Am 2 - A Txꞌan Biblia Yin Kꞌanjobal 1989

Moab

¹ Axca wal ti' yalon Jehová: A wal eb aj Moab, caw wal xiwil yobtakil max yun eb, xan yowalil ok waoc yailal eb. Max yak' wal tz'a eb is bakil eb reyal Edom, tanxac'al max yuncan yuj eb.

² Yuj wal tu' xan ok waoc k'ak'al Moab, a jun k'ak'ej tu' ok ak'on lajwok ay cuartel-lak bay Queriot. Xol aw yet owal, c'al yok' trompeta, caytu' ok yun cam masanil eb aj Moab.

³ Ok wak' cam reyal eb, cax ok cam c'apax eb winak mimanbil yetok, ẍi Jehová.

Judá

⁴ Axca wal ti' yalon Jehová: A wal eb aj Judá, caw wal xiwil yobtakil max yun eb, xan yowalil ok waoc yailal eb. Maj wal cha yab eb in cuybej, tamwal max yikej eb in ley. A ti yet eb tol max oc eb ayilal bay comon dios bay max oc eb yichmam eb yin ayilal.

⁵ Yuj wal tu' xan ok waoc k'ak'al Judá, axa jun k'ak'ej tu', ok ak'on lajwok cuartel-lak bay Jerusalén, ẍi wal Jehová.

Ok jay yailal yiban Israel

⁶ Axca wal ti' yalon Jehová: A wal eb aj Israel ti', caw wal xiwil yobtakil chi yun eb, xan yowalil ok waoc yailal eb. Chi txonlay el eb anima watx' is nabal yuj eb, asannej yuj c'am chi je' tojlanen is jec, caxc'al asan yuj tojol junok mojan xanabej xan chi txonlay el eb meba'.

⁷ A eb meba' tu' chi etax yuj eb, cax yob chi yut beyc'ulnen eb yiban eb yaynakil. Chi mulji jun mamej, c'al is c'ajol yetok jun ix criada. Yuj tu' xan yob chi al-lay win.

⁸ A yiban pichilej chi cha eb, yuj chi yak' eb tumin majanil, a tu' chi ay telan eb mulji satak junjun altar, cax chi loon eb loj chi altelay bay comon dios. A yetok ch'en multa chi cha eb, chi man eb an, cax chi uc'wi an eb bay templo is diosal eb tu', ẍi Jehová.

⁹ Chi yal Jehová: Ayin Jehová in chi wala', tol max wak' lajwok eb amorreo, yuj wak'on is tx'otx' eb ayex. Junelnej max wak' lajwok eb, caxc'al mimek tel eb axca tel te c'ute', cax caw eb axca te ji'.

¹⁰ Palta ayex ti', max ex wieltek bay Egipto, cax max ex wiontok yin cawinak abil bay takin tx'otx', yuj wak'on is tx'otx' eb amorreo tu' ayex.

¹¹ Max wiaj juntzanok e yinatil yin in chekbejok; axa juntzanxa eb, wet-xa max yuncan eb wuj. ¿Man mi yelok juntzan ti', ex israel?

¹² Axa ayex ti', max e yak' pural eb wet-xa yayji yuc'wi an, cax max e tenchanen eb in chekbej yin yalon el in k'anej.

¹³ Yuj tu xin, axca wal chi yun toj bulan ixim trigo yiban junok carreta, toxac'al chi natx'atx'i yet chi beyi yuj yalil, caytu' ok ex wut ayex ti'.

¹⁴ A yet jun c'ual tu', a eb jelan beyi, manxa ok je' yel eb, axa eb ay yip, axq'uijan tol c'amxa jabok yip eb, tamwal eb soldado tec'an, okto colchajok.

¹⁵ A mactxel chi julwaj yetok julbalej, majxac'al techaj yuj. Tamwal ok colchaj eb ok yak' yanej, tamwal eb chi elaj yetok chej.

¹⁶ Ayin wal caw Jehová in chi wala', tol a wal yet jun c'ual tu', a eb caw jelan yin owal, ok bekcan el eb is yarma, cax ok tok eb elajok, ẍi Jehová.