. A bay tu' ok e a lobej, yuj a k'anjab elok,

¹³ palta c'am tzet chal yin conob Betel ti', yujtol a cayti' chi oc cham rey yin ayilal, tol miman templo yayji yul is makbej cham, ẍi Amasías tu'.

¹⁴ Cax max tak'wi Amós axca ti': —Ayin ti', man chekbejok inc'alta' Dios, tamwal chi wochej chi wunej. Watx' chin low yin iloj wacax, c'al yin taynej xolakilteal higo.

¹⁵ Palta a Jehová max in ion el yintak no wacax tu', cax max yalon ayin axca ti': Asi', cax chi toj alon in k'anej bay in conob Israel, ẍi Cham ayin.

¹⁶ Yuj tu' xan chi cam wal aben k'anej Jehová tinani'. A ton juntzan k'anej chal ach ti', tol c'am chalil k'anej Dios yin eb israel yinatil Isaac, cachi ayin.

¹⁷ Yuj tu', a juntzan ti' chi yal Jehová en: Satak wal conob, ok oc xal etbi yin ajmulixal. A eb a c'ajol, c'al eb a cutz'in ok xiklay cam eb. Ok pojlaycan ec' a tx'otx'. Axa bay tx'otx'al eb tx'ok conobal ok ach camok, cax najattac'al ok ilaycantok eb jet israelal preso, ẍi Jehová, ẍi cham Amós.