Tzetak Yetal Max El Yunen Eb Chekbej Jesús 3 - A Txꞌan Biblia Yin Kꞌanjobal 1989

Max watx'jican yakan jun nak winak

¹ A yet junel, yet mi wal a las tres yet lajwi chuman, junej toj Pedro yetok Juan bay templo Dios, yujtol caytu' yorail is txaj eb israel bay tu'.

² Ay jun winak c'am chi je' bey yintaxc'alta' yaljubal. Junjunc'al c'u, chi bet batxlaycan bay ti' jun puertail templo Dios chi yik Watx' Yili, cax chi k'anon tumin bay eb anima chi betic' bay templo tu'.

³ Axa max yilon nak, max apni oc Pedro yetok Juan bay templo tu'. Axa wal yoctok eb, max k'anon nak tumin bay eb.

⁴ Cax max oc t'anan Pedro yetok Juan tu' yin nak. —Titan t'anan jin, ẍi Pedro tu' bay nak.

⁵ Axa tit t'anan nak yin eb tu'. A naon nak, tol ok ak'lay jabok tumin nak yuj eb naoni.

⁶ Palta max yal Pedro tu' bay nak axca ti': —Ayon ti', c'am co tumin, palta ay jun tzet ay ayon, a ok jak' ayach. Yuj yipalil Jesucristo aj Nazaret, ajan wanok, beyan, ẍi Pedro tu' bay nak.

⁷ Lajwi tu xin, axa yoc mitx'an Pedro tu' yin watx' k'ab nak, max tok'on aj lecanok. Ayman max yi yip yakan nak, max occ'al yip nuk' yakan nak cabil.

⁸ Max ajc'al jucnaj nak, max aj lecanok, max chaon el yich beyi, max octok yul yamak'il templo Dios yetok eb. Chi aj t'uknajok chi beyi, cax chi yalon is watx' k'anej bay Dios.

⁹ Max yil masanil eb anima ayic' bay tu' bey nak. Max yab c'apax eb yalon nak is watx' k'anej bay Dios,

¹⁰ xan caw wal max c'ayaj c'ul eb sic'libil, yuj tzet max yun watx'ji nak, yujtol yojtak eb, tol junjunc'al c'u chi ay chotan nak ti' jun puertail templo chi yik Watx' Yili, cax chi k'anon tumin bay anima.

Max k'anjab Pedro bay tenta Salomón

¹¹ A nak max watx'jican yakan tu', tzakanxac'al nak yintak Pedro c'al yintak Juan. Axa masanil anima xin, toxac'al chi c'aycan aj c'ul eb. Yuj tu' xan max wajbaj oc ba eb, cax max jayoc eb yin eb, yet ayic' eb bay tentail templo Dios chi yik yet Salomón.

¹² A yet max yilon Pedro jun tu', max yalon bay eb: Ex wet israelal: ¿Tzet xan caw wal chi c'ayaj e c'ul yuj jun ti'? ¿Tzet xan chi c'ayaj e c'ul jin? ¿Tom che na tol yuj jipalil yul jet, ma yuj co watx'il yul jet, xan max beycan aj jun winak ti'?

¹³ A co Diosal, ac'al ton oc is Diosal eb jichmam Abraham, yetok Isaac, c'al Jacob. Yuj Dios tu' xan miman yelapnok Jesús, is C'ajol. Palta ayex ti', max e yaoc yul k'ab eb yajaw. A Pilato max nabalnej bekon elok, palta ayexxa maj yal e c'ul.

¹⁴ A Jesús, yetc'al Dios yayji, caw wal tojol is beybal, palta ayex ti', maj yal e c'ul max beklay elok. Axalaj jun mak'om cam anima max e k'an bekchajok.

¹⁵ Xan caytu' max e yut e yak'on mak'lay cam Cham Aj K'inalej. Palta max ictzonelay aj Cham yuj Dios xol eb camnak. Caw chi jak' co ba testigoal yin jun ti' bian.

¹⁶ A nak anima che yil ti', e yojtakxata' nak. A Jesús max ak'on watx'jok nak. Asan yuj chi jaoc co c'ul yin Cham xan max watx'ji nak e satak e masanil sic'libil.

¹⁷ A tinani xin, ex wet conob, wojtak tol max e yak' cam Cham Jesús yujtol man ton e yojtakok tzet yetal lanan e yuneni. Ca c'apax tu' eb co yajawil, man yojtakok eb.

¹⁸ Palta axca ton ti' max yun yunen el yuj Dios tzet albilcan yuj eb is chekbej yin ayokto. Yujtol yalnakcan eb tol a Cham Cristo, yowalil chi yab yail.

¹⁹ Yuj tu xin, naek e ba. Q'uexek e beybal, aek oc e nabal yin Dios, yet watx' chi jolay c'ay e yobtakil. Xan ta chi jut axca tu', ay jun tiempoal ok jayok, cax ok yak'on Dios Jajawil co tzalojc'ulal ayon israel on ti'.

²⁰ A ok chekon paxtek Jesús yet cayelal, a ton Cristo. A ton Cham max ak'lay yopiso yettax babelal ayex, c'al ayon.

²¹ Palta tinani', yowalil chi ayji ec' Jesucristo satcan, masantac'al chi jay tiempoal watx'ji oc masanil tzet yetal yuj. Caytu' max yut yaloncan Dios yin yak'balnen eb is chekbej yet payxa, eb tol yetc'alta' Dios yayji.

²² Axa Moisés alnejcan axca ti' bay eb jichmam: A Cham Dios Jajawil ok siq'uil junok jet conob ti' is chekbejok, axca max quin yut sic'on el ayin ti'. Yowalil che yikej masanil tzet ok yal ayex.

²³ Yujtol tzanc'al mac man ok yikej bay tzet ok yal jun chekbej Dios tu', ok c'aylaycan el xol eb jet conob, ẍican Moisés yul tx'an Un tu'.

²⁴ Masanilc'al eb chekbej Dios ec'nak payxa, eb chi chatek yin Samuel, max yalcan el eb yabixal jun tiempoal ti'.

²⁵ Ayex ti', ay e yalon e yet jetok yin is yalben Dios albilcan yuj eb is chekbej. A yet max yak'oncan Dios trato yetok eb jichmam tu', max yak' c'apax can ayon yetok eb. Max yal jun is trato yak'nakcan yetok Abraham axca ti': A yujc'al enatil tu' xan ok cha' masanil nacionlak in watx'c'ulalil, ẍi Dios bay Abraham tu'.

²⁶ A yet max tx'oxon aj Dios is C'ajol, a ayon max babji chekontek, yuj yak'on is watx'c'ulal ayon yuj on yioncan el yin co yobtakil junjun on, ẍi Pedro bay eb yet conob tu'.