Tzetak Yetal Max El Yunen Eb Chekbej Jesús 24 - A Txꞌan Biblia Yin Kꞌanjobal 1989

Chi yal ba Pablo bay satak cham Félix

¹ Oyebxa c'ual yapni Pablo bay Cesarea, max apni c'apax oc cham Ananías, cham sat sacerdote. Ajun jaywan eb cham ichamtak winak ay yopiso yetok, yetok jun cham licenciado chi yik Tértulo. Max apni oc eb satak Félix tu', yuj bet yak'on queja eb Pablo.

² A yet max jayoc Pablo tu', max c'oli yaon oc Tértulo tu' queja yiban. Max yalon bay cham Félix tu' axca ti': —Yuj wal dios ayach mamin yajaw. Oj xan c'amc'al owal co xol. Watx'c'al ak'on cuenta masanil tzet ayoc yalan ekbej, yujtol jelan ach.

³ ¡E…! yelxac'al watx' ach mamin Félix. A bay junjun lugar chi txecloj elok, tol watx'c'al tzet chi el a watx'neni. Yuj wal dios ayach.

⁴ Palta yet watx' man mimanok a tiempo chi jiec'ok, ¿c'am mi chi el yin a c'ul abenxac'al jay belan k'anej chi jochej chi jal ayach?

⁵ A nak Pablo ti', caw wal chon yetnej nak. Ijanxa c'am chi techaj nak juj. Pilan chi ec' nak uchoj aj owal xol eb jet israelal bay junjun lugar. Yajaw yayji nak yin jun q'uexan religión, a ton eb chi yaoc c'ul yin jun nak aj Nazaret.

^6-7 Max yak'lej nak yion octok eb man israelok yul templo, yet watx' chi etax el templo tu' yul sat Dios. Yuj tu xin, max co mitx' nak.*fn*

⁸ Ach ti' chi je' a k'anlen ab bay Pablo ti'. Catatu bian, cax ok ojtaknen elok, tol yel, cax man toc'alok chi jalaj yiban, ẍi Tértulo tu'.

⁹ —Caw wal yel chi yal Tértulo ti', ẍi eb israel ajun yetok tu'.

¹⁰ Lajwi tu xin, axa cham yajaw tu' max yak'biltok is k'ab bay Pablo tu' yet chi yalon yet. Axa yalon axca ti': —Ach ti', mamin yajaw, wojtak tol tx'ialxa yabilal juez ach bay jun nación ti'. Yuj tu' caw wal chin tzaloji, chi walon in ba ayach.

¹¹ Chi je' ojtaknencan el juntzan tzet ok wal ayach ti', tol yel. Lajcawebixto ch'an c'u wapni bay Jerusalén, yuj bet wion ay in ba bay Dios.

¹² C'am junok anima chin teyelej in ba yetok. C'am c'apax junok lugar bay max ec' wuchaj somnaj anima. Tamwal yul templo Dios, tamwal yul nail culto eb wet israelal, tamwal bay junok lugar bay Jerusalén tu'. C'am wal jabok in mul max ilchaj yuj eb.

¹³ A eb nak chin ak'on queja ti', c'am jabok tzet chi tx'ox oc eb nak, ta yel juntzan chi yalaj eb nak win ti'.

¹⁴ Yel toni, a Dios bay yalnak ba eb wichmam, a' chi wak' serbil, atac'ala' jun cuybanilej, a ton jun tu' chi yal eb nak ti' q'uexan religional. Palta ayin ti', chi waoc in c'ul yin masanil tzet tz'ibbilcan yul ley Moisés, c'al jantak tzet tz'ibbilcan yuj eb chekbej Dios.

¹⁵ Caw wal chi waoc Dios yipok in c'ul, tol ok ictzonelay aj eb camnak masanil, eb watx' is nabal c'al eb yob is nabal. Cay c'apax tu' naon eb nak ti'.

¹⁶ Yuj tu xan caw wal chin beyc'ulnej tzet chi yal yikbomal in nabal, yet watx' manchak oc in yobtakil yul sat Dios, c'al bay eb wet animail.

¹⁷ Ay xam jayebok abil c'am inxa ec' bay Jerusalén. Yuj tu' xan max in apni pax oc junelxa, yuj in colwaj bay eb meba', c'al wak'on jabok in sabal bay Dios.

¹⁸ Yul templo Dios ayin octok yuj wak'on in sabal tu'. Toxa mayal in watx'nej in ba tu', axca yalon co ley. Jaywannej anima ayoctok wetok, cax c'am mactxel bulan ec'ok, c'amc'al owal chi el wuneni. Palta a ton yet tu' max in mitx'lay yuj juntzan eb israel aj Asia.

¹⁹ Ta ay wal in mul max yil eb, titokab eb a satak ti', ulokab yal eb tzet in mul tu'. Moj wal tol a eb max jayi.

²⁰ A tinani xin, yalokab eb chin ak'on queja ti', ta ay in mul max ilchaj el yuj eb sat yajaw eb wet israelal, yet max quin is beyc'ulnen eb.

²¹ Asan ta yujtol a yet ayin ec' satak eb yajaw tu xin, cax max walon yin ipejal bay eb axca ti': Lanan in beyc'ulnelayi, yujtol chi waoc yin in c'ul, tol ok ictzonelay aj eb camnak, quin chi bay eb, talaj yuj jab tu', ẍi Pablo bay Félix tu'.

²² A Félix tu', yojtak wal is cuybanil eb creyente sic'libil. Yuj tu' xan a yet max yaben cham juntzan axca tu', max yalon axca ti': —Jayokab cham coronel Lisias, cax ok yalon cham ayin, tzet yayji oc jun e yowal ti'. Canokab axca tu' bel, ẍi bay.

²³ Lajwi tu', max yalon cham bay cham capitán, tol ac'ala'okab taynelay Pablo tu'. Palta bekanokab yayji jabok, cax chi je k'anjab yetok eb yamigo, c'al yak'laycan serbil jabok yuj eb.

²⁴ Cab oxebxa semana tu xin, max jayoc cham Félix bay Cesarea tu' junelxa. Ajun yistzil cham yetok, Drusila bi xal, israel xal. Axa yawten cham Pablo tu', yuj yaben bay tzet chi jut jaon oc co c'ul yin Jesucristo.

²⁵ Max yalon Pablo tu' bay cham, tol yowalil watx' chi jut co beybal, cax chi co mitx'on oc wanaj co ba yin yobtakil. Max yalon c'apaxok, tol ok beyc'ulnelay masanil anima. A yet max yaben cham axca tu', max xiwaj cham, max yalon cham bay Pablo tu' axca ti': —A tinani xin, k'okbilxa, paxan bela. Ta ay bay colan in, ok ach wawten junelxa, ẍi bay.

²⁶ A cham Félix tu', yochej cham tol chi yak' Pablo jabok tumin bay yin ewantakil, cax chi bekon elok. Yuj tu' xan tx'ial elc'al max yawtej k'anjab yetok.

²⁷ Yin cab abil cac'al tu' chi yut ba yetok Pablo tu'. Lajwi tu xin, max el cham yin yopiso. Axa cham Porcio Festo max occan q'uexelok. A yet max el Félix tu' yin yopiso, toc'al max cancan Pablo yul preso yuj, yet watx' chi ochelay Félix tu' yuj eb aj israel.