Am 5 - A Txꞌan Biblia Yin Kꞌanjobal 1989

Yawtebal conob Israel yet chi na ba c'ul

¹ Ex wet israelal, abek wal in k'anej yet cusc'ulal chi walcan el e yiban:

² A co conob lajan wal axca junok ix k'opoj mayal ayc'ayi. C'amxa yechel ok je' yaj wan junelxa, yujtol max beklaycan tx'oklil bay is tx'otx', c'amxa mactxel ok ion aj wan.

³ Axca wal ti' yalon Jehová Cham Yajaw ayex: Ta a junok e conob chi yatok junok mil winak yin owal, asanxanej cien ok meltzojok. Ta asan junok cien chi yatok junok e conob xin, asanxanej lajonwan ok meltzojok, ẍi Cham.

⁴ Axca wal ti' yalon Jehová ayex: Meltzojanek ayin, cax ok ex iquisbok ec'ok.

⁵ Manchak ex toj bay conob Betel, tamwal bay Gilgal, tamwal chex ec' c'apaxtok bay Beerseba, yujtol a eb aj Gilgal, yowalil ok tokcan eb preso bay junok tx'ok nacional, axa Betel xin, yowalil ok uchchajcantok, ẍi Jehová.

⁶ Meltzojanek bay Jehová, cax ok ex iquisbok ec'ok. Ta c'amak, ok yatek Cham k'ak'ej yiban co makbej ti', c'am junok dios bay Betel ok je' yak'on tanok.

⁷ A wal ayex che q'uextok tojolal yin yobtakil, ok'bal ex c'ul, tol c'am che watx'nej is k'anej eb anima yin watx'il.

^8-9 Meltzojanek bay Jehová, Cham max watx'nen waycan chi yik Motz, yetok c'apax waycan chi yik Orión. A ton c'apax chi aon oc ak'balil yin c'ualil, c'al c'ualil tu' chi ya pax oc yin k'ekk'inalil. A ton c'apax chi awten a' aej ay bay a' mar, cax chi secon ay bay yiban tx'otx' tx'otx'. A ton chi ak'on lajwok ay eb soldado tec'an waayi, cax chi lajwican ay is cuartel eb. Jehová ton wal yoc bi Cham.

¹⁰ Ok'bal ex wal c'ul, ayex chi chichon oc e c'ul yin mac chi ion can tojolal bay chi oc beyc'ulal, cax che yak'on yobc'ulalil yin junok chi ak'on testigoal yin yel.

¹¹ Tol wal che yetnej eb meba', cax che yion ec' trigo eb anima yin nabac'al. Man ok je' e yayji ec' bay e ch'en na che watx'nej ajok, tamwal okto je' e yuq'uen yal an uva max e yawa'.

¹² Wojtak wal jantakxa yobtakil max el e yuneni. C'amxa lajubal e mul. Che yetnej eb watx' is nabal, cax che chaon ch'en tumin yuj e yobal beyc'ulal. A bay juzgado che yak' low yin eb meba' anima tol watx' is nabal.

¹³ Yuj tu' xan a mac aj nabal, chi tz'inji ayok, yujtol yobxac'al tzet chi uj tinani'.

¹⁴ Manchak e yun yobtakil, palta unek watx'il, yet watx' chex iquisbic'al ec'ok, yet watx' a Jehová Cham Yajaw yin Masanil ok ayjokc'al ec' e yetok, axca chi yun e yalon tu'.

¹⁵ Yajek el yobtakil, cax che camc'ulnen watx'il. Chi cam e yiloni ta a bay juzgado watx'xa chi yun yoc beyc'ulal. Tekan axca tu xin, a Jehová Cham Yajaw yin Masanil ok cus c'ul e yin, mac ex yinatil Israel ex ayexto ec' ti'.

¹⁶ Axca wal ti' yalon Jehová, Cham Yajaw yin Masanil: A bay masanil yulak parque ok oc cusc'ulal. A bay masanil yulak calle ok oc aw yet yailal. Ok awtelay eb mulnajwom yet chi ul eb ok'ok, yetok eb yopisoc'alta' yayji yin ok'il.

¹⁷ A wal yet ok in jay ul waon oc yailal, caw wal ok ok' eb awom uva, ẍi Jehová.

¹⁸ Ok'bal wal c'ul mac chi yochej chi jay c'ual yet yowal c'ul Jehová. ¿E yojtak mi tzet ok e yun yet jun c'ual tu' ayex ti'? A jun c'ual tu', k'ekk'inalxac'al ok yunej, cax c'amxa sakk'inal.

¹⁹ A yet jun c'ual tu', lajan wal ok yun eb anima axca wal junok chi elaj bay junok no coj, palanxa yapni pax oc bay ayic' junok no oso. Ma axca yet chi octok junok mactxel bay yul yatut, cax chi oc k'ean bay sat bitz'ab yaloni, axa pax junok labaj chi chion bay tu'.

²⁰ A jun c'ual yet yowal c'ul Jehová tu', caw wal k'ekk'inal ok yunej, c'amxa jabok sakk'inal ok txeclojok.

²¹ Max yalon Jehová axca ti': Caw wal chin yaja', c'am chi wochej juntzan k'in che cha'. C'am chi wochej e wajayil tol miman yelapnok e yaloni.

²² C'am chi wochej e xajanbal che yak' ayin, yuj in e yion can, tamwal e yofrenda yin ixim trigo. Tamwal chin cha' no bak'ech wacax che yak' yin xajanbalil ayin yuj e junc'ulalil wetok.

²³ Najat chex el in c'atan yet chi oc e nuk' e bitni, c'amxa chi wochej chi wab yoc nuk' e yarpa tu'.

²⁴ Palta a tzet chi wochej, tol chi ajc'al can bey tojolal, axca bey a' aej; ac'alta' c'apax watx'ilal, lajan wal axca junok nuk' aej tol c'am chi tani.

²⁵ A wal ayex ti' ex israel, a yin cawinak abil max ex ec' bay tx'otx' takin tx'otx'. Tokwal a ayin max e yak' tz'a xajanbal, c'al ofrenda bay tu'.

²⁶ C'amak, palta ayex ti' max e yik beyic' is yenel yiban e yajawil, c'al is batxbanil e yechelej tol yajbejtak tu', yechel waycan e diosal tol ayex caw max e watx'nej.

²⁷ Yuj wal tu' ok ex wacantok preso bay sataktok Damasco. Axca wal tu' chi yun walon ayin chi wik Jehová, tol Yajaw in yin Masanil, ẍi Cham.