Tzetak Yetal Max El Yunen Eb Chekbej Jesús 18 - A Txꞌan Biblia Yin Kꞌanjobal 1989

Ayic' Pablo bay conob Corinto

¹ Lajwi tu xin, max el Pablo bay Atenas tu', axa toj bay conob Corinto.

² A bay Corinto tu' ayic' jun cham chi yik Aquila, cax israel cham. A bay Ponto aljinak, Priscila bi yistzil. Ec'lejnak cham yetok yistzil bay Italia. Ayic' eb bay Italia tu' yet max uktelay el masanil eb israel yul yet Roma yuj cham yajaw chi yik Claudio, xan max el eb bay Italia tu', max apni eb bay Corinto. A bay tu' max bet il-lay eb yuj Pablo.

³ Palta tutun lajanc'al mulnajil eb xin, yet watx'nem mantiadoal ba eb, xan max ayji ec' Pablo yetok eb bay tu', cax chi mulnaj yetok eb.

⁴ Axa yet junjun c'ual xewilal, chi betic' Pablo tu' yalon yabix eb anima bay nail culto eb yet israelal. A bay tu' max yak'lej yak'on is nabal eb yet israelal c'al eb man israelok.

⁵ Axa yet max jayoc Silas yetok Timoteo bay Corinto tu', yet petoj eb bay Macedonia, lanan yak'on Pablo yip yec' yalon el k'anej Dios yin masanil is c'ul. Caw wal max yak'lej yak'on nachaj el yuj eb israel, tol a Jesús, a ton Cristo, Cham echbanebil jay yuj eb.

⁶ Palta toc'al max tit yowal eb yin, max c'oli buchlay yuj eb. Yuj tu' xan max tzicobtanej Pablo is pichil, yuj tx'oxk'abnen el bay eb, tol c'amxa yalon yet yin eb. Max yalcan bay eb axca ti': —Ayexc'al oc che yitek e yailal e yiban junelnej. Ayin ti', c'amxa walon wet e yin. A tinani xin, ti chin chail yich in toj walon bay eb man israelok, ẍi bay eb.

⁷ Lajwi yalon axca tu', max eltek yul nail culto eb tu', axa toj bay yatut jun cham chi ikon Ticio Justo. Man israelok cham, palta chi yiay ba cham bay Dios. Cawilal nail culto tu' ay yatut cham.

⁸ Ay jun cham yajawil nail culto tu' chi yik Crispo. Max yaoc cham c'ul yin Cham Jajawil yetokc'al eb cajan yetok bay yatut. Xiwiltoc'al eb aj Corinto tu' max yaoc c'ul yin k'anej Dios yet max yaben eb, max yak'onxac'al c'apax bautizar ba eb.

⁹ Axa yet jun ak'bal max yalon Cham Jajawil bay Pablo tu' axca yin wayichejal axca ti': Manchak ach xiwi. Manchak ach oc wanaj alon el in k'anej,

¹⁰ yujtol ayin ec' etok. C'am junok mactxel ok in cha oc jucnaj en, yujtol xiwil mactxel sic'bilxa el wuj bay jun conob ti', ẍi bay.

¹¹ Yuj tu xin, max ayji ec' Pablo nan is cab abil bay Corinto tu', max yak'on k'anej Dios cuy eb bay tu'.

¹² A yet jun tiempoal tu', yet ayoc cham Galión gobernadoral yul makbej Acaya, max lajtinen el ba eb israel yin Pablo. Axa yiontok eb satak yajaw tu'.

¹³ Max yalon eb axca ti': —A jun winak ti', chi ec' yak' c'ul eb anima yin yalon ba eb bay Dios, palta man axcaok yalon co leyal, ẍi eb.

¹⁴ A yet lanan yalon ba Pablo tu', max yalon Galión bay eb israel axca ti': —Manchak ex awji octek ayin cayti'. K'inalok ta ay junok tzet man watx'ok max el yunen nak ti', ma xin, ay wal junok yobtakil max el yunen nak yul sat ley, chi mi in cha' wab tzet che yala'.

¹⁵ Palta ilab toc'al ijan che tx'emlej aj e ba yuj juntzan k'anej chi yal nak ti', c'al yuj biej chi binanejtek nak, yetokc'al yuj e ley. Yuj tu xin asek, watx'nejek yayji juntzan ti' e tx'oklil. Ayin ti xin, c'am chi yal in c'ul chin watx'nej yayji juntzan ti' ayex, ẍi Galión tu' bay eb.

¹⁶ Lajwi yalon axca tu', axa yuktelay eltek eb yuj yul is despacho tu'.

¹⁷ Axa mitx'lay cham Sóstenes yuj masanil eb griego tu', cham ayoc yajawilok nail culto tu', cax max mak'lay cham yuj eb bay ti' despacho cham yajaw bay jun lugar tu'. Palta toc'al max oc tucan Galión tu', c'am jabok tzet max yal bay eb.

Is yox viaje Pablo

¹⁸ Tx'ialtoc'al c'ual max ayji ec' Pablo bay Corinto tu'. Lajwi tu xin, max yalon toj ba bay eb creyente tu', axa yoc yul jun barco tu', cax max toj bay Siria. Max toj c'apax Priscila c'al Aquila yetok. A yet c'amto chi octok eb yul barco tu' bay conob Cencrea, max tzukon el ba Pablo bay tu', yuj tx'oxbanilok jun is trato yak'nak yetok Dios.*fn*

¹⁹ A yet max apni oc eb bay conob Efeso, max cancan Priscila yetok Aquila bay tu'. Axa Pablo max toj bay nail culto eb yet israelal tu', max c'oli k'anjab yetok eb ayic' bay tu'.

²⁰ Max oc tean eb yin Pablo tol chi ayji ec' jayebok c'u yetok eb bay tu', palta maj yal c'ul.

²¹ A yet max yalon toj ba bay eb, cax max yaloncan axca ti': Ta ok el yin c'ul Dios, ok in ec' ayex ti' junelxa, ẍican bay eb. Lajwi tu', max toj yul barco junelxa

²² masantac'al max apni oc bay conob Cesarea; Lajwi tu' max ajapnok bay Jerusalén tu' cax max yak' cawil c'ul eb creyente bay tu', axa toj bay conob Antioquía.

²³ A tu' max ayji ec' jun tiempoal bay tu'. Lajwi tu', max toj junelxa, axa yec' yul junjun conob ay yul yet Galacia, c'al yul yet Frigia tu'. Pilanc'al max ec' iptzelay eb creyente yin is creyenteal yuj, tzanc'al bay max eq'ui.

Max yalil Apolos k'anej Dios bay conob Efeso

²⁴ A yet jun tiempoal tu', ay jun cham israel chi yik Apolos, aj conob Alejandría. Max apnioc cham bay conob Efeso. Caw wal jelan yin k'anjab elok, caw wal cuywinak yin tx'an Un Tz'ibbilcanok sic'libil.

²⁵ Cuywinak cham yin cuybej Cham Jajawil. Yalnak el cham watx' abix yin masanil is c'ul. Bayc'al ijan max yut yalon el cham yabixal Jesús, palta ti pax asan ixto cuybej Juan cham ak'om bautismo yojtakxa cham.

²⁶ A yet junel, max toj yalil cham k'anej Dios bay nail culto eb yet israelal. Caw tec'an waayi, cax chi yalon elok. Axa yet max lajwi yaben Priscila yetok Aquila tzet max yut cuywaj ba cham xin, max yiontok eb cham is tx'oklil, max c'oli cuyon wal eb yin yet Dios sic'libil.

²⁷ Lajwi tu', max el yin c'ul Apolos tu' toj bay yul yet Acaya. Axa colwaj eb creyente yetok tu', yin tz'iben el eb jun carta max yitok bay eb creyente aj lugar bay tu', yet watx' watx' chi yut chaon apnok eb. A yet max apni oc bay Acaya tu xin, max yiptzen jantak eb maxax yaoc c'ul yin Jesucristo yuj is watx'c'ulalil Dios.

²⁸ Caw wal max yak' yip tx'oxk'abnen elok, tol yelc'ulal c'aynaktok eb israel tu'. A k'anej Dios tz'ib yayjican yul tx'an Un Tz'ibbilcanok max yak'balnej, yuj yalon bay eb anima yet watx' chi nachaj el yuj eb, tol a Jesús a ton Cristo, Cham echbanebil jay yuj eb.