Tzetak Yetal Max El Yunen Eb Chekbej Jesús 14 - A Txꞌan Biblia Yin Kꞌanjobal 1989

Pablo yetok Bernabé bay conob Iconio

¹ A yet max apni oc Pablo yetok Bernabé bay conob Iconio, max octok eb yul nail culto eb israel. Caw wal watx' max yut yalon el eb k'anej Dios yul tu'. Yuj tu xin, xiwil eb israel max yaoc yin c'ul, c'al eb man israelok.

² Palta eb israel tol maj yaoc yin c'ul xin, max yak' eb c'ul juntzan eb man israelok, yet watx' chi oc eb ajc'ulal yin eb creyente tu'.

³ Najatilc'al tiempo max ayji ec' Pablo, c'al Bernabé tu' yetok eb bay jun conob tu'. Caw tec'an max yut ba eb yalon elok, yujtol max yaoc eb Cham Jajawil yipok c'ul. Max oc Cham Jajawil yetok eb yet max yalon el eb yabixal is watx'c'ulal Cham, cax max yak'on yipalil eb, yet chi je' tx'oxon eb milagro, yet watx' chi txecloj elok tol yel chi yal eb.

⁴ Palta eb anima bay jun conob tu', ca pojan max eloc eb. Nan eb max oc yetok eb israel, cax nan eb max oc yetok eb chekbej Jesús tu'.

⁵ Max lajtinej el ba eb israel yetok eb man israelok tu', yetok eb yajawil conob yin wajan alnen eb, tol chi baj eb Pablo c'al Bernabé tu'. Chi lajwi tu' cax chi k'okon cam eb naoni.

⁶ Axa yet max yaben eb chekbej Jesús tu' k'umal tzet chi lajtinelay yin eb tu xin, max toj eb elok. Max apni oc eb bay Listra, c'al bay Derbe, yul yet Licaonia.

⁷ Max ec' yaloncan el eb k'anejal yet colbanilej bay juntzan conoblak bay cawilal tu'.

Max k'okch'ennelay Pablo bay conob Listra

⁸ A bay conob Listra tu', ay jun winak c'am chi je' bey yintaxc'al yaljubal. C'amc'alta' bay chi bey nak jabok. A yet junel, chotan ay nak yabxalwi bay Pablo.

⁹ Max oc t'anan Pablo tu' yin nak. Axa yiloni tol chi yaoc nak yin c'ul tol chi je' watx'jican nak yuj Dios.

¹⁰ Yuj tu xan max yal bay nak yin ipejal axca ti': —Ajan wanok, tojol chot aj lecan a ba, ẍi Pablo bay nak. Yet jun bek tu', max aj jucnaj nak, axa beycan aj nak tu'.

¹¹ Axa yet max yilon eb anima tzet max el yunen Pablo tu xin, max aj yaw eb yin ipejal, cax max yalon eb yin ti' eb aj Licaonia tu' axca ti': —A cawan co diosal ti', max yut ba eb animail, cax max ayol eb co xol, ẍi eb.

¹² A Bernabé, max yak' eb yik Júpiter. Axa Pablo max yak' eb yik Mercurio,*fn* yujtol a' max k'anjab el xol eb.

¹³ Ay jun winak ayoc sacerdoteal Júpiter, yajaw yayji bay templo Júpiter tu' bay tiel conob. A' max bet iontek juntzan no ach'ej wacax, c'al juntzan xak te'. Yochej eb max yak' xajanbal yetok masanil eb anima bay Pablo, c'al bay Bernabé tu'.

¹⁴ Palta a yet max yaben eb chekbej Jesús tu', max nic'tok eb is pichil.*fn* Max yalon eb yin ipejal nan xol anima axca ti':

¹⁵ —Ex mamin anima, ¿tzet xan caytu' che yut e ba? Ayon ti', naba anima onc'al axca ex ti'. Yuj tu' xan chi ul jal ayex, tol bekekcan e beybalnen juntzan ti', yujtol caw wal nabac'al che yetnej e ba. Q'uexek e beybal, cax che yaon oc e nabal yin Cham Dios iquisc'al yin tojbalk'inal, Cham max esnen satcan c'al sat tx'otx' ti', a' mar yetok masanil tzet yetal ay bay.

¹⁶ A yet payxa, max beklaycan anima yuj Dios yet watx' junjunxac'al chi beybalnej atac'ala' tzet chi yochej.

¹⁷ Palta max yak'c'alta' co nabal yin jojtaknen tzetbil yayji oc yin yaontek nab jiban, xan chi je' masanil tzet chi jawa'. A' chi ak'on masanil tzet chi co lo'. Chi yak'on c'apax co tzalojc'ulal, ẍi eb.

¹⁸ A yet max lajwi yalon Pablo yetok Bernabé juntzan tu', pural wal max tenchaj oc wanaj eb anima tu' yuj eb, yujtol nabal wal eb yak'on cam no wacax tu', cax chi yak'on eb yin xajanbalil bay eb.

¹⁹ Ay jaywan eb israel aj Antioquía max jayocok, c'al jaywan eb aj Iconio, max c'oli yak'on eb c'ul eb anima tu'. Yuj tu xin, max k'okch'ennej eb Pablo tu'. A max yut naon eb tol camnakxa, yuj tu' xan max bet k'okcan el eb tiel conob.

²⁰ Palta max bet oc oyan eb creyente yin, axa yaj wan tu', max oc yul conob junelxa. Axa yet junxa c'ual, max toj yetok Bernabé bay conob Derbe.

²¹ Max yalil eb k'anejal yet colbanilej bay tu'. Xiwil anima max yaoc c'ul yin Cham Jajawil yuj eb. Lajwi tu' max toj eb. Max ec' eb junelxa bay conob Listra, yetok bay Iconio, c'al bay Antioquía.

²² Max ec' eb bay junjun conob tu', yuj ec' yiptzen eb eb creyente. Max ec' alay oc nabal eb yuj eb, max yaloncan eb bay eb axca ti': —Caw tec'an che yut e nabal yin Cham Jajawil, yujtol yowalil miman yailal ok jay jiban, mac on chon oc yul k'ab Dios, ẍi eb.

²³ A yet max ec' Pablo yetok Bernabé bay junjun iglesia, max yacan oc eb yopiso eb chi oc ancianoal. Max txajli eb yuj eb bay Dios, cax max oc eb yin c'ajbanc'ulal. Max lajwi tu', max yabenencan oc eb eb creyente yul k'ab Cham Jajawil, Cham bay max yaoc eb c'ul.

Max jay Pablo yetok Bernabé bay Antioquía yul yet Siria junelxa

²⁴ Max lajwi tu', max eq'uel Pablo yetok Bernabé yul yet Pisidia, cax max apni eb yul yet Panfilia.

²⁵ Max yalcan el eb k'anej Dios bay conob Perge. Lajwi tu' max toj eb, max apni eb bay conob Atalia.

²⁶ A tu' max oc eb yul jun barco, cax max toj eb bay conob Antioquía junelxa, a ton jun conob bay k'annak eb creyente watx'c'ulal Dios yiban Pablo, c'al Bernabé tu' yin is viaje bay max betic' eb yalon el k'anej Dios.

²⁷ A yet max meltzoj eb, max wajban oc eb eb creyente aj Antioquía tu', cax yalon eb bay eb jantak tzet max el watx'nen Dios yetok eb. Max yalon c'apax eb, tol max cha Cham Jajawil yaoc eb man israelok c'ul yin.

²⁸ Najatil tiempo max ayji ec' Pablo c'al Bernabé tu' yetok eb creyente bay jun lugar tu'.