Tzetak Yetal Max El Yunen Eb Chekbej Jesús 20 - A Txꞌan Biblia Yin Kꞌanjobal 1989

Viaje Pablo bay Macedonia c'al bay Grecia

¹ A yet mayal lajwi jun uchlejbail tu', cax max yak'on Pablo wajbaj oc ba eb creyente, yuj yiptzencan eb. Lajwi tu', max tak'li bay eb, axa toj yul yet Macedonia tu'.

² A yet max apni oc bay tu', pilan max ec' yil eb creyente bay junjun conob, axa yec' yalaycan oc nabal eb yuj tu'. Lajwi tu' max toj bay Grecia.

³ Oxeb xajaw max ayji ec' bay tu'. Chi yochej chi oc yul barco cax chi toj bay Siria, axa max yabeni, ay eb yet israelal chi ochen chi mitx'oni. Yuj tu xin, xan max na' tol watx' chi meltzoj pax bay Macedonia junelxa.

⁴ A yet max toji, ay juntzan eb creyente max toj yetok, a ton Sópater, c'ajol Pirro cham aj Berea, Aristarco, c'al Segundo aj Tesalónica, yetok Gayo aj Derbe, c'al Timoteo. Ay c'apax cawan eb aj Asia max toj yetok, a ton Tíquico yetok Trófimo.

⁵ A yet max apni oc eb bay conob Filipos, max can Pablo yuj eb bay tu', max babji toj eb bay conob Troas. Ata tu' max on yechbanen eb.

⁶ Axa ayon ti xin, a bay conob Filipos max jechbanej jilon jun k'in, yet chi lolay ixim pan c'am yich. Lajwic'al yec' jun k'in tu', max on toj yul barco. Oyeb c'u max on bey yiban a' mar, catatu' bian, max on apni bay conob Troas. A ta tu' max jil-lej co ba yetok eb max babji toj co satak tu'. Ukeb c'u max on ec' bay tu'.

Ayic' Pablo bay conob Troas

⁷ Axa yet domingo, max co wajban oc co ba yetok eb creyente masanil, yuj co loon ixim pan, yet nabaniltek Cham Jajawil. A Pablo max ak'on cuybanil eb creyente. Tutun tol t'inanxa chi toj yet yecal, xan xiwil tzet max yalcan bay eb, masantac'al max chumay ak'bal.

⁸ A yul jun cuarto yiban, a tu' max co wajbaj co ba. Xiwil tzektebal eb max yaocok.

⁹ Ay jun nak ach'ej chi yik Eutico. Chotan eltok nak ti wentena. Chi nojxi nak wayi, yujtol miman yutnak Pablo yakan is mensaje. Max tojxac'al chememok wayan yiban nak sic'libil, axa yel pitxnaj nak tu'. Ata bay yet is yox piso max tit nak. Camnakxa nak yet max ul sic'lay aj wan nak.

¹⁰ Max ayol Pablo xin, axa yay paknaj yiban tu', cax max lak'lay aj nak yuj. Axa yalon bay eb creyente axca ti': —Manchak ex oc il. Mayal ictzoj aj nak, ẍi bay eb.

¹¹ Lajwi tu', max on ajtok yul cuarto tu' yetok Pablo junelxa. Axa pojon ec' ixim pan co xol tu', max co loon ixim. Xiwiltoc'al tzet max yal Pablo tu', masantac'al max sakbi ajok. Lajwi tu' cax max toji.

¹² A nak ach'ej max ictzoj aj tu xin, max ilaytok nak bay yatut. Caw wal chi tzaloj eb, yujtol max ictzoj aj nak.

Co viaje bay Mileto

¹³ Ayon ti', max on oc yul barco, max on toj bay conob Asón. A tu' max jechbanej yapni Pablo, axca max jut jalon yetok, yujtol yakan max yaocok max toji.

¹⁴ A yet max apni Pablo ayon bay conob Asón tu', max oc yul barco jetok, axa co toj yetok bay conob Mitilene tu'.

¹⁵ Max ton toj xin, axa yet junxa c'ual max on ec' cawilal conob Quío. Axa yet junxa c'ual, max on apni bay junxa conob chi yik Samos ayay ti a' mar tu'. Yet junxa c'ual max on toj paxok, catatu max on apnioc bay conob Mileto.

¹⁶ Maj yal c'ul Pablo max on ec' bay conob Efeso, yujtol max yochej yin aymanil chon ec' bay Asia tu', yet watx' chon tzakay japni jilon k'in Pentecostés bay Jerusalén.

A tzet max yalcan Pablo bay eb anciano aj Efeso

¹⁷ A yet max on apni bay conob Mileto, max yaontok Pablo is chekbej bay eb yancianoal iglesia bay Efeso, yuj bet yawtelay eb.

¹⁸ A yet max jay eb, max yalon bay eb axca ti': Ayex ti', e yojtakxa in beybal yettaxc'al max in ulic' bay Asia ti'.

¹⁹ Ayinc'al oc wak'on serbil Cham Jajawil yin ayilal. Ay bay max in ok' sic'libil yuj pitalil anima. Xiwil el max in ak'lay porobal yuj juntzan tzet man watx'ok max yaoc eb wet israelal wiban.

²⁰ Palta ti wal e yojtak, maj in bek walon juntzan cuybanilej watx' ayex, tol e watx'ilalok chi yun yelocok. Pilan max wal k'anej Dios ayex satak conob, c'al bay e yatut.

²¹ Max wal bay eb wet israelal, c'al bay eb man israelok, tol yowalil chi na ba eb satak Dios, cax chi yaon oc eb c'ul yin Cham Jajawil Jesucristo.

²² A tinani', ok in tok bay Jerusalén, yujtol chin ilaytok yuj Cham Espíritu Santo. Man wojtakok tzet ok jay wiban bay tu'.

²³ Palta wojtak, a bay junjun conob bay chin eq'ui, chi yal Cham ayin, tol yowalil ok in oc preso bay tu', cax xiwil ab yailal ok wila'.

²⁴ Palta c'am chin oc il yuj juntzan tu'. Caxc'al chin cam yuj, palta c'am yelapnok jun camich tu' yul in sat. Asantanej wal chi wak' lajwok jun in mulnajil mitx'bil oc ti' yin tzalojc'ulal, cax chi lajwi wopiso yak'nak Cham Jajawil Jesús ayin, jun opiso yin aloj el k'anejal yet colbanilej yuj is watx'c'ulal Dios.

²⁵ Ec'nak in wal ayex, tzet chi yun e yoc yul k'ab Dios. A tinani', wojtak, tol c'amxa bak'in ok jil-lej co ba cay ti'.

²⁶ Yuj tu xin, a tinani' chi walcanok, tol c'amxa walon wet yin is c'aynakilal junok mactxel.

²⁷ Yujtol pilan albil cuybej Dios ayex wuj. C'am junok tzet max in c'ubaj el ayex.

²⁸ Yuj tu xin, taynejekc'al e ba, cax che taynen eb creyente masanil, yujtol ak'bil e yopiso yuj Cham Espíritu Santo e yilon yiglesia Cham Jajawil, eb max man yetok is chiq'uil yet max cam jujc'al.

²⁹ Yujtol wojtak, tol a yet ok in tok, ay juntzan eb ok jay ayex. Ok yak'lej eb ex yuchon saklemok, axca chi yut yak'on c'ayil no ok no calnel.

³⁰ Yetok c'apax e xol ayex ti', ay juntzan eb ok txecloj ajok, cax ok yak'on eb juntzan lek'tial, yuj yak'on eb c'ul eb creyente, yet watx' chi oc eb yetok eb.

³¹ Yuj tu xin, taynejekc'al e ba. Naektek, tol oxeb abil cac'al ti' ex in cuyon junjun ex, c'ualil c'al k'ekbintakil. Toltax ay bay chin ok'i chex in cuyoni.

³² A tinani xin, ex wuẍtak, chex wabenejcan oc yul k'ab Dios. A ok ex taynen yetok is k'anej. A is k'anej tu', caw wal max tx'ox watx'c'ulalil ayon; ay yipalil is k'anej tu' yak'on co tec'anil, c'al yak'on co satak, yujtol ayxa jalon jet yetok eb sic'bilxa el yuj.

³³ Ayin ti', c'am bay max wochej oc tumin, tamwal pichil junok anima.

³⁴ Ilab e yojtak, caw chin mulnaj yetok in k'ab, yuj tzet chi oc yopiso wuj, c'al tzet chi oc yopiso yuj eb ajun wetok.

³⁵ Max in tx'ox ayex, tol yowalil chi jilc'al co mulnajil, yet watx' chi je' co colwaj bay eb chi cawxi elok. Yowalil chi co natek tzet yalnak Cham Jajawil Jesús junel axca ti': Watx' yet eb chi saoni, yintak eb chi chaon sabalej tu', ẍi Cham, ẍi Pablo bay eb anciano tu'.

³⁶ Lajwi yalon Pablo juntzan ti', max ay jajanok, axa txajli yetok eb masanil tu'.

³⁷ Lajwi txajli eb xin, cax max jichchaj c'ul eb yok' masanil. Yin junjunal chi oc lak'an eb yin Pablo tu', max tz'ubon el eb is ti'.

³⁸ Caw wal max cus eb sic'libil, yujtol max yal bay eb tol c'amxa bak'in ok yil-lej ba eb yetok. A yet max toj Pablo tu', max bet alaycan yuj eb masantac'al bay max oc yul barco.