Tzetak Yetal Max El Yunen Eb Chekbej Jesús 25 - A Txꞌan Biblia Yin Kꞌanjobal 1989

Max apni oc Pablo satak cham Festo

¹ Axa yapni oc cham Festo tu' bay conob Cesarea tu' yuj chaon yopiso yin yoccan yin yajawil. Cabjiixto chaon cham yopiso tu', max toj cham bay Jerusalén.

² Axa jayoc eb yajawil eb sacerdote bay cham tu' yetok juntzanxa eb ay yopiso, yuj ul yak'lay queja Pablo yuj eb.

³ Max k'an eb bay Festo tu', tol chi ilaytek Pablo bay Jerusalén tu'. Max yal eb axca tu', yujtol yochwan eb tol a yul be chi mak' cam eb.

⁴ Palta max yal cham bay eb axca ti': —Preso yayji Pablo bay Cesarea tinani'. Ato yet jayeb c'u chin apni bay tu'.

⁵ Ato yet tu' chi je' toj eb e yajawil bay Cesarea tu' wetok. Tatol ay mul Pablo tu', chi je' toj yalon eb bay tu', ẍi bay eb.

⁶ Ay mi waxakebok c'u ma lajonebok c'u ayic' Festo tu' bay Jerusalén. Lajwi tu', axa paxay bay Cesarea. Axa yet junxa c'ual, max oc bay is despacho bay chi watx'nej ay owal. Max bet yak'on awtelay Pablo.

⁷ A yet max octok Pablo tu' satak, max oc oyan eb israel max tit bay Jerusalén tu' yin. Xiwil tzet yetal mimek yelapnok max tz'ak naaj eb yin, palta c'am wal jabok tzet chi tx'oxoc eb tatol yel chi yal eb.

⁸ Maxto lajwi yalon eb yet xin, cax max yalon ba Pablo axca ti': —C'am in mul chi oc in tenon tzet chi yal tx'an ley eb wet israelal. C'am in mul chi oc yin templo Dios. Tamwal c'apax bay cham yajaw bay Roma, c'am in mul chi oc bay cham, ẍi.

⁹ Palta tutun chi yochej Festo watx' chi can yul sat eb israel, yuj tu' xan max k'anlej bay Pablo axca ti': —¿Chi mi yochej a c'ul chach toj bay Jerusalén, yet watx' a ta tu' chach in beyc'ulnej? ẍi cham bay.

¹⁰ Axa tak'wi Pablo tu' bay axca ti': —Satak despacho cham yajaw aj Roma moj chin apni. Asan bay tu' chi je' in beyc'ulnelayi. Ojtak wali tol caw wal c'am in mul chi oc bay eb israel ti'.

¹¹ Tatol ay junok in mul tol moj chin cam yuj, camok inabi. Palta ta c'am pax in mul chi txecloj el yuj eb israel ti', c'am junok mac chi je' quin yaon oc yul k'ab eb. Chin k'antok in ba bay cham yajaw bay Roma. A cham ok naon tzet ok wunej, ẍi Pablo tu' bay.

¹² Axa k'anjab Festo tu' yetok juntzan eb yet yajawil chi ak'onc'al is nabal. Lajwi tu', max yalon bay Pablo tu' axca ti': —Ti wal ach cha k'antok a ba satak cham yajaw bay Roma. Yuj tu xin, ok ach watok, ẍi bay.

Max apni oc Pablo satak cham rey Agripa

¹³ Ay xam jayebok c'u tu', catatu' max apni oc cham rey Agripa*fn* yetok xal Berenice bay Cesarea tu', yuj ul eb k'anjab yetok Festo, yujtol max cha' yopiso.

¹⁴ Tx'ialc'al c'ual max ayji ec' eb. Ay jun c'ual max yaltek Festo tu' bay cham rey tu' tzet yayji oc Pablo. Axa yalontek axca ti': —A yet max el Félix yin yopiso, ay jun winak chi yik Pablo aycan oc preso yuj.

¹⁵ A yet max in betic' Jerusalén, max jayoc eb yajawil eb sacerdote ayin, yetok eb ichamtak winak ay yopiso, max c'oli yak'on queja eb Pablo tu' ayin. Yochej eb tol max wak' orden yet chi cami.

¹⁶ Axa walon bay eb axca ti': Palta a yalon co ley ayon aj Roma on ti', c'am chi je' tol comonc'al chi ak'lay cam junok mactxel. Yowalil chi yil-lej oc eb sat yetok eb chi ak'on queja eb tu' satak juez, cax chi colon ba eb, quin chi bay eb aj Jerusalén tu'.

¹⁷ Yuj tu xin, a yet max jayoc eb cayti', maj in cha' mayjok tiempo. Yewial tu', max in octok chotan yul in despacho bay chin watx'nej el owal. Axa wak'on bet tit Pablo tu'.

¹⁸ A in naoni, tol miman mi is mul. Palta axa eb chi ak'on queja tu', c'am tzet max yaoc eb yiban axca max wut in naon tu'.

¹⁹ Asan janic' max yal eb, tol ay tzet yob chi yal yin is religión eb. Max yalontek eb yuj jun nak chi yik Jesús tol camnakxa. Palta axa ab Pablo tu' chi aloni tol iquis paxok. Asan yuj juntzan tu' xan chi yak' queja eb.

²⁰ Ayin ti', maj nachaj wuj tzet chi wut in watx'nen ay eb. Yuj tu' xan max in k'anlej el bay Pablo tu' axca ti': ¿Chi mi yochej a c'ul chach toj bay Jerusalén, yet watx' a ta tu' chach in beyc'ulnej? quin chi bay.

²¹ Axa yalon ayin axca ti': Chin k'antok in ba satak cham yajaw bay Roma. A cham ok naonok tzet ok wunej, ẍi Pablo tu' ayin. Yuj tu xin, ayinxa max wala' tol chi can preso jabokxa tiempoal, masantac'al chi watok bay cham yajaw tu', ẍi Festo tu'.

²² Lajwi yaben cham rey Agripa juntzan tu xin, axa yalon cham bay Festo tu' axca ti': —Chi wochej chi wab c'apax tzet ẍi Pablo tu' ayin ti', ẍi bay. —Ta axca tu', yecalto ok ab tzet ẍi, ẍi Festo tu' bay.

²³ Axa yet junxa c'ual max jayoc cham rey Agripa tu' yetok xal Berenice. Ayxa may yili eb yetok is pichil, max ocapnok eb yul bay chi watx'ji yayji owal tu' yetok eb yajawil eb soldado, c'al juntzan eb mimek winak mimanbil yuj conob. Axa chekon Festo toj tit Pablo tu'.

²⁴ Lajwi tu' max yalon axca ti': —Mamin rey Agripa, c'al jantak ex max e wajbaj e ba jetok ti', tix Pablo ti'. Xiwil eb israel max alon yuj, tolab ay is mul. Max yal eb ayin bay Jerusalén, cax chi yalon c'apax eb ayin bay Cesarea ti'. Caw wal chi aj yaw eb k'anonc'al camich yiban.

²⁵ Palta chin na' ayin ti', c'am junok is mul moj cam yuj. Mayal k'antok ba nak satak cham Augusto, yajaw bay Roma, yet watx' chi na' cham tzet chi yunej. Yuj tu xin, chin na' tol ok watok.

²⁶ Palta c'am tzet watx' in tz'ibentok yin bay cham yajaw tu'. Yuj tu xin, xan chi witek a satak ti', mamin rey Agripa, c'al e satak e masanil. A tinani', k'anlejek e yab bay, ta c'uxan ay junok is mul chi ilchaj el e yuj, cax chin tz'ibentok bay cham yajaw tu'.

²⁷ Yujtol man yetc'ulalok chi wabej, ta ay junok mac chi watok preso, palta c'am chin tz'ibej paxtok is mul, ẍi Festo tu'.