Abdías 1 - A Txꞌan Biblia Yin Kꞌanjobal 1989

Yayc'aybal Edom

¹ A jun k'anej ti' max chek Jehová yalil Abdías yin conob Edom: Max jab wal jun k'anej Jehová: Max toj junok is chekbej bay nacionlak, max yalon jun k'anej ti': ¡Co watx'nejek co ba! ¡Tonek jak' owal yin Edom! ẍi. Axca ti' yalon Jehová Cham Yajaw yin Edom:

² Yaliẍxac'al ok ex wut xol juntzanxa nacionlak, intaknebilxac'al ok e yuncanok.

³ A e maynejbail chex etneni. Axac'al bay yulak yolanil ch'en mimek ch'en, a tu' ay ex ec'ok, c'al bay jolomlak witz, xan max e na' tol c'am junok mactxel chi je' ex yuchon lajwok.

⁴ Ayin caw Jehová in chi wala', tol caxc'al chex tojcan axca no águila chi watx'nej ajtok is wayub bay can, axcaxac'al tol a xol waycan, atac'al bay tu' ok ex wiaytek.

⁵ Ta a eb elk'om chi jay elk'an yet ak'balil, c'am chi yitok masanil tzet yetal. Ta a junok wajom sat awoj chi eq'ui, ayto bay chi can junjunokxa chaan yuj. Akxa wal eb ajc'ul, junelnej ok ex yak'xac'al can lajwok eb.

⁶ Ok'bal c'ulxac'al ok e yuncantok ex yinatil Esaú. Ok elk'anelaytok masanil e beyomal c'uan ec'ok.

⁷ Masanil eb ayoc e yetok, ok ex yetnej eb. Ok ex yuktej el eb bay sat e tx'otx'. A wal eb watx' yak'on e yetok ok meltzoj oc eb ajc'ulal e yin. A eb e watx'il anima tu', a eb ok watx'nej ay yal yul e be, palta man ok e yiltek e ba.

⁸ A wal yet ok waon oc yailal e yiban ex aj Edom, ok wak' lajwok ay masanil eb aj nabal e xol. Ok wiel eb jelan e xol, ex cajan ex yul makbej Esaú.

⁹ A wal eb jelan yin ak'oj owal e xol, ex aj Temán, caw wal ok bilaj eb yuj xiwilal. C'amxa junok ex cajan ex bay siquilal tx'otx' yul yet Esaú ok ex can yin e yiquisal.

Is yobtakilal Edom

¹⁰ Toxac'al ok ex cancan yin q'uixwiltakil, ok ex lajwokcan ay yin junelnej, yujtol max e yetnej eb yinatil Jacob, yuẍtak e yichmam Esaú.

¹¹ A yet max ilay eltek masanil is beyomal Jerusalén yuj eb ajc'ul, a yet max mak'lay poj is puertail jun conob tu' yuj eb tx'ok conobal, ayex ti' toc'al max ex oc t'ananok. Yet max yaon oc eb ajc'ul masanil tzetak yetal ay bay yin suerteal, cax max ilaytok is beyomal yuj eb, lajanxac'al max e yut e ba yetok eb ajc'ul tu'.

¹² Man mojok tol max ex tzewi, yet max e yilon oc eb axca tu', yet jun c'ual yet ayoc yailal yiban eb aj Judá. Man mojok tol max ex tzaloji yet jun c'ual yet max lajwi ay eb. Man wal mojok tol max ex buchwaj yin eb yet jun c'ual yet ayoc eb yin yatakilal.

¹³ Man mojok tol max ex octok yul is conobal eb in conob, yet ayoc eb yin yailal, yuj e tzewi yuj tzet chi on eb, c'al e yelk'anen is tzetak yetal eb.

¹⁴ Man mojok max ex oc waan bay chi chalej ba be, yin e mak'on cam eb lanan yelajok, c'al yin e yaon oc eb yul k'ab eb ajc'ul yet jun c'ual ayoc yailal yiban eb.

¹⁵ Cawilxa chi jayoc jun c'ual yet chin tx'ox yowal in c'ul yiban nacionlak. Axca wal tzet max e yunej, caywal tu' ok yun juntzanxa anima e yin. Ok e cha' wal paktzil axca wal is mojalil.

¹⁶ Axca wal max yun e yuc'wi an bay in tzalan yet ayilal, caywal tu' ok yun wak'on e yuc' yowal in c'ul yetok juntzanxa nacionlak. Ok e yuc'c'al, masantac'al ok yal e lajwi ay yin junelnej.

Ok ilay aj can Israel

¹⁷ Axa pax tzalan Sión wet-xa ok yuncanok. A bay tu' ok ayjok ec' eb yinatil Jacob okto colchajcanok, okto yi' eb is tx'otx' junelxa.

¹⁸ A eb yinatil Jacob, c'al eb yet José, a eb tu', axca wal junok xak k'ak'ej ok yun eb. Axa pax eb yinatil Esaú xin, lajan wal ok yun eb axca yakan jatx'ben tol chi tz'a ay yuj k'ak'ej yin junelnej. Ayin wal caw Jehová in chi wala' tol c'amxa junok eb yet Esaú ok colchajcan elok, ẍi Cham.

¹⁹ A eb israel cajan bay tx'otx' Néguev, ok yi' eb tx'otx' siquilal tx'otx' yul yet Esaú. Ac'ala' eb cajan bay pananlak, ok yi' c'apax eb tx'otx' tx'otx' yet eb filisteo. Ok yion pax eb israel is tx'otx'al Efraín, c'al tx'otx' is makbej Samaria junelxa. Axa eb yet Benjamín ok ioncan tx'otx' Galaad.

²⁰ Axa pax junxa bulan eb israel, eb ibiltok yin presoal, a eb ok cha is satak bay is tx'otx'al eb aj Canaán, masantac'al bay conob Sarepta. Axa eb aj Jerusalén ayoc yin mosejal, cajan ec' eb bay Sefarad, a eb ok yi' juntzan conob bay yul tx'otx' Néguev.

²¹ Ok ajapnok eb colwajwom bay tzalan Sión, ok yajawbok eb yin is tx'otx'al Esaú. A yet tu' asanxanej Jehová ok yajawbok.