Tzetak Yetal Max El Yunen Eb Chekbej Jesús 22 - A Txꞌan Biblia Yin Kꞌanjobal 1989

¹ Ex wet conob, c'al ex mamin ichamtak winak, abek tzet chi wut walon in ba, ẍi eltek.

² A yet max yaben eb tol hebreo chi yala', max texac'al numay eb, cax max yalon cham bay eb axca ti':

³ Ayin ti', israel in c'apax e yetok. A tu' aljinak in bay conob Tarso, yul yet Cilicia, palta a bay Jerusalén ti' max in ch'ibi. In meẍtolben cham Gamaliel.*fn* Max quin is cuy cham yin ley eb co mam jichmam sic'libil. Caw wal chi wak' serbil Dios yin masanil in c'ul, axca ton che yut e ba e masanil ti' tinani'.

⁴ A yet yalantok, max wetnej eb chi yaoc c'ul yin Jesucristo. Ay bay max in mitx'tek eb. Caxc'al winak, ma ix, asantanej chi michchaji, pilan chi watok eb preso. Toltax ay bay max wak' cam eb.

⁵ A cham sat sacerdote, yetok eb yajaw masanil, chi je' yalon eb tol yel chi wala'. Yujtol a eb ak'nej carta ayin, yuj in toj wion eb jet israelal bay conob Damasco. Max in toj Damasco tu' yuj in sayon ec' eb creyente. Wochej max bet in c'altek eb, cax chi wiontek eb bay Jerusalén ti', cax chi alay oc yailal eb.

Chi yaltek Pablo tzet max yun yoc yin creyenteal

⁶ Yuj tu', max in toj bet wiontek eb. Palta a yet lanan wapni oc cawilal conob Damasco tu', tekan chuman wal c'u, ay jun sakk'inal max tit jopnaj satcan cax max low win. Caw wal ow chaw yakan.

⁷ Max in ayc'ay telnaj sat tx'otx' yuj. Axa wabeni, max oc jay belan k'anej axca ti' ayin: Saulo, Saulo, ¿tzet yuj xan chin oktej ec'ok? ẍi ayin.

⁸ ¿Mac ach txel, Mamin? quin chi bay. Ayin ton Jesús, aj Nazaret in. Lanan in okten ec'ok, ẍi ayin.

⁹ A eb max toj wetok max yil eb jun miman sakk'inal tu', caw wal max xiw eb, palta maj yab eb yoc jay belan k'anej max al-lay ayin tu'.

¹⁰ Lajwi tu xin, max walon bay axca ti': ¿Tzet chi yochej a c'ul chi wun xin, Mamin? quin chi bay. Ajan wanok, cax chach toj bay Damasco. A tu' ok al-lay ayach, tzet yowalil ok onej, ẍi Cham Jajawil tu' ayin.

¹¹ Palta c'am jabok chi je' wilon yuj yowal yakan jun sakk'inal tu'. Axa eb ajun wetok tu' max in quetzon apnok bay Damasco.

¹² Ay jun winak bay Damasco tu' chi yik Ananías. Caw wal yelc'ulal wal tol yikem bay ley Moisés. Caw wal watx' is beybal yul sat masanil eb jet israelal bay Damasco tu'.

¹³ Max jayoc ayin, max yalon axca ti': Wuẍtak Saulo, jakchajokab can a sat ti', ẍi ayin. Ayc'alman max jakchajcan in sat ti', cax max wilon oc yin.

¹⁴ Axa yalon ayin axca ti': A Cham co Diosal, ac'al ton oc Cham tu' Diosal eb jichmam, a Cham sic'nej ach elok, yet watx' chojtaknej elok tzet chi yochej Cham en. Yuj c'apax tol chi yochej Cham tol chel yin Jesús, Cham tojol, c'al yuj chaben yul is nuk' tzet t'inan yalon ayach.

¹⁵ A tinani', ok al yabixal Jesús yab masanil anima. Ok al tzet max ela', cax ok alon tzet max abej.

¹⁶ ¿Tzet chechbanej tinani xin? Ajan wanok. Ak' bautizar a ba. Al a ba bay Jesucristo, yet watx' chi tancan a yobtakil eban, ẍi Ananías tu' ayin.

Tzet max yun cheklaytok Pablo bay eb man israelok

¹⁷ A yet max in jayoc bay Jerusalén ti', max in toj txajlok bay templo Dios. Palta a yet lanan in txajli tu', axca wal tol max in wayichli.

¹⁸ Max wil yin Cham Jajawil, cax yalon Cham ayin axca ti': Caw wal chak' ep el bay Jerusalén ti', yujtol man ok cha eb yab wabixal ok al bay eb, ẍi ayin.

¹⁹ Axa walon bay Cham axca ti': Mamin, yojtakxa eb, tol max in ec' yulak junjun nail culto eb wet israelal, yuj ec' in sayon eltek eb maxax yaoc c'ul en. Pilanc'al max in mitx' eb, cax max waon oc eb preso, max in mak'on c'apax eb.

²⁰ A yet max k'okch'ennelay Esteban, jun yalomal el abixal, ayin jun max in taynej pichil eb yet lanan k'okch'ennen eb tu', quin chi bay Cham Jajawil tu'.

²¹ Palta max yalon pax ayin axca ti': Asi', yujtol najat ok ach in chektok, a ta bay xol eb man israelok, a ta tu' ok ach tok, ẍi Cham Jajawil tu' ayin, ẍi Pablo tu' bay eb.

Yet ayoc Pablo yul k'ab cham coronel

²² Asannej juntzan ti' max makc'al yab eb anima tu' yin tzetc'al chi yal Pablo tu' bay eb. Lajwi tu xin, max chaon el eb yich yaj yaw yin ipejal axca ti': —Camokab nak. ¿Tzetto wal yuj xan iquis nak? ẍi eb.

²³ Caw max aj uchnaj eb tit yowal. Chi tzicobtanej eb is pichil. Chi wotzaj eb pokok cax chi tiẍon aj eb can, yujtol caw wal chi tit yowal eb yin Pablo tu'.

²⁴ A yet max yilon cham coronel tu' axca tu', max yak' cham ilay octok Pablo tu' yul cuartel. Max chekon cham tol chi mak'layi, yet watx' chi yalajok tzet yuj xan chi aj weknaj eb anima tu', cax chi tit yowal eb yin.

²⁵ A yet mayal c'alchaj Pablo tu' yuj eb, yuj ok mak'layok xan max yalon cham bay jun cham capitán ayic' bay tu' axca ti': —¿Tom wal ay leyal comonc'al chin e mak' xin? Ti pax aj Roma in, cax c'am jabok in mul chi txecloj elok, ẍi bay.

²⁶ A yet max yaben cham capitán tzet max yal tu', max bet yalon bay cham coronel tu' axca ti': —Caw wal ay is may jun chi el onen ti'. Aj Roma ab Pablo tu' yala', ẍi bay cham.

²⁷ Ayman max toj k'anlej cham coronel tu' bay Pablo tu' axca ti': —¿Tom yel aj Roma ach? ẍi bay. —Yel toni, aj Roma in, ẍi bay cham.

²⁸ —Cay in c'apax tu', palta caw wal miman tumin max wak'a', yet max in manon oc in ba aj Romail, ẍi cham bay. —Axa in ayin ti xin, romano in yintaxc'alta' waljubal,*fn* ẍi Pablo tu' bay cham.

²⁹ Axa yel besesok eb soldado ijan max mak'on tu' c'atan, axa beklaycan yuj eb tu'. A yet max yaben cham coronel tol aj Roma Pablo tu', caw wal max xiwaj cham, yujtol comonc'al max yak' c'al-layok.

Max apni oc Pablo satak eb sat yajaw

³⁰ Axa yet junxa c'ual, max yochen cham coronel tu' max yabej tzet yuj xan max ak'lay queja Pablo tu' yuj eb israel. Yuj tu xan max yiel cham ch'en cadena ayoc yin. Lajwi tu', max yak'on cham wajbaj oc ba eb yajawil eb sacerdote, c'al masanil eb sat yajaw xol eb israel tu'. Max ilay eltek Pablo tu' yuj cham yul cuartel, axa yak'on cham bay eb tu'.